چەليابى وبلىسىنىڭ گۋبەرناتورى الەكسەي تەكسلەر باستاعان ۇلكەن دەلەگاتسيانىڭ قوستاناي وبلىسىنا كەلۋ ماقساتى دا قاتار جاتقان ەكى ءوڭىر ەكونوميكاسىنىڭ دامۋىنا, تۋريزم مەن مادەني سالالاردىڭ جاندانۋىنا ىقپال ەتۋ بولاتىن.
ادەتتە, كورشىلەر اراسىنداعى بايلانىس الدىمەن ەكونوميكا فلاگماندارىنان باستالاتىنى بەلگىلى. ءوندىرىس ولاردا دا بار, ال ءبىزدىڭ كەنىشتەر قاشاننان ىرگەدەگى ماگنيتوگورسك مەتاللۋرگيا كومبيناتىنىڭ نەگىزگى ارىپتەسى بولىپ سانالادى. ەكى وبلىس اراسىنداعى تاۋار اينالىمىنىڭ دا نەگىزگى بولىگىن سوكولوۆ-سارىباي كەن ءوندىرۋ بىرلەستىگى شىعاراتىن تەمىر كەنى قۇرايدى. قازىر قوستانايدا وڭدەۋ ونەركاسىبى دامۋعا باعىت العان. ونىڭ كوشىن ماشينا قۇراستىرۋ زاۋىتتارى باستاپ وتىر. چەليابى بۇل ورايدا دا قوستانايعا ارىپتەس, ودان ءبىزدىڭ زاۋىتتار ماشينا بولشەكتەرىن, قۇرامالارىن الادى.
دەلەگاتسيا قوستاناي قالاسىنداعى سالتاناتى سىرتتان كەلگەن قوناقتارعا تاڭداي قاققىزاتىن جاڭا ءزاۋلىم «جاستار سارايىنا» كەلدى. قوناقتار قۇرقول ەمەس ەدى, وسىنداعى چەليابىلىكتەر الىپ كەلگەن كورمەلەر جالپى جۇرتشىلىقتىڭ دا, قوستاناي وبلىسى كاسىپكەرلەرىنىڭ دە نازارىن ەرەكشە اۋداردى. جالپى, چەليابى وبلىسىنىڭ بۇگىنگى بەينەسىن, ەكونوميكاداعى, الەۋمەتتىك سالاداعى, تۋريزم بويىنشا الەۋەتىن كورسەتەتىن فوتوكورمەنىڭ جانىنا جۇرتشىلىق كوبىرەك توقتادى. ءتۋريزمنىڭ «شاقىرتقىسى» قولونەر شەبەرلەرى مەن «ۋۆەلدى» ءساناتوريىنىڭ ماماندارى تۋريستەردى تارتۋدىڭ سىرىن ۇعىپ قالعانداي.
كەزدەسۋدە ەكى وبلىستىڭ اتقارۋشى بيلىك ورگاندارى مەن بيزنەس قوعامداستىقتارى اراسىندا بىرنەشە مەموراندۋمعا قول قويىلدى. الدىمەن سوكولوۆ-سارىباي كەن ءوندىرۋ بىرلەستىگى مەن ماگنيتوگورسك مەتاللۋرگيا كومبيناتى, «سارىارقااۆتوپروم» ماشينا قۇراستىرۋ زاۋىتى مەن «سۋحوي پورت يۋجنوۋرالسكي» زاۋىتى اراسىندا مەموراندۋمعا قول قويىلدى. سونىمەن قاتار قوستاناي وبلىستىق دەنەشىنىق-
تىرۋ جانە سپورت باسقارماسى مەن چەليابى وبلىستىق دەنەشىنىقتىرۋ جانە سپورت مينيسترلىگى, قوستاناي وبلىستىق اقپاراتتاندىرۋ, مەملەكەتتىك قىزمەت كورسەتۋ جانە ارحيۆتەر باسقارماسى مەن چەليابى اقپاراتتىق تەحنولوگيالار مينيسترلىگى اراسىندا دا وسىنداي كەلىسىم جاسالدى.
