ءسويتىپ, ۇرىلار وتباسىما 17 660 000 تەڭگەگە ءىرى مولشەردە زالال كەلتىردى. مۇندايدا, ارينە, بىردەن تۇركىستان قالالىق پوليتسيا باسقارماسىنا حابارلاپ, ارىزداندىق. مىنە, سودان بەرى ءبىر جارىم جىل ءوتتى, ۇرىلار ۇستالمادى, تيىسىنشە دۇنيە-مۇلكىمىز دە «جەر جۇتقانداي» ءىز-ءتۇسسىز جوعالدى.
پوليتسيا دەپارتامەنتىنىڭ تابالدىرىعىن توزدىرۋمەن ءبىر جارىم جىل ءوتتى. سونداعى ەستيتىنىمىز – قر قىلمىستىق كودەكسىنىڭ 188-بابى «ۇرلىق» بويىنشا, سدتبت-نە تىركەۋگە الىنىپ, قىلمىستىق ءىستىڭ قوزعالعانى. ىسكە قاتىستى شارالار اتقارىلىپ, سۇراستىرۋ جۇمىستارى جۇرگىزىلگەنىن دە بارعان سايىن ەستيمىز. سوزدەن, قاعازعا تۇسىرىلگەن وسىنداي قۇرعاق جاۋاپتان باسقا دانەڭە جوق. ۇرىلار قىلمىسىن مويىنداپ, پوليتسەيلەردىڭ الدىنا كەلمەسى انىق. وسىندايدا كۇدىكتى ويلاردىڭ دا كوبەيەتىنى زاڭدى. ۇرلانعان دۇنيە قوماقتى. ۇرىلار پوليتسەيلەرمەن سول اقشانى ءبولىسىپ العان بولار دەگەن وي دا قىلاڭ بەرەدى. قۇقىق قورعاۋ ورنىنا دەگەن سەنىم دە جوعالا باستادى. پوليتسيانىڭ بەدەلىنە قاتىستى پرەزيدەنت جۋىرداعى جولداۋىندا كوڭىلگە قونىمدى, كوپشىلىك قولدايتىن ماسەلە كوتەردى.
پرەزيدەنت قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا قۇقىق قورعاۋ جۇيەسىن تولىق رەفورمالاۋ – اسا ماڭىزدى مىندەتتەردىڭ ءبىرى ەكەنىن اتاپ ءوتتى.
ءيا, پوليتسيا قىزمەتىنە بۇگىندە سىن ايتۋشىلار كوپ. ءوز قىزمەتىنە ادال ازاماتتار دا بارشىلىق. دەگەنمەن, تۇرعىنداردىڭ ارىز-شاعىمىنا, قىلمىستىڭ الدىن الۋ نەمەسە قىلمىسكەردى قۇرىقتاۋعا سالعىرت تا نەمقۇرايدى قارايتىندارى, وسىلايشا, پوليتسيا بەدەلىنە نۇقسان كەلتىرەتىندەرى دە, وكىنىشكە قاراي, از ەمەس.
تۇركىستان وبلىسى پوليتسيا دەپارتامەنتى باسشىلىعىنىڭ بەرگەن جاۋابىنا قاراعاندا, ءبىزدىڭ ۇيدە ورىن العان پاتەر ۇرلىعى اۋىر ساناتتاعى ۇرلىققا جاتادى. وتكەن جىلدىڭ 6 ايىندا ءۇش اۋىر ساناتتاعى پاتەر ۇرلىعى تىركەلسە, 2019 جىلدىڭ 6 ايىندا تىركەلگەن اۋىر ساناتتاعى پاتەر ۇرلىعى جەتەۋگە جەتكەن. ياعني, ەكى ەسە وسكەن. ۇرىلار ۇستالماسا, پاتەر توناۋشىلاردىڭ ەركىنسي, ياعني مۇنداي قىلمىستاردىڭ كوبەيە تۇسەرى كۇمانسىز. ۇرلىقتان وتباسىما كەلتىرىلگەن زالال تۇرمىستىق جاعدايىمىزعا كەرى اسەرىن تيگىزىپ قانا قويماي, الاڭسىز تىرلىكتەن دە ايىردى. بۇگىندە بىزدە ۇرەي باسىم, ۇيدەن الىس شىعۋعا قورقامىز.
وسى ورايدا, ءتيىستى ورگاندار, تۇركىستان وبلىسى پوليتسيا دەپارتامەنتىنىڭ باسشىلارى پوليتسيا بەدەلىن تۇسىرەتىن ارەكەتسىزدىكتى اشكەرەلەپ, ءىستى سوزبالاڭعا سالۋعا جول بەرگەندەردى جاۋاپقا تارتسا ەكەن. ءاربىر قىزمەتكەرى جاۋاپكەرشىلىكتى ءجىتى سەزىنىپ, ادال ەڭبەك ەتكەندە عانا, مەملەكەت باسشىسى ايتقانداي, پوليتسيا قاۋىپسىزدىكتى قامتاماسىز ەتۋ ءۇشىن ازاماتتارعا قىزمەت كورسەتەتىن ورگانعا اينالادى.
بەكبولات قاسيمين ۇلى,
تۇركىستان قالاسىنىڭ تۇرعىنى
