ونىڭ ايتۋىنشا, تۇركىتىلدەس مەملەكەتتەردىڭ ىنتىماقتاستىق كەڭەسى بىرتىندەپ كەڭەيىپ كەلەدى, حالىقارالىق ۇيىمنىڭ كەزەكتى ءسامميتى 16 قازاندا وتكىزىلەدى.
«وزبەكستان تۇركىتىلدەس مەملەكەتتەردىڭ ىنتىماقتاستىق كەڭەسىنە مۇشەلىككە ءوتۋ جونىندە شەشىم قابىلدادى. وزبەك تاراپىنىڭ رەسمي ءوتىنىشى تۇركى كەڭەسىنىڭ حاتشىلىعىنا كەلىپ ءتۇستى دەدى», - دەدى مەۆليۋت چاۆۋشوگلۋ.
تۇركيا سىرتقى ىستەر ءمينيسترىنىڭ ايتۋىنشا, مۇشەلىككە وتۋگە قاجەتتى قۇجاتتار تاشكەنتكە بەرىلگەن. رەسمي مۇشەلىككە ءوتۋ ۇدەرىسى تاياۋ ارادا اياقتالادى.
«اشعابات كەڭەسكە باقىلاۋشى مەملەكەت رەتىندە قاتىسۋعا ءازىر ەكەنىن جەتكىزدى. ءبىزدىڭ تاراپقا تۇرىكمەنستان ەكى مارتە وڭ نيەت تانىتتى», - دەدى چاۆۋشوگلۋ.
ءمينيستردىڭ اتاپ وتۋىنشە, تۇركىتىلدەس مەملەكەتتەردىڭ ىنتىماقتاستىق كەڭەسىنىڭ باس حاتشىسى باعدات امىرەەۆ كومەكشىسىمەن بىرگە اشعابات اتتانباقشى.
جاقىندا تۇركىتىلدەس مەملەكەتتەردىڭ ىنتىماقتاستىق كەڭەسى ماڭىزدى ايماقتىق ويىنشىعا اينالادى, دەيدى چاۆۋشوگلۋ. بىلتىرعى ىستىقكولدە وتكەن سامميت كەزىندە ماجارستان كەڭەسكە باقىلاۋشى مەملەكەت رەتىندە قوسىلعانىن مينيستر ەسكە سالدى.
19 قىركۇيەكتە بۋداپەشتتە تۇركىتىلدەس مەملەكەتتەردىڭ ىنتىماقتاستىق كەڭەسىنىڭ ەۋروپالىق كەڭەسى اشىلادى, وعان ۇيىمعا مۇشە ەلدەردىڭ ءسىم باسشىلارى قاتىسادى, دەدى چاۆۋشوگلۋ.
ەسكە سالا كەتسەك, 2009 جىلى قازان ايىندا ناحچىۆاندا (ازەربايجان) وتكەن سامميتتە جاڭا ۇيىم قۇرىلعانى جاريا ەتىلدى, ونىڭ تۇجىرىمدارى 2010 جىلى 16 قىركۇيەكتەگى ىستانبۇل دەكلاراتسياسىندا كورسەتىلگەن. العاشقى كەزەڭدە تۇركى كەڭەسىنە تۇركيا, ازەربايجان, قازاقستان مەن قىرعىزستان كىردى. ۇيىم قۇرىلعالى بەرى تۇركى كەڭەسىنە مۇشە مەملەكەتتەردىڭ باسشىلارىنىڭ التى كەزدەسۋى وتكىزىلدى.
