مامىر ايىندا قوستانايدا وتكەن قازاقستان-رەسەي جاستارىنىڭ فورۋمىندا «ۇلتتىق ەرىكتىلەر جەلىسى» ۇيىمىنىڭ ءتورايىمى ۆەرا كيم 2020 جىلدى ەرىكتىلەر جىلى دەپ جاريالاۋدى ۇسىندى. مەملەكەت باسشىسى قاسىم-جومارت توقاەۆ بۇل ۇسىنىستى قولدايتىنىن اتاپ وتكەن. «قر پرەزيدەنتى رەتىندە مەن ارقاشان ۆولونتەرلاردىڭ قوزعالىسىن قولدايتىنىمدى جەتكىزەمىن. سوندىقتان سىزدەردىڭ كەلەسى جىلدى ۆولونتەرلار قوزعالىسىنىڭ جىلى دەپ جاريالاۋ تۋرالى ۇسىنىستارىڭىزدى تولىعىمەن قولدايمىن. ەرىكتىلەر - جانى تازا ادامدار. ولار - ەلدىڭ شىنايى پاتريوتى, سول ءۇشىن دە قۇرمەتىم شەكسىز. بەلسەندى ازاماتتىق ۇستانىمدارىڭىز مەملەكەتتىڭ دامۋىنا ايتارلىقتاي سەپتىگىن تيگىزەتىنى ءسوزسىز», - دەدى پرەزيدەنت. كوپ ۇزاماي, 2020 جىل قازاقستاندا ۆولونتەر جىلى دەپ جاريالاندى. 26 تامىزدا مەملەكەت باسشىسى قاۋلىعا قول قويدى. ول بويىنشا ۇكىمەتكە ۆولونتەر جىلىن وتكىزۋ بويىنشا قاجەتتى شارالار قابىلداۋدى تاپسىردى.
2016 جىلى 22 جەلتوقساندا وتكەن سەنات وتىرىسىندا «ەرىكتىلەر قىزمەتى تۋرالى» زاڭ قابىلداندى. زاڭدا كورسەتىلگەندەي ەرىكتىلەر قىزمەتى – جەكە تۇلعالارعا, كاسىپورىن - كومپانيالارعا, الەۋمەتتىك توپتارعا كومەك كورسەتۋ, قورشاعان ورتانى قورعاۋ, ازاماتتىق پوزيتسيانى قالىپتاستىرۋ, ءوزىن-ءوزى ۇيىمداستىرۋ, الەۋمەتتىك جاۋاپكەرشىلىك, ءوزارا كومەك كورسەتۋ جانە قوعامدا قايىرىمدىلىق جاساۋ.
«ۇلتتىق ەرىكتىلەر جەلىسى» جەتەكشىسى ۆەرا كيمنىڭ ايتۋىنشا, 19-باپتان تۇراتىن زاڭدا ۆولونتەر دەگەنىمىز كىم, ولاردىڭ قىزمەتىن مەملەكەتتىك تۇرعىدا رەتتەۋ, ۆولونتەر جۇمىسىن ۇيىمداستىرۋ جانە قازاقستان رەسپۋبليكاسىنىڭ ۆولونتەرلىك قىزمەت تۋرالى زاڭناماسىن بۇزعانى ءۇشىن جاۋاپتىلىق سىندى كوپتەگەن ماڭىزدى دۇنيەلەر كەلتىرىلگەن.
جىل وتكەن سايىن ەرىكتىلەرگە ەرەكشە كوزقاراس قالىپتاسۋدا. سونىڭ ءبىرى جاقىندا عانا ەرىكتىلەر قاۋىمىنىڭ قۋانىشىنا سەبەپ بولعان 50 مىڭ تەڭگە. ەرىكتىلىككە اركىم ءوز ەركىمەن كەلگەنىمەن, ەل ۇكىمەتى ەتكەن ەڭبەكتى ەلەگەنى ەرىكتىلەرگە جىگەر سىيلاعانى انىق.
