مەملەكەت باسشىسى قاسىم-جومارت توقاەۆتىڭ قازاقستان ماشينا جاساۋشىلارىنىڭ VII فورۋم قاتىسۋشىلارىنا قۇتتىقتاۋ حاتىن شارانىڭ اشىلۋىندا كومەكشىسى ماۋلەن اشىمباەۆ وقىدى.
«قۇرمەتتى فورۋمعا قاتىسۋشىلار, سىزدەردى قازاقستان ماشينا جاساۋشىلارىنىڭ VII فورۋمىنىڭ وتكىزىلۋىمەن قۇتتىقتايمىن! قازىرگى ۋاقىتتا ماشينا جاساۋ سالاسى قوسالقى بولشەكتەردەن باستاپ جوعارى تەحنولوگيالىق زاماناۋي جابدىققا دەيىن كوپتەگەن ءونىم شىعارادى, ول سونداي-اق تەپلوۆوزداردى, جولاۋشىلار مەن جۇك ۆاگوندارىن, جۇك جانە جەڭىل اۆتوموبيلدەرىن, ترانسفورماتورلاردى, سونداي-اق باسقا دا كۇردەلى جابدىقتاردى شىعارادى. ماشينا جاساۋ بۇكىل قازاقستاندىق ەكونوميكانىڭ دامۋىنا ىقپال ەتەتىن سالا بولىپ تابىلادى. قازاقستان ماشينا جاساۋشىلارىنىڭ VII فورۋمىنىڭ قاتىسۋشىلارىنا جەمىستى ەڭبەك جانە العا قويعان ماقساتتارىنا قول جەتكىزۋدە جەتىستىكتەر تىلەيمىن» دەلىنگەن پرەزيدەنتتىڭ قۇتتىقتاۋ حاتىندا.
فورۋمدى قازاقستان رەسپۋبليكاسى ۇكىمەتى جانە «اتامەكەن» ۇكپ قولداۋىمەن يندۋستريا جانە ينفراقۇرىلىمدىق دامۋ مينيسترلىگى مەن قازاقستان ماشينا جاساۋشىلار وداعى ۇيىمداستىردى.
بيىلعى فورۋم «ماشينا جاساۋ – قازاقستاندى يندۋستريالاندىرۋ درايۆەرى!» تاقىرىبىندا ءوتىپ جاتىر.
فورۋمعا 1000-نان استام دەلەگات, جەتەكشى قازاقستاندىق جانە الەمنىڭ 20-دان استام ەلىنەن ماشينا جاساۋ كاسىپورىندارىنىڭ باسشىلارى, ورتالىق مەملەكەتتىك ورگاندار, كۆازيمەملەكەتتىك سەكتور, دامۋ ينستيتۋتتارى, بيزنەس قاۋىمداستىقتار جانە ماشينا جاساۋ ونىمدەرىنىڭ ءىرى تۇتىنۋشىلارى قاتىسىپ جاتىر.
سونداي-اق فورۋم الاڭىندا مامانداندىرىلعان ماشينا جاساۋ كورمەسى جۇمىس ىستەيدى.
