جاڭا نىساننىڭ اشىلۋ سالتاناتىنا قاراعاندى وبلىستىق سوتىنىڭ توراعاسى نۇرسەرىك ءشارىپوۆ, بالقاش قالاسىنىڭ اكىمى وراز تاۋىربەكوۆ, سوت اكىمشىسىنىڭ ورىنباسارى ماقسات يسين, پروكۋرورلار, ادۆوكاتتار, مەدياتورلار جانە بيلەر كەڭەسىنىڭ مۇشەلەرى قاتىستى.
– باستى ماقسات – سوت قىزمەتىنىڭ اشىقتىعى مەن جاريالىلىعىن قامتاماسىز ەتىپ, ازاماتتاردى قابىلداۋ بويىنشا قولايلى جاعداي جاساۋ, – دەدى وبلىستىق سوتتىڭ توراعاسى.
سونىمەن قاتار ول جاڭا جۇمىس ءپىشىمىن ەنگىزۋ ازاماتتاردىڭ سوت جۇيەسىنە دەگەن سەنىم دەڭگەيىن ارتتىرۋعا, سوتقا جۇگىنۋ كەزىندە اكىمشىلىك كەدەرگىلەردى جويۋعا مۇمكىندىك بەرەتىندىگىن اتاپ ءوتتى.
فرونت-كەڭسەدە اقپاراتتىق ورتالىق, كۇتۋ زالى, كىرىس حات-حابارلار مەن وزىنە-ءوزى قىزمەت كورسەتۋ ايماعى, ازاماتتىق ىستەردى قاراۋعا ارنالعان سوت وتىرىسى زالى بار. بۇل جەردە مەدياتورلار مەن ادۆوكاتتارعا ارنالعان جەكە كابينەتتەر قاراستىرىلعان. سونىمەن قاتار نىسنادا wi-fi جۇيەسى جۇمىس ىستەيدى, گادجەتتەر ءۇشىن زاريادتاۋ قۇرىلعىلارى ورناتىلعان. وزىنە-ءوزى قىزمەت كورسەتۋ سەكتورىندا ازاماتتار «سوت كابينەتى» اج قىزمەتىن ەركىن پايدالانا الادى.
ەسكە سالساق, ءدال وسىنداي فرونت-كەڭسەلەر قاراعاندى, شاحتينسك قالالارى مەن اباي, وساكاروۆ اۋداندارىنىڭ سوتتارىندا جۇمىس ىستەيدى.
قاراعاندى وبلىسى
