KAZ Minerals Aktogay كومپانياسى تاۋ-كەن سالاسىنا جاس مامانداردى دايىنداۋعا بەلسەنە قاتىسۋدا. وسى رەتتە وبلىستا «سۋپەركوللەدج» دەگەن ورتاق اتاۋمەن ءبىلىم بەرۋ سالاسىنىڭ بىرنەشە جوباسى ىسكە قوسىلدى. بولىنگەن قاراجات كولەمى - 535 ملن تەڭگە.
«سۋپەركوللەدج» جوباسى تۇلەكتەردىڭ بىلىكتىلىگىن كوتەرۋمەن قاتار, مامانداردى كومپانيانىڭ قاجەتتىلىگىنە ساي الدىن الا وقىتۋ ماقساتىندا ازىرلەنگەن. جاڭا تەحنولوگيالارمەن جانە تەحنيكامەن جابدىقتالعان اقتوعاي كبك-ندە جۇمىس ارنايى دايىندىقتى قاجەت ەتەدى. وقۋ ورىندارىمەن جاسالعان كەلىسىمگە سايكەس بۇل دايىندىق كەن ورنىنا ىرىكتەلگەنگە دەيىن الدىن الا وتكىزىلەدى.
كومپانيا وسكەمەن جانە اياگوز قالالارىنداعى كوللەدجدەردىڭ وقۋ سىنىپتارىن جاڭعىرتىپ, اياگوز اۋدانىنىڭ كەيبىر بالاباقشالارى مەن مەكتەپتەرىنە جوندەۋ جۇمىستارىن جۇرگىزدى, جابدىقتار ساتىپ الدى, بالالار مەن سپورت الاڭدارىن سالدى.
كەشە وبلىس ورتالىعىنداعى ءۇش بىردەي ءبىلىم ورداسىندا جاڭارتىلعان وقۋ سىنىپتارى اشىلدى. وسكەمەن كوپسالالى تەحنيكالىق كوللەدجىندە 252,6 ملن تەڭگەگە تاۋ-كەن جابدىقتارىنا قىزمەت كورسەتۋ جانە جوندەۋ سلەسارلارىنىڭ وقۋ سىنىبى, پراكتيكالىق ساباقتار سىنىبى, دانەكەرلەۋشىلەرگە, ەلەكترمونتەرلەرگە, بوق جانە ا سلەسارلارىنا ارنالعان وقۋ سىنىپتارى قايتا جاراقتاندىرىلىپ, دەمونستراتسيالىق جانە باسقا دا قاجەتتى جابدىقتار ورناتىلدى. سونىمەن قاتار, كومپانيا وقۋ ورنىنا JCB 8035 ەكسكاۆاتور-تيەگىشىن, New Holland C227 شىنجىر تاباندى ميني-تيەگىشىن, Mitsubishi L-200 اۆتوكولىگىن ۇسىندى.
ال س.امانجولوۆ اتىنداعى شقمۋ-ءنىڭ جوعارى كوللەدجىندە 22,2 ملن تەڭگەگە حيميالىق تالداۋ لابورانتتارىنا ارنالعان وقۋ سىنىبى جابدىقتالدى. ينتەراكتيۆتى جانە تەحنيكالىق وقىتۋ قۇرالدارى, تابيعي كوللەكتسيالار, وقۋ پلاكاتتارى, قۇرالدار, بەينەفيلمدەر, دەمونستراتسيالىق جانە زەرتحانالىق اسپاپتار, حيميالىق رەاكتيۆتەر مەن ىدىستار جيىنتىعى, ۇستەلدەر مەن ورىندىقتار جەتكىزىلدى. سونداي-اق, كومپانيا قاراجاتى ەسەبىنەن 6,1 ملن تەڭگە سوماسىنا كوللەدجدە وقىپ, وندىرىستىك جانە ديپلومالدى تاجىريبەدەن ءوتۋ ءۇشىن ستۋدەنتتەرگە 15 گرانت ءبولىندى. ولار ديپلوم العاننان كەيىن اقتوعاي كبك-نە جۇمىسقا ورنالاسادى.
