دوڭگەلەك ۇستەلگە بوكستان الەم چەمپيونى مەرەي اقشالوۆ پەن جاسوسپىرىمدەر وليمپياداسىنىڭ چەمپيونى ايبەك ورالباي, تاەكۆوندودان استانا قالالىق فەدەراتسياسىنىڭ باسشىسى ءارى ەل تاريحىنداعى جالعىز وليمپيادا جۇلدەسىنىڭ يەگەرى ارمان شىلمانوۆ جانە تاعى باسقا بىرقاتار جەرگىلىكتى فەدەراتسيانىڭ باسشىلارى قاتىسىپ, وزدەرىنىڭ ۇسىنىس-پىكىرلەرىن ءبىلدىردى.
ماسەلەن, مەرەي اقشالوۆ تۇرعىن ۇيلەردىڭ اۋلالارىنا سپورت عيماراتىن سالىپ, بالالار تەك جازدا عانا ەمەس, قىستا دا سپورتپەن اينالىسۋعا تاماشا مۇمكىندىك بولار ەدى دەيدى. ال ارمان شىلمانوۆ بۇگىنگى كۇنگە دەيىن قالادا تاەكۆوندو فەدەراتسياسىنىڭ عيماراتى جوق ەكەنىن العا تارتىپ, اكىمدىك جەر ءبولىپ بەرسە وزدەرى ينۆەستيتسيا تارتىپ عيمارات سالۋعا دايىن ەكەندىكتەرىن جەتكىزدى. «الاتاۋ» سپورت سارايىنا جۇزۋگە باراتىن سپورتشىلاردىڭ ايتۋىنشا, اتالعان كەشەندە دۋشتىڭ ءوزى جۇمىس ىستەمەي قالادى ەكەن. سونداي-اق مۇگەدەك سپورتشىلار ءۇشىن جاعداي جاسالماعان, ليفت ىستەمەيدى. ال «بارىس ارەناداعى» ءجۇزۋ باسسەينىنىڭ باعاسى قىمبات.
جيىن بارىسىندا وسى جانە بۇدان دا باسقا بىرقاتار ماسەلەلەر كوتەرىلدى. قالا اكىمى ءوز كەزەگىندە ەلوردانىڭ سپورتىن دامىتۋ ءۇشىن بارلىق جاعدايدى جاسايتىنىن جانە جوعارىدا ايتىلعان ماسەلەلەردى مەيلىنشە شەشۋگە تىرىساتىنىن جەتكىزدى. «بۇگىن كوتەرىلگەن ماسەلەلەر بويىنشا جۇيەلى جۇمىستار جۇرگىزىلىپ, شەشىمدەر قابىلداناتىن بولادى. نۇر-سۇلتان ەلىمىزدىڭ باس قالاسى بولعاندىقتان قاي سالادا بولسىن الدىڭعى قاتاردان كورىنۋى ءتيىس دەپ ويلايمىن. بۇل رەتتە سپورت سالاسىنىڭ الار ورنى ايرىقشا ەكەنى ءسوزسىز. ءبىز اكىمدىك تاراپىنان جان-جاقتى قولداۋ بىلدىرۋگە دايىنبىز. بۇگىن سىزدەردەن 16 ۇسىنىس-ءوتىنىشتى ەستىدىم. بارلىق جاعدايدى ەگجەي-تەگجەيلى قارايتىن بولامىز», دەپ تۇيىندەدى سپورت وكىلدەرىمەن وتكەن كەزدەسۋدى التاي كولگىنوۆ.