قر ءبىلىم جانە عىلىم مينيسترلىگى مەن قر اقپارات جانە قوعامدىق دامۋ مينيسترلىگى «الەۋمەتتىك ستۋدەنتتىك كرەديت» جوباسىن ىسكە اسىرۋ ماقساتىندا ىنتىماقتاستىق تۋرالى مەموراندۋمعا قول قويدى. بالالار ۇيىنەن باستاپ, الەۋمەتتىك مەكەمەلەردە جانە ءارتۇرلى شارالار بارىسىندا ۆولونتەر بولعان ستۋدەنتتەر اتالعان جوبا اياسىندا سىياقى الاتىن بولادى. «الەۋمەتتىك ستۋدەنتتىك كرەديت» جوباسى وسى جىلدىڭ قىركۇيەك ايىندا جۇزەگە اسادى. «Qazvolunteer.kz» ۆولونتەرلەردىڭ بىرىڭعاي ينتەرنەت تۇعىرناماسىندا جوباعا قاتىستى بارلىق اقپارات شىعادى. اقپارات جانە قوعامدىق دامۋ ۆيتسە-ءمينيسترى دانيار ەسيننىڭ ايتۋىنشا, «Qazvolunteer.kz» بىرىڭعاي پلاتفورماسى قازاقستاننىڭ ۆولونتەرلەرى مەن ۆولونتەرلىك ۇيىمدارىنىڭ قىزمەتىن ۇيلەستىرۋگە, ۆولونتەرلىك جوبالارعا اقپاراتتىق قولداۋ كورسەتۋگە مۇمكىندىك بەرەدى. اتالعان پلاتفورماعا 800 ەرىكتى مەن 70 ۇيىم تىركەلىپ ۇلگەرگەن.
قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆتىڭ ايتۋىنشا, اتالعان جوبا جۇزەگە اسسا, ستۋدەنت-ەرىكتىلەردىڭ وقۋ اقىسىن تولەۋىنە تاپتىرماس مۇمكىندىك بولماق. جەكەمەنشىك, مەملەكەتتىك ۋنيۆەرسيتەتتە ءبىلىم الىپ جاتقان ءاربىر ستۋدەنت بۇل جوباعا قاتىسۋعا قۇقىعى بار. «ەرىكتىلەر تاڭداۋىنا ۆاۋچەردىڭ ەكى كرەديتتى جانە بەس كرەديتتى ەكى ءتۇرى ۇسىنىلادى. ەرىكتى ەكى كرەديتتى ۆاۋچەرگە 20 مىڭ تەڭگە الىپ, ءتيىستى باعدارلامانى ورىندايدى. 5 كرەديتتى باعدارلاما بويىنشا ەكى كرەديتكە قاراعاندا كوبىرەك جۇمىس ىستەۋگە تۋرا كەلەدى», – دەدى ول.
الەۋمەتتىك ستۋدەنتتىك ۆاۋچەر قوعام ءۇشىن پايدالى ىسپەن اينالىساتىن ستۋدەنتتەرگە مىنا باعىتتار بويىنشا ۇسىنىلادى:
ينكليۋزيۆتى ءبىلىم بەرۋ;
رەپەتيتورلىق (قازاق ءتىلى, اعىلشىن ءتىلى, كومپيۋتەرلىك ساۋاتتىلىق);
دەۆيانتتى مىنەز-ق ۇلىقتى كامەلەتكە تولماعان بالالارمەن جۇمىس;
اۋلا جانە سپورت كلۋبتارىن ۇيىمداستىرۋ;
قارت ادامدارعا الەۋمەتتىك كومەك كورسەتۋ.
كۇزدە جۇزەگە اساتىن باعدارلامامەن 50 مىڭ ستۋدەنتتى قامتۋ جوسپارلانعان.
بۇگىنگى تاڭدا ەلىمىزدىڭ تۇكپىر-تۇكپىرىندە 200 ۆولونتەرلىق ۇيىم جۇمىس ىستەيدى. سولاردىڭ ءبىرى – «ەرىكتىلەر ليگاسى» قوعامدىق قورى. 2014 جىلى قۇرىلعان قوردىڭ بۇگىنگى تاڭدا 2860 ۆولونتەرلىق بازاسى بار. الەۋمەتتىك, دەنساۋلىق, ءبىلىم, ەكولوگيالىق باعىت جانە ءوز-ءوزىن دامىتۋ سالالارى بويىنشا 10 مىڭنان اسا ەرىكتى جۇمىس ىستەيدى. قوعامدىق ۇيىم ءتورايىمى ايسۇلۋ ەرنيازوۆانىڭ ايتۋىنشا, قور Otbasym, Shabytym, Tabysym, Qazynam, Qulynym, Kúsh-qýatym جانە Ólkem اتتى 8 سالاعا ءبولىنىپ, ناقتى بەكىتىلگەن ءىس-شارالارمەن جۇمىس ىستەيدى.
