ءتۇرلى اۋرۋلارعا شالدىعۋ مۇمكىندىگىن انىقتاۋ ءۇشىن جاسالاتىن گەنەتيكالىق سىنامالاردىڭ 900 ءتۇرى بار. پرەزيدەنتتىك كلينيكانىڭ زەرتحاناسى كۇنىنە 8 مىڭ, جىلىنا 2 ملن-نان اسا زەرتتەۋ جاساسا, ونىڭ قۇرامىنداعى دەربەستەندىرىلگەن گەنومدىق زەرتحانا ءبىر جىلعا جۋىق ۋاقىت ىشىندە 4 مىڭنان اسا گەنەتيكالىق زەرتتەۋ جۇرگىزگەن. پرەزيدەنت ءىس باسقارماسى مەديتسينالىق ورتالىعىنىڭ باسشىسى الەكسەي تسويدىڭ ايتۋىنشا, بۇگىندە الەمدە اۋرۋدى بولجاۋ, الدىن الۋ, دەربەستەندىرۋ جانە پارتيسيپاتيۆتىلەۋ سەكىلدى 4P مەديتسينانىڭ دامۋى ءجۇرىپ جاتىر. گەنومدىق زەرتحانا مەديتسيناداعى وزىق يدەيالاردى ىسكە اسىرۋعا جانە قازاقستاندىق مەديتسينانىڭ تۇتاس دامۋىنا مۇمكىندىك بەرەدى. سونداي-اق يننوۆاتسيالىق تەحنولوگيالاردى ەنگىزۋ جانە دامىتۋ ارقىلى ەلىمىزدەگى دياگنوستيكالىق قىزمەتتىڭ ساپاسىن ارتتىرۋعا بولادى.
زەرتحانانىڭ تاجىريبەسىنە ىسىكتىڭ جاسۋشالارىندا قاتەرلى ىسىكتىڭ دامۋىنا جەتەلەيتىن پاتولوگيالىق گەندەردى انىقتاۋعا مۇمكىندىك بەرەتىن مولەكۋلالىق گەنەتيكا ادىستەرى ەنگىزىلگەن. پاتولوگيالىق گەندى انىقتاۋ ونكولوگيالىق اۋرۋعا شالدىققان پاتسيەنتتىڭ ءومىر ساپاسى مەن ۇزاقتىعىنا وڭ اسەر ەتەتىن دۇرىس ەمدى ۋاقىتىلى تاعايىنداۋعا ىقپال ەتەدى. ء«بىز دنق زەرتتەۋدى, سونداي-اق زەرتتەۋ ناتيجەسىندە الىناتىن سيگنالدىق مولەكۋلا جانە بيوماركەرلەردىڭ ەكسپرەسسيالارىنىڭ ءتۇرلى نۇسقالارىن زەرتتەۋدى ىسكە قوستىق. ءبىر اۋرۋدىڭ ءوزى, ءتىپتى ونكولوگيالىق اۋرۋلار ءار ادامداردا ءارتۇرلى ءوربيدى. بارلىعى تابىلعان مۋتاتسياعا جانە ادام اعزاسىندا پايدا بولاتىن مەتابوليزمدىك ونىمدەرگە بايلانىستى», دەيدى پرەزيدەنت ءىس باسقارماسى مەديتسينالىق ورتالىعى اۋرۋحاناسىنىڭ ديرەكتورى ۆالەري بەنبەرين.
بۇل زەرتتەۋ ارقىلى ەكستراكورپورالدى ۇرىقتاندىرۋ (ەكو) كەزىندە ەمبريونداردى جاتىرعا ورنالاستىرۋدان بۇرىن بويىنا جان كىرمەگەن بالانىڭ دەنساۋلىعىن تولىق تەكسەرۋگە, ياعني حروموسومالىق ەمبريوندارداعى اۋىتقۋلاردى انىقتاۋعا بولادى. سونداي-اق قۇرساققا تابيعي جولمەن بىتكەن نارەستەنىڭ اۋرۋعا بەيىمدىگىن الدىن الا انىقتاۋعا جول اشادى. سول ارقىلى جۇكتى ايەل پەرزەنتىن قۇرساقتا جاتقاندا-اق ەمدەتە الادى نەمەسە اۋىر بولعاندا جۇكتىلىكتى ءۇزۋ جولىن تاڭدايدى.
«ەڭ الدىمەن گەنەتيكالىق تەستتى قاتەرلى ىسىكتىڭ قانداي دا ءبىر تۇرىمەن اۋىرعان تۋىسقاندارى بار ادامدار ءوتۋى كەرەك. ونكولوگيا تۇقىم قۋالامايدى, الايدا قاتەرلى ىسىكتىڭ كەيبىر تۇرلەرى – ءسۇت بەزدەرى, انالىق جىنىس بەزى جانە قۋىقاستى بەزى گەندەگى مۋتاتسياعا بايلانىستى بولادى. بۇل تۇقىم ارقىلى بەرىلۋى مۇمكىن. مۇنداي زەرتتەۋ قاتەردىڭ الدىن الادى. بىراق كەشەندى ەم جۇرگىزۋدىڭ قاجەت ەكەنىن دە ءتۇسىنۋ كەرەك. ياعني, اۋرۋدىڭ دامۋ قاۋپىن انىقتاۋ, پاتسيەنتتى كلينيكالىق ەمدەۋ, الدىن الۋ, پاتسيەنتتىڭ مىندەتتى تۇردە ءوزىنىڭ قاتىسۋى, ونىڭ بولاشاقتا اۋرۋدىڭ الدىن الۋعا دەگەن نيەتى بولۋى كەرەك», دەيدى پرەزيدەنت ءىس باسقارماسىنىڭ مەديتسينالىق ورتالىعى اۋرۋحاناسى دەربەستەندىرىلگەن گەنومدىق زەرتحاناسىنىڭ باسشىسى گۇلشارا ءابىلدينوۆا.
