فرانتسيانىڭ ەۋروپالىق جانە سىرتقى ىستەر مينيسترلىگىنىڭ مەملەكەتتىك حاتشىسى, ەكونوميكالىق ىنتىماقتاستىق بويىنشا قازاق-فرانتسۋز ۇكىمەتارالىق كوميسسياسىنىڭ تەڭ توراعاسى جان-باتيست لەمۋانمەن كەزدەسۋدە تاراپتار ەكىجاقتى فورماتتا جانە كوپجاقتى الاڭدارداعى ءوزارا ىقپالداستىق ماسەلەلەرىن كەڭىنەن تالقىلادى.
فرانتسيانىڭ بۇرىنعى پرەزيدەنتى جاك شيراكتىڭ قايتىس بولۋىنا بايلانىستى رەسمي ازا تۇتۋ راسىمدەرىنە قاتىسقان ر.ۆاسيلەنكو پرەزيدەنت قاسىم-جومارت توقاەۆتىڭ كوڭىل ايتۋىن جەتكىزىپ, كورنەكتى ساياساتكەردىڭ حالىقارالىق قاتىناستار تاريحىنداعى ەرەكشە ورنىن جانە ونىڭ قازاق-فرانتسۋز قاتىناستارىنىڭ دامۋىنا قوسقان ايتارلىقتاي ۇلەسىن اتاپ ءوتتى.
كەلىسسوزدەر بارىسىندا بارلىق ماڭىزدى باعىتتار بويىنشا ەكىجاقتى ستراتەگيالىق سەرىكتەستىكتى ودان ءارى تەرەڭدەتۋ ماسەلەلەرىنە اسا دەن قويىلدى. سونىمەن قاتار فرانتسيا پرەزيدەنتى ەممانيۋەل ماكروننىڭ الداعى ۋاقىتتا قازاقستانعا جوسپارلانعان ساپارىنا دايىندىق اياسىندا ىنتىماقتاستىققا جاڭا سەرپىن بەرەتىن باسىمدىققا يە جوبالاردى ىسكە اسىرۋ بارىسى قاراستىرىلدى.
ر.ۆاسيلەنكو قازاقستاندىق تاراپتىڭ ءوزارا ءىس-قيمىل سپەكترىن كەڭەيتۋگە, ونىڭ ىشىندە تسيفرلاندىرۋ, اۋىل شارۋاشىلىعى, بالامالى ەنەرگەتيكا سياقتى جاڭا سالالاردى ارتتىرۋعا باعىتتالعانىن راستادى. وسى باعىتتاعى جۇمىستىڭ سوڭعى ۋاقىتتاعى ءپوزيتيۆتى مىسالدارى رەتىندە فرانتسيانىڭ ايماقتارىندا بيىل قازاقستان ەلشىلىگى ۇيىمداستىرعان شارالار اتاپ ءوتىلدى: ناۋرىز ايىندا كاننداعى تسيفرلاندىرۋ جانە بالامالى ەنەرگەتيكا بويىنشا فورۋم, قىركۇيەكتەگى رەنن قالاسىنداعى اۋىلشارۋاشىلىق جانە اگروونەركاسىپ فورۋمى بولدى, سونداي-اق 8 قازاندا پاريجدە قازاقستان رەسپۋبليكاسى پرەمەر-ءمينيسترىنىڭ ورىنباسارى رومان سكلياردىڭ قاتىسۋىمەن وتەتىن ينۆەستيتسيالىق فورۋمى. ءىس-شارالار فرانتسۋز ىسكەر توپتارى اراسىندا ۇلكەن قىزىعۋشىلىق تۋدىردى جانە ىسكەرلىك بايلانىستار ورناتۋدىڭ تاماشا الاڭىنا اينالدى.
نۇر-سۇلتان مەن پاريج ءبىلىم سالاسىنداعى ىنتىماقتاستىقتى كەڭەيتۋگە ۇلكەن ءمان بەرۋدە. 1993 جىلدان باستاپ تۇڭعىش پرەزيدەنت - ەلباسى نۇرسۇلتان نازارباەۆتىڭ «بولاشاق» ستيپەنديالىق باعدارلاماسى جۇمىس ىستەيدى. 2014 جىلدىڭ جەلتوقسان ايىنان باستاپ ءبىزدىڭ ەلىمىزدە «سوربوننا-قازاقستان» ينستيتۋتى ءوز جۇمىسىن اتقارىپ كەلەدى. وتكەن جىلدان باستاپ ماگيسترانتتار مەن اسپيرانتتاردىڭ «اباي-ۆەرن» قازاق-فرانتسۋز ستيپەندياسىنىڭ قۇرىلۋىنا بايلانىستى ەلدەرىمىزدىڭ اكادەميالىق ۇتقىرلىعى ارتتى.
