«سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» دەگەن ىرگەلى تاقىرىپ ءتۇيىن-ءتۇيىن بولىپ تۇرعان سىزداۋىق-سىرقاتتىڭ سوقتاسىن ۇستىنەن ساۋساقپەن دالدەپ تۇرىپ باسقانداي, الاڭدايتىن احۋالعا كەلگەن قوعامنىڭ كەيبىر ماسەلەسىنە مويىن بۇرعىزىپ, نازار اۋدارتتى. جىل سايىنعى جولداۋدا بۇرىن سان رەت ايتىلعان, جالپى جۇرتقا تانىس جايتتاردى تاعى ءبىر مارتە تىزبەلەپ شىعۋ شارت ەمەس, باستان-اياق زەر سالىپ قاراعان ادامعا, وزەكتىلىگىمەن, زارۋلىگىمەن قوعامنىڭ الدىڭعى قاتارداعى كۇيىپ تۇرعان ماسەلەسىنە اينالعان حالىق كوكەيىندەگى كەيبىر تالاپ-تىلەكتىڭ پرەزيدەنتتىڭ تۇڭعىش جولداۋىندا ۋاقتىلى ءارى ورىندى اتالۋى جاڭا ءۇمىتتىڭ وتىن جاققانداي بولدى. دەمەك, بۇل ۇكىمەتتىڭ دە, ۇكىمەت قۇرامىنداعى ءتۇرلى اتقارۋشى بيلىك ورىندارىنىڭ جاۋاپكەرشىلىگىن دە ارتتىرۋعا باعىتتالادى دەگەن ءسوز. جولداۋ, ءبىر جاعى, پرەزيدەنتتىڭ قاداپ تۇرىپ كورسەتكەن قاداۋ-قاداۋ تاپسىرمالارىن قاداعالاۋدى كۇشەيتۋ جونىندەگى ءوز الدىنا جەكە-دارا قۇرىلىم سەكىلدى كورىنەدى.
ۇستازدىڭ بەدەلىن كوتەرۋ – ۇلتتىق تانىمنىڭ, رۋحاني كەڭىستىكتىڭ بەدەلىن قالىپتاستىرۋ دەگەنگە سايادى. پرەزيدەنت ۇستازداردىڭ تامىز كونفەرەنتسياسىندا سويلەگەن ءسوزىن تاعى ءبىر پىسىقتاپ, مۇعالىم مارتەبەسىن كوتەرۋ وعان دەگەن قۇرمەتتى وياتۋمەن بىرگە ورنىعاتىنىن ورىندى اتاپ ءوتتى. سونداي-اق شاعىن جانە ورتا كاسىپكەرلىكپەن اينالىساتىن ىسكەر ازاماتتاردى ءۇش جىلعا دەيىن سالىقتان بوساتۋ دا ەكونوميكانى ءدال بۇگىن دامىتىپ جىبەرمەگەنىمەن, ءتۇبى وركەندەۋگە جول اشاتىن, كاسىپكەردىڭ وزىنە دەگەن سەنىمىن بەكىتىپ, ونى قورعاۋعا باعىتتالعان مەملەكەتتىك قولداۋ دەپ بىلەمىن. ەكونوميكالىق تۇرعىدا جاڭعىرۋ نارىقتاعى دامۋمەن عانا بايلانىستى ەمەس, ول الەۋمەتتىك, رۋحاني وركەندەۋمەن ءوزارا تىعىز بايلانىستى دامىعاندا عانا وڭ ناتيجەسىن كورسەتەتىنىن دالەلدەپ قويعان.
حالىقتى الاڭداتىپ وتىرعان ساياسي, الەۋمەتتىك ماسەلەلەردىڭ ۇلكەنى – جەر. پرەزيدەنت «جەر بىردە-ءبىر شەتەلدىككە ساتىلمايدى!» دەگەن ءسوزدى ناقتىلاپ تۇرىپ ايتتى. وسى جولداۋدان كەيىن «بۇعان قوسىمشا قوس پالاتالى پارلامەنت «جەر تۋرالى» زاڭعا وزگەرىستەر مەن تولىقتىرۋلار ەنگىزسە دە ارتىق بولمايدى ەكەن» دەگەن ويدىڭ كەلگەنىن دە جاسىرىپ قايتەيىك.
بالا – بولاشاعامىز. بولاشاعىمىزدى بۇگىن قورعاماساق, ەرتەڭ كەش بولادى. ولاردىڭ ارقايسىسى مەملەكەتىمىزدىڭ قىمبات قازىناسى. بىراق سالعىرتتىقتان, جازادان وڭاي قۇتىلىپ كەتىپ جاتقان قىلمىسكەرلەردىڭ زاڭ نورمالارىن اياقاستى ەتۋىنەن بالالارعا جاسالاتىن وزبىرلىق پەن قىسىم توقتاماي تۇر. جاراتىلىسى نازىك, قورعانسىز بۇلدىرشىندەرگە قاتىستى زورلىق-زومبىلىق كورسەتۋ ماسەلەسى تەرەڭدىگى مەن كولەمى جاعىنان بارلىق شەكتى مولشەردەن, دابىل قاعاتىن دەڭگەيدەن اسىپ, ولاردىڭ قۇقىعىنىڭ زاڭمەن قورعالۋىن, قىلمىسكەرلەردىڭ قاتاڭ جازالانۋىن قوعام تۇتاس قولداپ وتىر. قاۋىپ-قاتەرگە تولى, كوپتىڭ اشۋ-ىزاسىنا تيەتىن بۇل ماسەلە قانشا جىلدان بەرى تالقىعا ءتۇسىپ كەلەدى, سەبەبى مەن سالدارى زەرتتەلىپ تە جاتىر, جازا دا تاعايىندالدى. بىراق ناتيجە از. سوندىقتان قوعامنىڭ سەنىمى مەن حالىقتىڭ ءوزىن قاۋىپسىز سەزىنۋى ءۇشىن جولداۋدا ايتىلعان بالالاردى قورعاۋ ماسەلەسىنىڭ وڭ شەشىمىن تاباتىن ۋاقىتى كەلدى.
ەلباسىنىڭ تاريحي قۇجاتتارىنداعى وسىعان دەيىن كورسەتىلگەن, ويداعىداي ورىنداۋىن تاپقان, ءالى دە كەمەلدەندىرۋدى كەرەك ەتەتىن ستراتەگيالىق قادامدارى, قوعامدى جاڭعىرتۋ, جەتىلدىرۋ جونىندەگى ويلارىنىڭ ءبارى جاڭا جولداۋدا زاڭدى جالعاسىن تاۋىپ وتىر. جاڭعىرۋعا بايلانىستى جاڭا تالاپتار بەلگىلەنگەن, اشىقتىق پەن ناقتىلىقتى كوزدەگەن ازاماتتىق قوعام دەڭگەيىنە كوتەرىلۋدىڭ بىرقاتار العىشارتتارى كەڭىنەن قامتىلعان جولداۋ كوپكە سەنىم ۇيالاتا الۋىمەن ماڭىزدى.
نۇرلان ورازالين,
اقىن, مەملەكەتتىك سىيلىقتىڭ لاۋرەاتى
