قۇرىلىس جۇمىستارىنىڭ بارلىعى دەرلىك بەلگىلەنگەن مەرزىمدە اياقتالعان. ۇلتتىق ءال-اۋقات قورى مىندەتىنە العان نىسانداردىڭ قۇرىلىسى تولىق اياقتالعانىن كۇنى كەشە ارىس قالاسىنا ىسساپارمەن كەلگەن «سامۇرىق-قازىنا» ۇاق» اق باسقارما توراعاسى احمەتجان ەسىموۆ ءمالىم ەتتى.
باسقارما توراعاسى الدىمەن ارىس قالاسىنداعى جوندەۋدەن وتكەن, 65 جىلدىق تاريحى بار «اقنۇر» بالاباقشاسىندا بولدى. بالاباقشا مەڭگەرۋشىسى اقبوپە قاينىبەكوۆانىڭ ايتۋىنشا, بۇگىنگى تاڭدا 5 توپتا 120 ءبۇلدىرشىن تاربيەلەنۋدە. ءان, بي سىندى ۇيىرمەلەر جۇمىس ىستەيتىن, ءۇش ءتىلدى ءبىلىم بەرۋگە دەن قويعان بالاباقشادا 31 تاربيەشى قىزمەت ەتەدى. سودان كەيىن, احمەتجان ەسىموۆ قۇرىلىسى تولىعىمەن اياقتالعان تەمىر جول ۆوكزالىنىڭ جۇمىسىمەن تانىستى. قايتا جوندەلىپ, فۋتبول ويىندارى ءوتىپ جاتقان ستاديونعا بارىپ, «ارىس» جانە «ورداباسى» جاستار كومانداسىنىڭ كەزدەسۋىندە دوپتى ويىنعا قوستى. ءىسساپار بارىسىندا تۇركىستان وبلىسىنىڭ اكىمى ومىرزاق شوكەەۆ اپاتتان كەيىنگى ايلاردا اتقارىلعان جۇمىستار جايلى ايتىپ ءوتتى. «توتەنشە جاعدايدان كەيىن 2-3 اي ىشىندە قالا تولىعىمەن قايتا قالپىنا كەلتىرىلدى. وندا 7164 ءۇي قايتا جوندەۋدەن ءوتتى. 400-دەن استام ءۇي بۇزىلىپ قايتا سالىنىپ جاتىر. وقيعا كەزىندە ءبىز حالقىمىزدىڭ بىرلىگىن كوردىك. ەلباسى ساياساتىنىڭ ارقاسىندا مىقتى قوعامنىڭ قالىپتاسقاندىعىن, سونداي-اق مەملەكەتتىڭ الەۋەتىن كوردىك», دەي كەلە وبلىس اكىمى الەۋمەتتىك ينفراقۇرىلىمدى سالۋ جانە قالپىنا كەلتىرۋ جۇمىستارىن جۇرگىزگەنى ءۇشىن «سامۇرىق-قازىنا» ۇاق» اق باسشىلىعىنا العىسىن جەتكىزدى.
سونداي-اق «سامۇرىق-قازىنا» ۇاق» اق باسقارما توراعاسى احمەتجان ەسىموۆ پەن تۇركىستان وبلىسىنىڭ اكىمى ومىرزاق شوكەەۆ ىنتىماقتاستىق تۋرالى مەموراندۋمعا قول قويدى. مەموراندۋمعا ءوڭىردى گازداندىرۋ, ەنەرگەتيكا كەشەنى, ەلەكتروندى ساۋدا مەن پوشتا جەلىسىن, اقپاراتتىق-كوممۋنيكاتسيالىق ينفراقۇرىلىمدى دامىتۋ جانە الەۋمەتتىك نىسانداردى سالۋ سياقتى 9 باعىت كىرەدى. وسىلايشا ارىس جانە تۇركىستان قالالارىن «اقىلدى قالا» (Smart City) سەرۆيستىك ۇلگىسى بويىنشا دامىتۋ كوزدەلىپ وتىر. قور وڭىردەگى 97 مەكتەپ پەن اۋرۋحاناعا دەيىن تالشىقتى-وپتيكالىق بايلانىس جەلىسىن جانە راديوجەلىلەردى سالۋدى, ارىس قالاسىنداعى 12 مەكتەپ, 2 اۋرۋحانا, 2 بالاباقشادا 400 بەينەباقىلاۋ كامەرالارىن جانە 50 «WiFi» نۇكتەسىن ۇيىمداستىرۋدى قامتاماسىز ەتپەك. «قازىرگى تاڭدا تۇركىستاندا قور كومپانيالارىندا 19 مىڭنان اسا قىزمەتكەرى بار 20 كاسىپورىن مەن فيليال جۇمىس ىستەيدى. ەلەكترەنەرگەتيكا, گاز, پوشتا, اقپاراتتىق كوممۋنيكاتسيا جانە ەكونوميكانىڭ باسقا دا سالالارى بويىنشا بىرنەشە جوبالاردى جۇزەگە اسىرۋدا», دەدى احمەتجان ەسىموۆ. ءوز كەزەگىندە ومىرزاق شوكەەۆ بۇل مەموراندۋم الداعى ۋاقىتتا ءوڭىردىڭ الەۋمەتتىك-ەكونوميكالىق دامۋىنا جانە حالىقتىڭ ءال-اۋقاتىن كوتەرۋگە سەپتىگىن تيگىزەتىنىنە سەنىم ءبىلدىردى.
مەموراندۋمنىڭ باسىم بولىگى ساتىپ الۋ ماسەلەسىنە, اتاپ ايتقاندا, يمپورت الماستىرۋ جانە جەرگىلىكتى قامتۋدى دامىتۋعا ارنالعان. قور ۇزاق مەرزىمدى كەلىسىمشارتتار جاساۋ ارقىلى تۇركىستان وبلىسىندا جاڭا وندىرىستەردى قۇرۋدى كوزدەيتىن جوبالارعا قولداۋ كورسەتەدى. ال وبلىس اكىمدىگى ءوز تاراپىنان جاڭا وندىرىستەر قۇرۋ بويىنشا جوبالاردى ىرىكتەۋدى قامتاماسىز ەتەدى. سونىمەن قاتار تاراپتار تۇركىستان وبلىسىنىڭ الەۋمەتتىك سالاسى ماسەلەلەرىن تالقىلادى. بۇل ورايدا قور تسەرەبرالدى سال اۋرۋىنان بالالاردى وڭالتۋ باعىتى بويىنشا الەۋمەتتىك ماسەلەلەردى شەشۋگە, ناۋقاس ادامداردى قاتارعا قوسۋ كابينەتتەرىن ماتەريالدىق-تەحنيكالىق جاراقتاندىرۋعا, سالاماتتى ءومىر سالتى مەن سپورتتى ناسيحاتتاۋعا قارجىلاي قولداۋ كورسەتەدى. ماسەلەن, تۇركىستان قالاسىنداعى امفيتەاتر, وقۋشىلار سارايى, 7000 ورىندىق ستاديون, قوجا احمەت ياساۋي اتىنداعى مۇراجاي, كونگرەسس-حولل, «Smart City» جوباسى سياقتى الەۋمەتتىك نىسانداردى سالۋعا جانە بايلانىس جەلىلەرىن جۇرگىزۋگە جالپى 33,6 ملرد تەڭگە بولىنگەن.
تۇركىستان وبلىسى
