ەرەسەكتەر مەن بالالار اراسىندا انىقتالعان اۋرۋلاردىڭ كوبى سان جاعىنان دا, اۋرۋ دارەجەسىنىڭ كۇردەلىلىك دەڭگەيى بويىنشا دا وڭىردەن وڭىرگە بارعان سايىن ءوسىپ كەلەدى. بۇل جولى مەديتسينالىق پويىز ماماندارى بىرقاتار اۋىر ونكولوگيالىق جانە جۇرەك-قان تامىر اۋرۋلارىنىڭ انىقتالۋىنىڭ كۋاسى بولدى. ماڭعىستاۋ وبلىسىنداعى مەديتسينالىق تەكسەرۋلەردىڭ ستاتيستيكاسى كەلەسىدەي: جالپى 10 823 دارىگەرگە كەلۋ تىركەلگەن, دارىگەرلەر 2 306 پاتسيەنتتى قابىلداعان, ونىڭ ىشىندە 481 بالا. مەديتسينالىق پويىز شاعىن حيرۋرگيالىق وتالار جاساۋعا جانە سكرينينگكە قاجەتتى بارلىق تەحنيكامەن جابدىقتالعان. وسىلايشا پويىزدا 181 فگدس پروتسەدۋراسى, 717 ۋدز (ۋزي) جانە 233 فليۋوروگرافيا جاسالدى. ماڭعىستاۋ وبلىسىندا تۇرعىندار ەڭ كوپ بارعان دارىگەرلەر قاتارىندا ستوماتولوگ, وفتالمولوگ بار. ءتىس دارىگەرى 832 ادامدى قابىلداسا, كوز دارىگەرى 820 ادامدى تەكسەرىپ ۇلگەرگەن.
«ماڭعىستاۋ وبلىسىنىڭ تۇرعىندارىن تەكسەرۋ بارىسىندا 10-نان استام ونكولوگيالىق سىرقات انىقتالدى. ونىڭ ىشىندە: 2 بەت تەرىسىنىڭ اۋرۋى, 1 اۋىز قۋىسىنىڭ اۋرۋى, ۋدز ناتيجەسىندە باۋىردىڭ مەتاستاتيكالىق زاقىمدانۋىنىڭ 2 جاعدايى, 2 بۇيرەك اۋرۋى, 2 قۋىق اۋرۋى, 1 قالقانشا بەزى اۋرۋى جانە بۇيرەكتەگى قاتەرسىز ىسىكتىڭ 3 جاعدايى انىقتالدى.
سونداي-اق ناۋقاستاردىڭ بىرەۋىندە ەكگ-نى تەكسەرۋ كەزىندە ءبىرىنشى رەت ەكىنشى دارەجەلى سينومولەكۋليارلى بلوكادا انىقتالدى - ول بىردەن حولتەر مونيتورينگىنە جىبەرىلدى. ناۋقاس ودان ءارى كارديوستيمۋلياتوردى يمپلانتاتسيالاۋ ءۇشىن تولىق تەكسەرۋدەن ءوتۋى كەرەك. ءبىز بارلىق پاتسيەنتتەرگە قورىتىندى مەن ودان ءارى ەمدەلۋ ءۇشىن جولدامالار بەرەمىز», دەدى ماڭعىستاۋ وبلىسى بويىنشا مەديتسينالىق بريگادا باسشىسى زۋليا كاميەۆا.
مەديتسينالىق پويىز مامانداردىڭ كەڭ سپەكترى بويىنشا جۇمىس ىستەيتىن كلينيكالارى جوق شالعاي اۋدانداردا تەگىن مەديتسينالىق كومەك كورسەتەدى. مۇنداي كومەك اۋىر سىرقاتتاردىڭ تارالۋىنا جول بەرمەيدى. ناۋقاستار دارىگەرلەر مەن مەدبيكەلەرگە كاسىبي دەڭگەيدە كورسەتكەن قىزمەتتەرى ءۇشىن العىس بىلدىرەدى.
«بۇگىن ءبىزدىڭ ەلدى مەكەنگە «دەنساۋلىق» مەديتسينالىق پويىزى كەلدى. ماعان دارىگەرلەردىڭ پاتسيەنتتەرگە دەگەن قارىم-قاتىناستارى ۇنادى. بارلىعى سىپايى, ۇقىپتى جانە ءوز ءىسىنىڭ شەبەرلەرى ەكەن. اسىرەسە قارتتار وتە ريزا. مەديتسينالىق پويىزدىڭ بىزگە جىل سايىن كەلىپ تۇرعانىن قالايمىز», دەيدى ساي-ۇتەس بەكەتىنىڭ تۇرعىنى باعيلاش بەيبىتوۆا.
ەستەرىڭىزگە سالا كەتسەك, جوبا 29 ساۋىردەن باستاپ جۇزەگە اسىرىلىپ كەلەدى جانە ونىڭ باستى ماقساتى – ەلىمىزدىڭ شالعاي اۋداندارىنىڭ تۇرعىندارىن تەگىن مەديتسينالىق قىزمەتپەن قامتۋ. جوبانى «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى دەنساۋلىق ساقتاۋ مينيسترلىگىنىڭ اتسالىسۋىمەن جۇزەگە اسىرىپ جاتىر.
2019 جىلدىڭ 20 تامىزىندا «دەنساۋلىق» مەديتسينالىق پويىزىنا قوسىمشا «جاردەم» مامانداندىرىلعان مەديتسينالىق پويىزى ىسكە قوسىلعان بولاتىن. بۇل «دەنساۋلىق» پويىزى سياقتى مەديتسينالىق كومەككە قولى جەتپەيتىن شالعايداعى ستانسالار مەن جاقىن ورنالاسقان اۋىلداردىڭ تۇرعىندارىنا العاشقى مەديتسينالىق-سانيتارلىق جانە كونسۋلتاتيۆتىك-دياگنوستيكالىق كومەك كورسەتەدى. «جاردەم» مەديتسينالىق پويىزى قازىر اقتوبە وبلىسىن ارالاۋدا. ەكى پويىزدىڭ ىسكە قوسىلۋ ۋاقىتىنان باستاپ بارلىعى 40 479 ادام تەكسەرىستەن وتكەن.
پويىز ۆاگوندارى نەمىس جانە جاپون ءوندىرىسىنىڭ الدىڭعى قاتارلى فيرمالارىنىڭ زاماناۋي دياگنوستيكالىق قۇرال-جابدىقتارىمەن جابدىقتالعان. اپپاراتۋرالار پاتسيەنتتەرگە قاجەت بولعان جاعدايدا تولىق جالپى جانە بيوحيميالىق تالداۋلار جاساۋعا, رەنتگەنوگرافيا جانە فليۋوروگرافيادان وتۋگە, ىشكى ورگاندارعا جانە قان تامىرلارىنا ۋدز-زەرتتەۋلەر جۇرگىزۋگە, ەلەكتروكارديوگرامما, گاستروفيبروسكوپيا جاساۋعا جانە باسقا دا دياگنوستيكالىق زەرتتەۋلەر جۇرگىزۋگە مۇمكىندىك بەرەدى.
«ەگەمەن-اقپارات»