ايجان ماراتقىزى الماتى قالاسىنداعى №15 گيمنازياسىندا 11-سىنىپتا وقيدى. بولاشاقتا تۋريزم باعىتىنا بەت بۇرعىسى كەلەدى. ايجان وسى جىلدىڭ 18 ناۋرىزىنان باستاپ ءومىرىنىڭ جاڭا ءبىر كەزەڭىن باستادى. ول – ەرىكتى. ياعني, اينالىسىنداعى ادامدارعا پايدامدى تيگىزسەم دەيتىن ۆولونتەر بولدى. ونىڭ ايتۋىنشا, ءاربىر ەرىكتىنىڭ باستى مىندەتى – ءوز ەركىمەن كومەكتەسۋ. كەيىپكەرىمىز 16 جاسىنان باستاپ «ەرىكتىلەر ليگاسى» قوعامىنىڭ ءبىر مۇشەسى اتانىپ, باس كوورديناتورلاردان كەلگەن تاپسىرمالاردى تىڭعىلىقتى ورىنداۋعا تىرىسادى.
«ەرىكتى بولعاننان كەيىن ءار ءىس شاراعا قاتىسۋعا تىرىسامىن. ناۋرىز ايىنان باستاپ وتە كوپ قىزىقتى ءىس شارالار بولدى. مەن ءۇشىن ەڭ قىزىقتى جوبا – Almaty Marathon. سەبەبى بۇل مەن قاتىسقان ەڭ العاش اۋقىمدى جوبا ەدى», دەيدى ايجان ماراتقىزى. ال ەرىكتى بولۋدىڭ قانداي ارتىقشىلىقتارى بار دەگەنىمىزدە, كەيىپكەرىمىز بىلاي دەپ جاۋاپ بەردى: «كەز كەلگەن جوبادا جۇرگەندەگى ويىم «الەمدى مەيىرىم قۇتقارادى». بوس ۋاقىتىڭدى ءتيىمدى پايدالانىپ, جوبالاردى جۇزەگە اسىرىپ جۇرگەنىڭ – ۇلكەن تاجىريبە. بۇل جەردە الار تاجىريبەم ۇلكەن ومىرگە نىق قادام باسۋعا بىردەن ءبىر كوپىر دەسەم دە بولادى», دەيدى ايجان.
ايجان العاش رەت ەرىكتى رەتىندە الماتى ارباتىندا بولعان ءىس-شارادا بالالارعا ءتاتتى تاراتىپ, كوڭىلىن اۋلادى. سول ساتتەن باستاپ «بولاشاقتا بالالاردى قۋانتاتىن كوپتەگەن شارالارعا باستاماشى بولسام» دەگەن ماقسات قويدى. جاقىندا ول ءوزىنىڭ «ستان ستارشيم درۋگوم» اتتى ءوز جوباسىن باستادى. بۇل جوبانىڭ ماقساتى – بالالار ۇيىندەگى بالالاردىڭ باقىتىنا سەبەپ بولۋ.
«شىلدە ايىندا №1 بالالار ۇيىندەگى بالالارمەن بىرگە مۋزەيگە باردىق. قورقىنىش بولعانى راس. سەبەبى بۇل باستامام ىسكە اسقانشا كەدەرگىگە كەزىكتىك. ءبىر عانا كۇنىمدى سول بالالارمەن وتكىزۋ بارىسىندا ماقساتتارىم ايقىندالعانداي, ولار ماعان سەنىم بەردى. بۇل تەك باستاماسى, الدا تالاي قادامدار بولادى. «ەرىكتىلەر ليگاسى» كىشكەنتاي عانا قالاۋىمىز جۇزەگە اسىپ, ۇلكەن ماقساتتارعا سەرپىن بەرۋدە, دەيدى ايجان ماراتقىزى.
ەرىكتى بولۋ – ەرلىكپەن تەڭ. ءسوز سوڭىندا ايتارىمىز. ەرىكتىلەردىڭ ەرەن ەڭبەگى اقتالىپ, ازاماتتىق قوعام دامۋىندا بەلسەندىلىك جاڭا دەڭگەيگە كوتەرىلەتىنىنە سەنىم مول. ءاربىر قازاقستاندىقتىڭ بويىندا بەلسەندى ءومىر سۇرۋگە داعدى قالىپتاسسا الىنبايتىن اسۋ جوق.
