ەڭ الدىمەن ەلىمىزدىڭ تاۋەلسىزدىك ءتاجىن كيگەننەن بەرگى تورتكۇل دۇنيەنى تەگىس تامسانتقان ءوسۋ-وركەندەۋ جولىن اتاپ ايتپاسقا بولمايدى. بۇل رەتتە قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ كەمەڭگەر دە كورەگەن ساياساتىنا ءتانتىمىز. العاشقى جىلداردان باستاپ ءبىرتۇتاس قازاق ەلى الەمدەگى بەدەلدى ءارى ورنىقتى مەملەكەتكە اينالدى. جۇدىرىقتاي جۇمىلعان تۇتاستىعىمىزدىڭ ارقاسىندا ەلىمىزدىڭ الەۋمەتتىك-تۇرمىستىق جاعدايى جاقسارىپ, بولاشاقتىڭ جولى باياندى بولا ءتۇستى. ەڭ باستىسى, بەيبىت ەلىمىزدىڭ دامۋ جولى بارشا الەم جۇرتشىلىعىنىڭ نازارىنا ىلىكتى.
قازاق ەلىن مەكەندەيتىن جۇزدەگەن ەتنوستاردىڭ اراسىنداعى قارىم-قاتىناستىڭ دانەكەر ءجىبى بۇرىنعىدان بەتەر نىعايا ءتۇستى.
ماسەلەن, ءبىزدىڭ كوكشەتاۋ مەن قاراوتكەل ءوڭىرىن مەكەندەيتىن ات توبەلىندەي عانا چۋۆاش ەتنوسىنىڭ وكىلدەرى ەل ەگەمەندىگىن العانشا ءبىرىن-ءبىرى تۋىس تۇتىپ, اعايىن ساناپ ىزدەي قويعان جوق ەدى. ەگەمەندىك بىزگە ەڭ الدىمەن ءوز ۇلتىمىزدى, ونىڭ تاريحىن, بۇگىنگى بولمىسىن تانىپ-بىلۋگە, ەرتەڭگى كەلەشەگىنە سەنىممەن قاراۋعا, نىق باسىپ, العا ۇمتىلۋعا مۇمكىندىك بەردى. جاسىراتىنى جوق, بۇرىن ورىس تىلىندە سويلەپ, ورىس تىلىندە ويلاپ كەلگەن بولاتىنبىز. ءوزىمىزدىڭ چۋۆاش ەكەنىمىزدى بىلسەك تە, ءتىلىمىزدى, ءدىلىمىزدى ۇمىتتىق. ەلىمىزدىڭ ەگەمەندىك الۋى ءبىزدىڭ چۋۆاش ۇلتى ءۇشىن ۇلتتىق بولمىسىمىزدى وزىمىزگە قايتارعاندىعىمەن قىمبات. تاۋەلسىزدىكتىڭ بىزگە بەرگەن ءبىر سىيى سول.
قازىر كوكشەتاۋ قالاسىندا چۋۆاش مادەني ورتالىعى ءوز انا ءتىلىن وقىتۋ جۇمىستارىن جانداندىرىپ وتىر. جالعىز ءوز ءتىلىمىزدى عانا ەمەس, قازاق ءتىلىن دە وقىپ ۇيرەنۋدەمىز. الداعى ۋاقىتتا لاتىن گرافيكاسىنا كوشەتىن بولعاندىقتان, ءبىزدىڭ ورتالىق وقىپ ۇيرەنۋ جۇمىستارىنىڭ باستى ءبىر باعىتىن وسى ماسەلەگە بۇرىپ وتىر. ءتىلدى ۇيرەنۋ ارقىلى ءبىز جەرگىلىكتى ۇلتتىڭ سان عاسىر بويى وزىمەن بىرگە جاساسىپ كەلە جاتقان ادەمى ادەت-عۇرپىن, سالت-ءداستۇرىن ۇيرەنۋگە ۇمتىلۋدامىز. وبلىستا وتەتىن شارالاردان سىرت قالمايمىز. ءبىزدىڭ چۋۆاشتىڭ قىز-كەلىنشەكتەرىن قازاقتىڭ قول ونەرى كەرەمەت قىزىقتىرادى. شىنتۋايتىنا كەلگەندە, ارعى تامىرىمىز ءبىر بولعاندىقتان, قولونەرىمىزدە دە, اس ءمازىرىن دايىنداۋدا دا, جالپى, تۇرمىس-سالتىمىزدا كوپتەگەن ۇقساستىق بار. ويتكەنى ءبىز اتا سالتىنىڭ ءتۇبى ءبىر اعايىن ەلمىز.
جولداۋدا ەل پرەزيدەنتى الەۋمەتتىك جانە ەتنوستىق توپتار اراسىنداعى كەلىسىم بۇكىل قوعامنىڭ بىرلەسكەن ەڭبەگىنىڭ ناتيجەسى دەپ وتە دۇرىس ايتتى. ۇلى دوستىق ۇلكەن توپتىڭ, ۇلكەن جۇرەكتى ادامداردىڭ عانا قولىنان كەلەدى. الداعى ۋاقىتتا ءبىزدىڭ چۋۆاش ورتالىعى ەل بىرلىگىن نىعايتا ءتۇسۋ ءۇشىن قىزمەت ەتەتىن بولادى.
ەلەنا ماششينسكايا,
اقمولا وبلىستىق ءماسليحاتىنىڭ دەپۋتاتى, چۋۆاش مادەني ورتالىعىنىڭ جەتەكشىسى
