جاس وتاۋدىڭ تويى وتكەن سوڭ, تىرشىلىك باستالدى. گۇلداناعا اۋىلدا زاڭگەرلىك جۇمىس جوق. نە ىستەيدى؟ اۋىلعا كەلىن بولىپ ءتۇسىپ, قالاعا قايتا كەتەمىن دەگەندى قالاي ايتادى؟ نامىسى بار جىگىت نۇرلان دا كەلىنشەگىنىڭ سوڭىنان قالاعا كەتەمىن دەپ ايتپايتىنىن بىلەدى. ەكى جاسقا تىعىرىقتان شىعۋدىڭ ءبىر-اق جولى بار ەدى. بۇل – اۋىلدا ءوزىنىڭ ءىسىن اشۋ بولاتىن. اۋىلدا قالعان جاستاردىڭ كوبى مالدى كاسىپ ەتەدى. بىراق نۇرلاننىڭ نەگىزگى قىزمەتى بولعان سوڭ, مال وسىرۋگە مۇمكىندىك جوق ەدى. گۇلدانا ۇيدە وتىرىپ, كوپ ويلاندى. ول كاسىپكەرلىكتىڭ قىزمەت كورسەتۋ تۇرىنە توقتادى. اۋىلدا قوعامدىق مونشا جوق. ال سالاماتتى ءومىر سالتىنىڭ ءوزى تازالىقتان باستالماي ما؟ گۇلدانا جولداسىنا مونشا سالۋعا بەكىنەتىنىن ايتتى. ال ونىڭ ءجون-جوباسىن ءبىلۋ قازىر اسا قيىندىق تۋدىرمايدى. «اتامەكەن» كاسىپكەرلەر پالاتاسىنىڭ «باستاۋ» وقۋ كۋرسىنا بارىپ وقىدى دا, كاسىپكەرلىك نەگىزىنىڭ بارلىعىن ءبىلىپ الدى.
– مەنىڭ باستامام «اتامەكەن» كاسىپكەرلەر پالاتاسىنىڭ اۋداندىق فيليالىنداعى ماماندارعا ۇنادى. ول ءۇشىن كادىمگىدەي قۇرىلىس جۇرمەيدى, قاي جەرگە قالاساڭ, سول جەرگە قويا سالاسىڭ. ول ءۇشىن بۋمالانعان قۇجات جيناۋدىڭ كەرەگى جوق. مونشا قاشاندا, قايدا دا بولسا كەرەك. كەلىن بولىپ تۇسكەن اۋىلىم ماعان راحمەتىن ايتىپ جاتىر, – دەيدى گۇلدانا.
گۇلدانا كۋزايبيناعا «اتامەكەن» كاسىپكەرلەر پالاتاسىنىڭ اۋداندىق فيليالى كرەديت الۋعا كومەكتەستى. ول جەڭىلدەتىلگەن مەملەكەتتىك باعدارلاما اياسىندا 1 ملن 600 مىڭ تەڭگە الىپ, وعان مودۋلدىك مونشا قۇردى. 2000 تۇرعىنى بار موسكۆا اۋىلدىق وكرۋگى ءۇشىن مونشانىڭ جەتىلدىرىلگەن بۇل ءتۇرى جاقسى جاڭالىق بولدى. مونشانىڭ راحاتىن اۋىلداستارى كورىپ وتىر.
«كەلىننىڭ – اياعىنان, قويشىنىڭ – تاياعىنان» دەگەن وسى. اۋىلعا سالاماتتى ءومىر سالتىنىڭ كورىنىسىن اكەلگەن جاس كەلىن جاقىندا عانا شەكەسى تورسىقتاي ۇل تاۋىپ, اياق-قولىن باۋىرىنا الىپ جاتىر. اۋىلعا اياعى قۇتتى كەلىندەر ءتۇسىپ تۇرسا, اۋىلداستاردىڭ قۋانىشى دا, ءسۇيىنىشى دە مۇنىمەن توقتاماس.
قوستاناي وبلىسى,
قوستاناي اۋدانى
