يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتتەرى بويىنشا, ارىس قالاسىندا جوندەۋ جۇمىستارىنىڭ 99,3%-ى اياقتالعان. قالپىنا كەلتىرۋ جۇمىستارىنا تارتىلعان 144 قۇرىلىس كومپانياسى, 3,8 مىڭنان استام جۇمىسشى جانە 211 ارنايى تەحنيكا بارلىق جۇمىستاردى بەلگىلەنگەن مەرزىمدە اياقتاۋ ماقساتىنا جۇمىلدىرىلعان بولاتىن. ارىس قالاسىندا جوندەۋدى قاجەت ەتكەن جالپى 68 الەۋمەتتىك نىساننىڭ 4-ءۋى جانا قۇرىلىس, 64-ىندە قالپىنا كەلتىرۋ جۇمىستارى جۇرگىزىلدى. بۇگىنگى تاڭدا 62 نىساننىڭ قۇرىلىس جۇمىستارى اياقتالعان. قالعان 6 نىساندا جۇمىس جالعاسۋدا.
پرەمەر-مينيستر «ارىس-1» تەمىر جول ۆوكزالىنىڭ جوندەۋدەن وتكەن عيماراتى مەن ونىڭ الدىنداعى گۇلزاردى ارالاپ كوردى. سونداي-اق «ارىس مينەرالدى سۋ» قالپىنا كەلتىرىلگەن كاسىپورنىنا باردى. ارىس قالاسىندا ۇيلەرى تولىعىمەن قيراتىلعان 100 وتباسىنا ارنالعان ەكى پاتەرلى 50 ۇيدەن تۇراتىن جاڭا شاعىن اۋداننىڭ قۇرىلىسى بارىسىمەن تانىستى. بارلىق ۇيلەر پايدالانۋعا بەرۋگە جاقىن. بۇگىندە ىشكى ارلەۋ جۇمىستارى جانە ءۇي جابدىقتارىن ورناتۋ جۇمىستارى جۇرگىزىلۋدە. اسقار مامين ارىس قالاسىنداعى قايتا سالىنعان جەكە ۇيلەرگە كىرىپ, تۇرعىندارمەن اڭگىمەلەستى.
جۇمىس ساپارى بارىسىندا ۇكىمەت باسشىسى تۇركىستان قالاسىنداعى بولاشاق حالىقارالىق اۋەجايدىڭ قۇرىلىس الاڭىندا بولدى. جوبا تۇرىكتىڭ «YDA Holding» كومپانياسىمەن بىرلەسە جۇزەگە اسىرىلىپ جاتىر. تەرمينالدىڭ وتكىزۋ قابىلەتى جىلىنا 3 ملن جولاۋشىنى قۇرايدى. نىساندى كەلەسى جىلدىڭ سوڭىندا پايدالانۋعا بەرۋ كوزدەلگەن. پرەمەر-مينيسترگە اكىمشىلىك, الەۋمەتتىك, تاريحي جانە مادەني ماڭىزداعى نىساندار قۇرىلىسىنىڭ بارىسى تۋرالى باياندالدى. ۇكىمەت باسشىسى, سونداي-اق اكىمدىك, مەديا ورتالىق, كونگرەسس-حولل عيماراتتارىن, «نۇر-سۇلتان» الاڭىن, تۇڭعىش پرەزيدەنت ساياباعىن, وليمپيادالىق رەزەرۆتىڭ سپورت مەكتەبىن, مۋزىكا مەكتەبىن, باسسەينى بار مەكتەپ سارايىن, نەكە سارايىن, حالىققا قىزمەت كورسەتۋ ورتالىعىنىڭ عيماراتىن, سونىمەن قاتار اتتراكتسيوندارى بار قالالىق ساياباقتى, مۋزىكالىق فونتان, امفيتەاتر, سالىنىپ جاتقان تاريحي-مادەني ورتالىقتىڭ, شىعىس مونشاسىنىڭ, قالالىق ارباتتىڭ قۇرىلىس الاڭدارىن ارالادى. پرەمەر-مينيسترگە تۇركىستان قالاسىنىڭ باس جوسپارى كورسەتىلىپ, وبلىستا جۇزەگە اسىرىلىپ جاتقان ينۆەستيتسيالىق جوبالار دا تانىستىرىلدى.
تۇركىستان وبلىسى
