جاڭا وقۋ جىلىنىڭ باستالۋىمەن بالالاردى نۇر-سۇلتان قالاسى قحا حاتشىلىعىنىڭ مەڭگەرۋشىسى ءلاززات قۇسايىنوۆا قۇتتىقتادى. «ەلوردالىق قازاقستان حالقى اسسامبلەياسىنىڭ 23 ەتنومادەني بىرلەستىگى جانىندا 12 جەكسەنبىلىك مەكتەپ جۇمىس ىستەيدى. جەكسەنبىلىك مەكتەپتەردە ساباقتار كەشەندى جانە جۇيەلى تۇردە وتكىزىلەدى», دەدى ل. قۇسايىنوۆا.
ارمەنيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى گاگيك گالاچيان دا بالالاردى جاڭا وقۋ جىلىنىڭ باستالۋىمەن قۇتتىقتادى. «بالالار ءۇشىن ەڭ باستىسى – ساپالى جانە جاقسى ءبىلىم الۋ. قازاقستان ۇكىمەتىنە كورسەتىلگەن كومەك ءۇشىن العىسىم شەكسىز», دەدى گ.گالاچيان. «ۆان» ارميان مادەني ورتالىعىنىڭ توراعاسى سااك سالۋميان جەكسەنبىلىك مەكتەپتە اتقارىلىپ جاتقان جۇمىستار جونىندە اڭگىمەلەدى. ونىڭ ايتۋىنشا, وسى جىلدا ارميان جەكسەنبىلىك مەكتەبىندە 4 سىنىپ بويىنشا 40 وقۋشى ءبىلىم الادى.
«ۆوزروجدەنيە» نەمىستەر قوعامىنىڭ عيماراتىندا دا نەمىس جەكسەنبىلىك مەكتەبى جاڭا وقۋ جىلىنىڭ اشىلۋىن وتكىزدى. گەرمانيادان ارنايى كەلگەن مادەنيەت اسسيستەنتى انتون حاۋر مەرەكەلىك ءىس-شاراعا قاتىستى. سونداي-اق مەكتەپتە «تاڭعى شەڭبەر», «تانىسۋ» ويىندارى وتكىزىلدى. كەيىن بالالار ءۇش توپتىڭ ارقايسىسىنداعى ءۇش ساباققا قاتىستى. بۇل نەمىس ءتىلى, ەلتانۋ, قولونەر ساباقتارى بولاتىن. ينتەراكتيۆتى رەجىمدە وقۋشىلار الداعى وقۋ جىلىنان كۇتەتىن ۇمىتتەرى مەن تىلەكتەرى تۋرالى ارنايى ساباق وتكىزدى.
«لاد» رسد استانالىق فيليالى» قوعامدىق بىرلەستىگى ورىس جەكسەنبىلىك مەكتەبى دە 2019-2020 جىلعا ارنالعان جاڭا وقۋ جىلىنا ارنالعان العاشقى ساباقتارىن وتكىزدى. بۇل جولى مەكتەپكە 15-تەن اسا جاڭا وقۋشى قابىلدانعان. العاشقى ساباققا جەكسەنبىلىك مەكتەپ وقۋشىلارى, ۇستازدارى مەن نۇر-سۇلتان قالاسىنداعى قازاقستان حالقى اسسامبلەياسى حاتشىلىعىنىڭ مۇشەلەرى جينالدى. ەلوردالىق قحا حاتشىلىعىنىڭ باس مامانى گۇلنار تايگوكوۆا جاڭا وقۋ جىلىمەن قۇتتىقتاپ, ورىس جەكسەنبىلىك مەكتەبىنىڭ تاجىريبەسى مەن داستۇرلەرىن اتاپ ءوتىپ, وقۋشىلارعا تابىس تىلەدى. «لاد» رسد استانالىق فيليالى» ۇيىمىنىڭ توراعاسى نيكولاي شەپەليۋك پەن مەكتەپ ۇستازدارى دا مەرەكەلىك تىلەكتەرىن ارنادى.
قازاقستانداعى ەتنوستاردىڭ جەكسەنبىلىك مەكتەپتەرى ءتىل, مادەنيەت جانە سالت-ءداستۇردى ودان ءارى دامىتۋ ماقساتىندا ارنايى قۇرىلعان.
