وسكەمەندە وتاندىق ءونىمدى قولداۋ بويىنشا دوڭگەلەك ۇستەل ءوتتى. وڭىردەگى ءىرى ءوندىرىس ورنى «قازتسينك» كومپانياسى ۇيىمداستىرعان شاراعا جەرگىلىكتى كاسىپكەرلەر قاتىستى. جيىرما مىڭنان استام ادام ەڭبەك ەتەتىن كاسىپورىندا قىزمەتكەرلەرگە كەرەكتى ارنايى كيىمدەر مەن كۇندەلىكتى جۇمىستارىنا قاجەت جەكە قورعانىس قۇرالدارى ۇنەمى سۇرانىسقا يە. الپاۋىت ءوندىرىس ورنى وسى ماقساتتا جەرگىلىكتى تاۋار وندىرۋشىلەرمەن كەلىسىمشارت جاساسادى. ء«بىز كەنشىلەردىڭ جۇمىسىنا قاجەت بىلعارى بەلبەۋلەر شىعارامىز. 2003 جىلدان بەرى «قازتسينك» كومپانياسىمەن ىنتىماقتاستىقتا جۇمىس ىستەپ كەلەمىز. جىلىنا 1 جارىم مىڭ بەلبەۋدى ساتىپ الادى. شاعىن كاسىپورنىمىزدا 8 ادام جۇمىس ىستەيدى. ءىرى كاسىپورىندارمەن جۇمىس ىستەۋ ءبىزدىڭ بيزنەسىمىزدىڭ دامۋىنا سەرپىن بەرەدى» دەيدى سەمەيدەن كەلگەن جەكە كاسىپكەر جاسان راحيموۆ.
كاسىپورىندا مەردىگەرلەرمەن جۇمىس ىستەۋ ءۇشىن قازاقستاندىق مازمۇندى دامىتۋ كەڭسەسى اشىلىپتى. «قازاقستاندىق ءونىمدى قولداۋ باعىتىندا ءبىزدىڭ كومپانيا جىل سايىن وتاندىق تاۋار وندىرۋشىلەرمەن كەلىسىم جاسايدى. بۇگىنگى كۇنى تاۋارلاردى ساتىپ الۋ, قىزمەت كورسەتۋگە قاتىستى جاسالعان مەموراندۋمداردىڭ جالپى سوماسى 307 ميلليارد تەڭگەنى قۇرايدى. سونىمەن قاتار 2016 جىلى وتاندىق تاۋار وندىرۋشىلەردى قولداۋ ماقساتىندا ينۆەستيتسيا جانە دامۋ مينيسترلىگىمەن تەحنولوگيالىق كەلىسىم جاسالدى. ماسەلەن, جەكە قورعانىس قۇرالدارى مەن ارنايى كيىمدەردى الساق, ونىڭ 94 پروتسەنتى قازاقستاندىق فيرمالاردان الىنادى» دەيدى «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
وسكەمەن
