– اتىراۋ – اقىندار مەن باتىرلار ەلى. تالاي ءدۇلدۇل وتكەن وسى قاسيەتتى توپىراققا كەلۋ ماعان ارمان بولدى. بۇگىن سول ارمانىمنىڭ ورىندالعان كۇنى, – دەدى مەملەكەتتىك سىيلىقتىڭ يەگەرى, قازاقستاننىڭ ەڭبەك سىڭىرگەن قايراتكەرى مارفۋعا ايتقوجينا.
«اق ەدىل, اساۋ ەدىل, ارىنداعان,
قۇلشىنىپ تاعدىر كۇشكە
جالىنباعان.
كەمەلدەنگەن كەزەڭدە كەلىپ تۇرمىن,
جىرعا وراپ جۇرەگىمدى
جالىنداعان»,
– دەپ ەدىلدى ولەڭگە قوسقان اقىندى جايىق جۇرتى دا زور قۇرمەت-قوشەمەتپەن قارسى الادى.
– وڭىرىمىزدە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا اقىن-جازۋشىلاردىڭ كەشتەرى ءجيى وتەدى, – دەدى شاراعا قاتىسقان وبلىس اكىمى نۇرلان نوعاەۆ. – بۇل كەش تە سول ءۇردىستىڭ جالعاسىن تاپقانىنىڭ كورىنىسى. مارفۋعا اپايدىڭ ءار ولەڭىندە سالماقتىلىق, پاراسات پەن تەرەڭ ماعىنا بار. وسكەلەڭ ۇرپاقتى وتانسۇيگىشتىك رۋحتا تاربيەلەۋدە اقىن شىعارماشىلىعىنىڭ ماڭىزى زور.
«اققۋ اقىن» ولەڭ جازىپ قانا قويمايدى, سول ولەڭدەرگە اۋەزدى ءۇن قوسىپ, انگە اينالدىرادى. قازاقستاننىڭ ەڭبەك سىڭىرگەن قايراتكەرلەرى ماحمۇت تويكەنوۆ پەن گۇلزات تاۋىرباەۆالاردىڭ دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترىنىڭ سۇيەمەلدەۋىمەن ورىنداعان اندەرىن اتىراۋلىقتار ريزاشىلىقپەن قابىلدادى.
– قازاققا مارفۋعا ايتقوجينانى تانىستىرىپ جاتۋدىڭ ءوزى ارتىق. رەسمي اتاق-داڭقىن ايتپاعاندا, ەل-جۇرتىنىڭ بەرگەن «جىر اققۋى» دەگەن باعاسى بارىنەن بيىك. سول بيىگىڭىزدەن الاسارماڭىز, – دەدى قازاقستان جازۋشىلار وداعىنىڭ حاتشىسى عاني قاليبەك.
«سىبىرلاپ جاتىر جايىقتىڭ كۇمىس تولقىندارى, جاعاڭا كەلدىم, جانىمدى سىرعا تولتىرعالى», دەپ وزىنە عانا ءتان ۇنىمەن ساحنانىڭ ءسانىن كەلتىرگەن مارفۋعا اقىن ايتقوجينا اتىراۋ كەشىن كوركەم ولەڭنىڭ كەرىمسال سامالىمەن تەربەپ كەتتى.
اتىراۋ