– كورشىلەرمىز, قاشاننان تامىرلاسىپ قالعان. ال وسىنداي كەزدەسۋلەر ءبىزدىڭ دوستىعىمىزدى نىعايتادى, ەكونوميكالىق, مادەني بايلانىستارىمىزدى كۇشەيتەدى. ەكى وبلىستىڭ تاۋار اينالىمى ۇلكەن, بىراق وعان توقمەيىلسىمەي, العا جىلجۋ كەرەك, – دەدى چەليابى وبلىسىنىڭ گۋبەرناتورى الەكسەي تەكسلەر. ەكى وبلىس كورشى عانا ەمەس, ەكونوميكادا ءبىر-بىرىنە ستراتەگيالىق ارىپتەس تە بولىپ كەلەدى. ونى قوستاناي وبلىسىنىڭ اكىمى ارحيمەد مۇحامبەتوۆ نىقتاپ ايتتى.
– چەليابى وبلىسى ءبىزدى كوپ سالادا قىزىقتىرادى. مىسالى, قازىر تەك قوستانايدا عانا ەمەس, «نۇرلى جول» باعدارلاماسىمەن جالپى ەلىمىزدە تۇرعىن ءۇي قۇرىلىسى قارقىندى ءجۇرىپ جاتىر. ال چەليابىدە مۇنارالى كران شىعاراتىن كاسىپورىن بار. ول بىزگە وتە قاجەت. سونىمەن قاتار مادەنيەت, اۋىل شارۋاشىلىعى سالالارىندا دا كورشىدەن الارىمىز دا, بەرەرىمىز دە بار. ولاردا تۋريزم دە جاقسى دامىپ وتىر, – دەدى ارحيمەد بەگەجان ۇلى. ءيا, شەكارانىڭ ارعى بەتىندەگى «ۋۆەلدى» ساناتوريىنە جىلىنا 2 مىڭ قوستانايلىق بارىپ دەمالادى ەكەن.
چەليابى وبلىسى – رەسەيدىڭ ەكونوميكالىق قۋاتتى, بيۋدجەتىنىڭ قوماقتى بولىگىن بەرەتىن وبلىستارىنىڭ ءبىرى. دەلەگاتسيا قۇرامىندا كەلگەن وڭتۇستىك ۋرال ونەركاسىپ پالاتاسىنىڭ پرەزيدەنتى فەدور دەگتەرەۆتىڭ ايتۋىنا قاراعاندا, چەليابى ءۇشىن قازاقستان ستراتەگيالىق سەرىكتەس بولىپ سانالادى. ونىڭ تاۋار اينالىمىنىڭ تورتتەن ءبىرى قازاقستانعا تيەسىلى. الايدا چەليابى وبلىسىنان بىزگە وڭدەۋ كاسىپورىندارىنىڭ ءونىمى كەلسە, قوستانايدان الدە دە شيكىزات الىنادى. اۋىل شارۋاشىلىعىنان دا شيكىزاتتى كوزدەيدى.
– چەليابىدە ءونىمىن ەۋروپاعا, ونىڭ ىشىندە يتالياعا جىبەرەتىن اسا قۋاتتى ماكارون كاسىپورنى بار. وعان قاتتى بيدايدى ءبىز قوستانايدان الامىز, – دەيدى فەدور دەگتەرەۆ.
قوستانايدان دا چەليابىگە قاتتى بيداي ەمەس, ۇن, ۇن عانا ەمەس, ماكارون جونەلتەتىن كۇندەر تۋار دەگەن ويعا كەلەمىز. ول ءۇشىن كورشىدەن ۇيرەنۋدىڭ دە سوكەتتىگى جوق.
كەزدەسۋدەن كەيىن چەليابىنىڭ اتاقتى «ۋرال» بي ءانسامبلى مەن قوستانايلىق ونەرپازداردىڭ قاتىسۋىمەن ۇلكەن كونتسەرت بولدى.
قوستاناي
