ونىڭ قۇرامىنا سەنات دەپۋتاتتارى, جاۋاپتى مينيسترلىكتەر مەن ۇكىمەتتىك ەمەس ۇيىمداردىڭ وكىلدەرى قاتىستى. جۇمىس توبىنا باتىس قازاقستان وبلىسىنان سايلانعان سەناتور ناريمان تورەعاليەۆ جەتەكشىلىك ەتەدى.
وتىرىسقا قاتىسۋشىلاردىڭ ايتۋىنشا, كەيىنگى كەزدە جۇمىس بەرۋشىلەردىڭ تاراپىنان مۇگەدەكتىككە ۇشىراعان ازاماتتاردىڭ قىزمەتىن تومەندەتىپ, جالاقىسىن ازايتۋ كورىنىستەرى بەلەڭ الۋدا. سوندىقتان, قولدانىستاعى زاڭدارداعى جۇمىس بەرۋشىلەرگە قاتىستى ەرەجەلەردى قاتاڭداتۋ قاجەت بولىپ وتىر.
مۇمكىندىگى شەكتەۋلى ادامدارعا جاردەمدەسەتىن الەۋمەتتىك قىزمەتكەرلەر مارتەبەسىن كوتەرۋ جايى دا تالقىلاندى. الەۋمەتتىك قىزمەتكەرلەردى جالاقىسى مەن ءبىلىم دەڭگەيى تومەن ءارى تۇرمىستىق جۇمىستاردى اتقارۋشىلار رەتىندە قابىلدايتىنى تۋرالى ايتىلدى. ۇكىمەتتىك ەمەس ۇيىم وكىلدەرى ولاردىڭ مارتەبەسىن زاڭ جۇزىندە كوتەرۋدى, بىلىكتىلىگىن ارتتىرۋدى جانە جالاقىلارىن قايتا قاراۋدى ۇسىندى.
«بىزدە مۇمكىندىگى شەكتەۋلى ادامداردىڭ قۇقىقتارى مەن ءومىر ءسۇرۋ ساپاسىن جاقسارتۋعا باعىتتالعان كوپتەگەن زاڭدار بار. الايدا ولاردىڭ ورىندالۋى ويداعىداي ەمەس. اسىرەسە, جاۋاپتى ورگاندار تاراپىنان وسى ماسەلەنى ەسكەرمەي كەلە جاتقانى بايقالىپ وتىر. ءبىز بارلىق ۇسىنىستار مەن باستامالاردى جيناقتاپ, ءتيىستى ورگاندارعا قۇجاتتار توپتاماسىن ازىرلەيتىن بولامىز», - دەدى سەناتور ناريمان تورەعاليەۆ.
ناريمان تورەعاليەۆ جۇمىس توبى بيىلعى 30 قاراشاعا دەيىن جۇمىس ىستەيتىنىن اتاپ ءوتتى. مۇمكىندىگى شەكتەۋلى ازاماتتاردىڭ قۇقىقتارى مەن ءومىر ءسۇرۋ ساپاسىن جاقسارتۋ جونىندەگى ۇسىنىستاردى Turegaliyev@parlam.kz, Amanbayuly@parlam.kz ەلەكتروندىق پوشتاسىنا جىبەرۋگە بولادى.