د.سەرىكباەۆ اتىنداعى شقمتۋ-ءنىڭ جوعارى تەحنيكالىق كوللەدجىندە 14,7 ملن تەڭگەگە "پايدالى قازبالاردى بايىتۋ" ماماندىعىنا ارنالعان وقۋ سىنىبى جابدىقتالدى: ۇگىتۋ, ۇساقتاۋ, فلوتاتسيا, قويۋلاندىرۋ ۇدەرىستەرى بويىنشا وقىتۋ باعدارلاماسىندا قاراستىرىلعان زەرتحانالىق-تاجىريبەلىك جۇمىستارعا ارنالعان جابدىقتار ورناتىلدى. مۇندا (شقمۋ جوعارى كوللەدجىنە ۇقساس) 6,3 ملن تەڭگە سوماسىنا 15 گرانت ءبولىنىپ, ديپلوم بەرۋدى كوزدەيتىن 10 ايلىق وقىتۋ باعدارلاماسى ىسكە قوسىلدى. اياگوز قالاسىنىڭ پوليتەحنيكالىق كوللەدجىندە دانەكەرلەۋشىلەر مەن ەلەكترمونتەرلەرگە ارنالعان وقۋ سىنىپتارى 49,9 ملن تەڭگە سوماسىنا جوندەلىپ, جابدىقتالدى. سونداي-اق, "KAZ Minerals Aktogay" جشس ەكى جىل قاتارىنان اياگوز اۋدانىنىڭ مەكتەپ تۇلەكتەرىنە ارنالعان ءبىلىم گرانتتارىن ءبولىپ كەلەدى. گرانت سوماسىنا وقۋ قۇنى, شاكىرتاقى جانە جاتاقحانادا تۇرۋ اقىسى كىرەدى.
كومپانيا جوعارى وقۋ ورىندارىنىڭ تۇلەكتەرىنە ارنالعان تاعىلىمداما باعدارلاماسىن ىسكە اسىرۋدا. ونىڭ اياسىندا جاس ماماندار اقىلى تاعىلىمدامادان ءوتىپ, كەيىن اقتوعاي كبك كومانداسىنىڭ مۇشەسى بولا الادى. باعدارلاما ەكىنشى جىل جۇمىس ىستەپ كەلەدى. اياگوز اۋدانىندا كومپانيا 178 ملن تەڭگەدەن استام سوماعا بىرنەشە مەكتەپتەر مەن بالاباقشالاردىڭ عيماراتتارىن جوندەۋدەن وتكىزىپ, بالالار مەن سپورت الاڭدارىن سالىپ بەردى. «اقتوعاي كبك-دا جاڭا جابدىقتار ورناتىلعان جانە ءوندىرىستىڭ زاماناۋي تەحنولوگيالارى قولدانىلادى. ءبىز كومپانيانىڭ تالاپتارىنا جاۋاپ بەرەتىن جاس مامانداردى وقىتۋعا اسا مۇددەلىمىز. ول ءۇشىن ءبىز «سۋپەركوللەدج» اتتى جوبانى ىسكە قوستىق. وقۋ ورىندارىنىڭ باسشىلارى ءبىزدى قولداعانىنا قۋانىشتىمىز. سونىمەن قاتار, اياگوز اۋدانىندا مەكتەپتەر مەن بالاباقشالاردى قايتا جابدىقتاۋ جۇمىستارى جۇرگىزىلۋدە. بۇل ءبىزدىڭ كورپوراتيۆتىك الەۋمەتتىك جاۋاپكەرشىلىگىمىزدىڭ باسىم باعىتتارىنىڭ ءبىرى" دەيدى "KAZ Minerals Aktogay" جشس قىزمەتكەرلەرمەن جۇمىس باسقارماسىنىڭ باستىعى باۋىرجان ابىلقاسىم ۇلى.
وسكەمەن
