بۇل بيزنەس-فورۋم شەتەلدە تۇراتىن قانداستارمەن بايلانىس ورناتۋ جانە نىعايتۋ جونىندەگى دقق جانە قور باعدارلامالارى اياسىندا ءوتتى. ۇيىمداستىرۋشىلار وزبەكستانداعى قازاق دياسپوراسى وكىلدەرىمەن ىسكەرلىك قارىم-قاتىناس ورناتۋدى باستى ماقسات تۇتتى.
بيزنەس-فورۋمعا قاتىسۋشى ىسكەر وتانداستاردى الدىمەن دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ قۇتتىقتاپ, بيزنەس-فورۋم وتكىزۋدىڭ ماقساتى مەن ميسسياسىن ءتۇسىندىردى. سونىمەن قاتار, ەكى ەل اراسىنداعى عاسىرلار بويى قالىپتاسقان باۋىرلاستىقتى ودان ءارى نىعايتۋ ءۇشىن ىسكەرلىك بايلانىستاردى كۇشەيتۋ كەرەك ەكەندىگىن العا تارتتى. زاۋىتبەك قاۋىسبەك ۇلى دۇنيەجۇزى قازاقتارىنىڭ قاۋىمداستىعى مەن وتانداستار قورى قىزمەتتەرىنىڭ نەگىزگى باعىتتارىن, سونداي-اق شەتەلدەگى دياسپورامەن جۇمىس ىستەۋ جونىندەگى نەگىزگى جوبالاردى ايتىپ ءوتتى.
اتالعان ءىس شاراعا قر وزبەكستانداعى وكىلەتتى ەلشىسى ساتىبالدى دارحان ارنايى كەلىپ, وتانداستار قورىنىڭ ۇيىمداستىرۋىمەن وزبەكستانداعى قانداستار اراسىندا العاش رەت وتكىزىلگەن بيزنەس-فورۋمنىڭ وتۋىمەن قاتىسۋشىلاردى قۇتتىقتادى.
وزبەكستانداعى قازاق مادەني ورتالىعىنىڭ توراعاسى سەرىكباي ۇسەنوۆ وزبەكستان رەسپۋبليكاسىنداعى قازاق دياسپوراسى وكىلدەرىنىڭ ەكونوميكالىق مۇمكىندىكتەرى جايىندا ءسوز قوزعاپ, ىسكەر قانداستاردىڭ نەگىزگى كاسىپ سالالارىن جانە قازاقستانمەن ىسكەرلىك بايلانىستى نىعايتۋعا الدىمەن ساۋدا-ساتتىقتى كۇشەيتۋ قاجەت ەكەنىن العا تارتتى.
سونداي-اق, ءىس-شاراعا قازاقستاننان ارنايى كەلگەن ۇلتتىق قولونەرمەن اينالىساتىن «جۋسان» كاسىپكەرلەر بىرلەستىگىنىڭ توراعاسى توعاباي نۇرمۇرات ۇلى جانە «ەل تىرەگى» قازاقستاندىق شاعىن جانە ورتا بيزنەس قاۋىمداستىعىنىڭ توراعاسى اسقار ابۋباكىروۆ وزدەرىنىڭ ناقتى ىسكەرلىك جوبالارىمەن تانىستىردى.
بيزنەس-فورۋم بارىسىندا دۇنيەجۇزى قازاقتارىنىڭ قاۋىمداستىعى توراعاسىنىڭ ورىنباسارى ارعىن وسپانوۆ جانە وتانداستار قورى پرەزيدەنتىنىڭ كەڭەسشىسى ديدار بولات شاراعا قاتىسۋشىلارمەن ءوزارا ءىس-قيمىل تەتىكتەرىن, شاعىن جانە ورتا بيزنەس سالاسىنداعى بيزنەس-باستامالاردى ىنتالاندىرۋ, سونداي-اق ستارتاپتاردى قولداۋ جانە دامىتۋ تەتىكتەرىن تالقىلادى. توقىما ونەركاسىبىنىڭ, اۋىل شارۋاشىلىعىنىڭ, قىزمەت كورسەتۋ سالاسىنىڭ دامۋىنا, تەحنولوگيالىق وندىرىستەردى قۇرۋعا نەگىزدەلگەن وزبەكستان نارىعىنىڭ بەيىنىن ەسكەرە وتىرىپ, وسى سالالارعا باسا نازار اۋدارىلدى. فورۋم قاتىسۋشىلارىنا قازاقستان وبلىستارىنىڭ ينۆەستيتسيالىق الەۋەتى تانىستىرىلدى.
فورۋم جۇمىسىنا 50-دەن استام ادام قاتىستى. قاتىسۋشىلارعا وزدەرىن قىزىقتىراتىن ستارتاپتار, بيزنەس-باستامالار, قولدا بار جوبالار تۋرالى ايتىپ, سپيكەرلەرگە سۇراقتار قويىپ, بيزنەس جوسپارلار مەن باستامالاردى قازاقستاندا, سونداي-اق حالىقارالىق نارىقتا جىلجىتۋ مۇمكىندىكتەرىن اڭگىمەلەدى.
فورۋم سوڭىندا دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك قاۋىسبەك ۇلى وزبەكستاندا تۇراتىن قانداستاردى دقق مەن وتانداستار قورىنىڭ ۇسىنىستارعا اشىق جانە تۇراتىن مەكەن-جايىنا قاراماستان بارلىق وتانداستارمەن "بايلانىستا" تۇرعانىن, ول ءۇشىن بارلىق وزەكتى ماسەلەلەر بويىنشا كەڭەس بەرەتىن جانە اقپاراتتىق قولداۋ كورسەتەتىن وتانداستار ماسەلەلەرى جونىندەگى ارنايى بىرىڭعاي بايلانىس ورتالىعى قۇرىلعانىن ايتتى.
تاشكەنتتەگى بيزنەس-فورۋم تامىز ايىندا سان-فرانتسيسكو قالاسىندا وتكەن فورۋمنان كەيىنگى ءتورتىنشى وسىنداي شارا بولىپ تابىلادى. ءتۇرلى ەلدەردە تۇراتىن وتانداستارمەن 8 ەلدە (گفر, اقش, ۇلىبريتانيا, شۆەتسيا, قىتاي حالىق رەسپۋبليكاسى, وزبەكستان, تۇركيا جانە رەسەي) بيزنەس-فورۋمدار وتكىزۋ جوسپارلانعان, كەلەسى بيزنەس-فورۋم 2019 جىلى 20 قىركۇيەكتە لوندون قالاسىندا ( ۇلىبريتانيا) وتەدى.
