بۇل سۇراققا قاقپاق اۋىلىنىڭ تۇرعىنى, 50 جىل اعارتۋ سالاسىندا قىزمەت ەتكەن زەينەتكەر ۇستاز ءنۇسىپ اقساقال بىلاي جاۋاپ بەرەدى. ناقتىراق ايتقاندا, ول كىسىنىڭ ۇيىندە تاڭعالارلىق جاعداي ورىن الدى. بالكىم سايكەستىك شىعار, بالكىم قۇدايدىڭ قۇدىرەتى بولار... اتامىزدىڭ كۇركەدەگى تاۋىعى «اللا» دەگەن جازۋى بار جۇمىرتقا شىعارىپتى. ءنۇسىپ قاريا سوڭعى ۋاقىتتا ءۇي قۇسىن باعىپ جۇرگەنىن جانە دەنساۋلىعىنا بايلانىستى كۇندە جۇمىرتقا جەيتىنىن ايتتى. اۋرۋ دا, اۋرۋدىڭ ەمى دە اللادان ەكەنىن ەسكەرگەن اقساقال مىنا قۇبىلىستىڭ تەكتەن تەك ەمەستىگىن ايتادى. سىرتى تەگىس كەلەتىن جۇمىرتقانىڭ مۇنداي ەرەكشەلىكپەن جاراتىلعانى جانە وندا اللانىڭ بەلگىسىن بىلدىرەر جازۋدى كەسكىندەگەن سىزىقتاردىڭ بارىنا ءبىز دە كوز جەتكىزدىك.
– كەزەكتى كۇندەردىڭ بىرىندە كۇركەدەن جۇمىرتقا جيناپ ۇيگە كەلە جاتقاندا جۇمىرتقانىڭ سىرتىنداعى سىزىقتارعا كوزىم تۇسە كەتكەنى... تاڭىرقاي, زەر سالىپ قاراسام, اراپ قارپىندەگى «اللا» دەگەن ۇعىمدى بىلدىرەتىن جازۋ ەكەنىنە كوزىم جەتتى. ءوزىم توتە جازۋدى وتە جاقسى تانيتىن بولعاندىقتان, جۇمىرتقاداعى جازۋدىڭ جوعارىداعىداي ءسوز ەكەنىنە كۇمانىم قالمادى. سوسىن, تاڭعاجايىپ جاڭالىقتى سىزدەرگە جەتكىزۋگە اسىقتىم, – دەيدى ءنۇسىپ قاريا.
الداعى ۋاقىتتا بۇل جۇمىرتقانى مەشىتكە اپارىپ بەرمەك ويى بار. قاريا شاڭىراعىندا بولعان تاڭعاجايىپ قۇبىلىستى جاقسىلىققا بالايدى.
د. جاناسىل
الماتى وبلىسى,
رايىمبەك اۋدانى
