«جاستار - قوعامنىڭ قوزعاۋشى كۇشى. ءاربىر ادام ونىڭ بولاشاعى جاقسى بولعانىن ارماندايدى. ءبىزدىڭ ماقساتىمىز - جاستارعا دامۋ ءۇشىن جاعداي جاساۋ. جاستار جىلى, الداعى ەرىكتىلەر جىلى جانە پرەزيدەنتتىك كادرلىق رەزەرۆكە قابىلداۋ - بۇل قادامداردىڭ بارلىعى ەلىمىزدە جاستار وزدەرىنىڭ ماقساتتارىن جۇزەگە اسىرىپ, باقىتتى بولا الاتىنىن ايتادى», - دەدى بەردىبەك ساپارباەۆ.
قازاقستاندا جاستار جىلىندا 89 ءىرى ءىس-شارا جۇزەگە اسىرىلىپ جاتىر, تۇرعىن ءۇي پروبلەماسىن شەشۋ بويىنشا دا شارالار ازىرلەندى, جاس كاسىپكەرلەر دە قولداۋعا يە بولعان. كەزدەسۋگە ستۋدەنتتەر, جاس كاسىپكەرلەر, جۇمىسشىلار, سپورتشىلار, ەرىكتىلەر جينالدى. جاس كاسىپكەر ءبىرجان يمانوۆ, «ەڭبەك» باعدارلاماسىنىڭ قاتىسۋشىسى الەكساندر كونتسەۆيچ بيزنەستەگى العاشقى قادامدارى تۋرالى ايتىپ بەردى.
پرەمەر-ءمينيستردىڭ ورىنباسارى بەردىبەك ساپارباەۆ پەن قاراعاندى وبلىسىنىڭ اكىمى جەڭىس قاسىمبەك ءوڭىر جۇرتشىلىعىمەن كەزدەستى. ۆيتسە-پرەمەر «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەل پرەزيدەنتىنىڭ العا قويعان مىندەتتەرىن ىسكە اسىرۋ جونىندەگى شارالار تۋرالى ايتىپ بەردى.
كەزدەسۋگە سونداي-اق دەنساۋلىق ساقتاۋ ءمينيسترى ەلجان ءبىرتانوۆ, ءبىلىم جانە عىلىم ءمينيسترى اسحات ايماعامبەتوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قاتىستى.
«قوعامدىق كەلىسىم بولعان كەزدە وڭ ناتيجە دە, ءال-اۋقات تا, گۇلدەنۋ دە بولادى. پرەزيدەنت قاسىم-جومارت توقاەۆ بۇل ماسەلەگە ۇلكەن نازار اۋدارادى. بۇل مەملەكەت پەن قوعامنىڭ اراسىنداعى ديالوگقا قاتىستى. مۇندا ۇكىمەتتىك ەمەس ۇيىمداردىڭ الەۋەتىن تارتۋ كەرەك. ەل ۇكىمەتى ەكى تۇجىرىمدامانى ازىرلەۋدە: «تىڭداۋشى مەملەكەت» جانە ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسى. ولار اعىمداعى جىلدىڭ سوڭىنا دەيىن دايىن بولۋى ءتيىس. بۇل قۇجاتتاردا اشىق ۇكىمەت جانە حالىقپەن ءتيىمدى كەرى بايلانىس ماسەلەلەرى قوزعالادى. ازاماتتاردىڭ بىردە-ءبىر ءوتىنىشى, بىردە-ءبىر شاعىمى جاۋاپسىز قالماۋى كەرەك», - دەپ اتاپ ءوتتى بەردىبەك ساپارباەۆ
ۆيتسە-پرەمەر قوعامدىق كەڭەستەردىڭ قىزمەتىن كۇشەيتۋ قاجەتتىگىن اتاپ ءوتتى. دارىندى بالالاردى قولداۋ كارتاسى, بالالار مۇددەسىن قورعايتىن 2030 جىلعا دەيىنگى قر مەملەكەتتىك ساياساتىنىڭ تۇجىرىمداماسى ازىرلەنەتىن بولادى. 2019 جىلدىڭ سوڭىنا دەيىن جيناقتاردىڭ كىرىستىلىگىن ارتتىرۋ ماقساتىندا زەينەتاقى اكتيۆتەرىن ينۆەستيتسيالاۋ تاسىلدەرىن قايتا قاراۋ جوسپارلانىپ وتىر.
سونىمەن قاتار پرەمەر-ءمينيستردىڭ ورىنباسارى بەردىبەك ساپارباەۆ گ. گولوۆكين اتىنداعى قاراعاندىلىق سپورت كەشەنىندە بولدى. وندا جاس سپورتشىلار GGG قولداۋ ماقساتىندا فلەشموب وتكىزدى. 6 قازاندا نيۋ-يوركتىڭ بەلگىلى ارەناسىندا الەمگە ايگىلى قاراعاندىلىق گەننادي گولوۆكين ۋكرايندىق سەرگەي دەرەۆيانچەنكومەن جەكپە-جەك وتكىزەدى. بىلعارى قولعاپ شەبەرلەرىنىڭ شايقاسىندا بايگەگە IBF جانە IBO نۇسقالارى بويىنشا ورتا سالماقتاعى الەم چەمپيونى اتاعى تىگىلدى.
ۆيتسە-پرەمەر سپورت كەشەنىنىڭ تاربيەلەنۋشىلەرىنە قولداۋ كورسەتىپ, جەرلەسىمىز قازاقستاننىڭ داڭقىن تاعى ءبىر مارتە اسقاقتاتىپ, جەڭىسكە جەتۋىن تىلەدى. ال جاس سپورتشىلاردىڭ اتا-انالارىنا بالالاردىڭ دەنە شىنىقتىرۋداعى جەتىستىكتەرى مەن رۋحاني-ادامگەرشىلىك تاربيەسىنە كوبىرەك كوڭىل ءبولۋىن تىلەدى.
ء«بىز وعان بارىنشا قولداۋ كورسەتەمىز, ساتتىلىك پەن جەڭىس تىلەيمىز. گەننادي تاعى دا الەمنىڭ ۇزدىك بوكسشىلارىنىڭ ءبىرى ەكەنىن دالەلدەۋى ءتيىس. بالالارىڭىزدىڭ سپورتپەن اينالىساتىنى قۋانتادى. ەگەر ولار سپورتقا, ونەرگە تارتىلسا, ءتۇرلى ۇيىرمەلەر مەن سەكتسيالارعا قاتىسسا, وندا دەنى ساۋ, تاربيەلى, ءبىلىمدى بولادى, ەڭ باستىسى – قۇقىق بۇزۋشىلىق ارەكەتتەرگە بارمايدى. بىزدە كوپتەگەن سپورتتىق جانە مادەني نىساندار بار. ولاردى بارىنشا پايدالانۋ كەرەك, جاستاردى سالاۋاتتى ءومىر سالتىنا جاپپاي جۇمىلدىرۋ كەرەك. ال اتا-انالار بۇعان ىقپال ەتۋى ءتيىس», - دەدى ب. ساپارباەۆ جاس قاراعاندىلىقتاردىڭ اتا-انالارىمەن كەزدەسۋى بارىسىندا.
ۆيتسە-پرەمەر اۋىر اتلەتيكا, كۇرەس, باسكەتبول زالدارىن جانە ءجۇزۋ باسسەينىن ارالاپ كوردى.
