بايقاۋدىڭ الدىندا ن.ناۋشاباي ۇلى اتىنداعى قازاق ورتا مەكتەبىنىڭ ۇيىمداستىرۋىمەن عىلىمي-پراكتيكالىق كونفەرەنتسيا ءوتىپ, نۇرجان شىعارماشىلىعى تەرەڭ تالداندى. بايقاۋدىڭ تاعى ءبىر ەرەكشەلىگى – وعان 20 مەن 35 جاس ارالىعىنداعى ورىمدەي 15 جاس ءانشى سەمەي, الماتى, نۇر-سۇلتان, جەزقازعان, كوكشەتاۋ قالالارىنان كەلىپ قاتىستى. ولار التىننىڭ سىنىعىنداي بولىپ, وسى كۇنگە جەتكەن «كوكەن-اي», «باتيماعا», «ارا-اي», «اسىل-اي», «جان ساۋلەم», «نازىم» اندەرىن شاڭنان ارشىپ العانداي, مولدىرەتىپ, ناقىشىمەن ورىندادى.
بايقاۋ تەك نۇرجان اندەرىن ناسيحاتتاپ قانا قويعان جوق, جاس تالانتتاردىڭ جولىن اشتى. قازاق ۇلتتىق ونەر ۋنيۆەرسيتەتىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, بەلگىلى جىرشى الماس الماتوۆ باس بولعان بەدەلدى قازىلار القاسىنىڭ باعاسىمەن ءۇشىنشى ورىن كوكشەتاۋلىق ءنازيرا بەيسەنوۆاعا, جەزقازعاندىق ساعىمباي مالىبەكوۆ پەن قوستاناي اۋدانىنىڭ وكىلى جانات مىنايدارعا بۇيىردى. ەكىنشى ورىندى سەمەي قالاسىنىڭ وكىلى تاڭات مۇقاشەۆ پەن نۇرسۇلتاندىق اقىلتاي زەكەنوۆ ءبولىستى. ءبىرىنشى ورىندى الماتىلىق زارينا راحمانبەرديەۆا جەڭىپ الدى. ال باس جۇلدەنى نۇر-سۇلتان قالاسىنداعى قازاق ۇلتتىق ونەر ۋنيۆەرسيتەتىنىڭ 2-كۋرس ستۋدەنتى فارحات جاكىشكە بەردى.
– بايقاۋ وتە دۇرىس ۇيىمداستىرىلعانىن ايتقىم كەلەدى. كەلەشەكتە جىرشى, تەرمەشىلەردى شاقىرىپ, نۇرجاننىڭ تولعاۋلارى مەن نازىمدارىنان دا بايقاۋ وتكىزۋگە بولادى, – دەدى الماس الماتوۆ. بۇل ويدى نۇرجانتانۋشى اقىن اقىلبەك شاياحمەت تە قۋانا قولدادى.
– ۋاقىتىسىندا كەيبىر كىسىلەر نۇرجاننىڭ اندەرىن 20-30-عا «جەتكىزىپ», تىم ارتىق كەتتى. كورىنگەندى نۇرجانعا جاپسىرا بەرۋ اقىنعا جاسالعان قياناتپەن بىردەي. ونىڭ ەل اۋزىندا قالعان 7-8 عانا ءانى بار. از دا بولسا, ساز اندەر. نۇرجاننىڭ جىرلارى مەن تولعاۋلارى دا بايقاۋعا سۇرانىپ تۇر, – دەيدى اقىلبەك شاياحمەت.
نۇرجاننىڭ ءوزى ايتقانداي, ونىڭ «ون ەكى يرەك» اندەرىنىڭ رەسپۋبليكالىق بايقاۋى جىلدا وتكىزىلەدى.
قوستاناي
