پارلامەنت • 11 قىركۇيەك، 2019

ءماجىلىستىڭ كەزەكتى جالپى وتىرىسىندا نە ايتىلدى

60 رەتكورسەتىلدى

ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا پالاتا قازاقستان مەن سولتۇستىك ينۆەستيتسيالىق بانك اراسىنداعى سولتۇستىك ينۆەستيتسيالىق بانكتىڭ قازاقستان رەسپۋبليكاسىنداعى قىزمەتىن رەتتەيتىن نەگىزدەمەلىك كەلىسىمدى راتيفيكاتسيالاۋ تۋرالى زاڭ جوباسىن ماقۇلدادى. بۇل تۋرالى ءماجىلىستىڭ ءباسپاسوز قىزمەتى حابارلادى. 

بۇل كەلىسىم ەلىمىزدەگى ينۆەستيتسيالىق جوبالاردى قارجىلاندىرۋ ءۇشىن سولتۇستىك ينۆەستيتسيالىق بانكتىڭ قىزمەتىن اشۋعا مۇمكىندىك بەرەدى. سولتۇستىك ينۆەستيتسيالىق بانك قارجىلاندىرۋىنىڭ نەگىزگى باعىتتارى ەنەرگەتيكا، «جاسىل ەكونوميكا»، تەلەكوممۋنيكاتسيا، كولىك، ونەركاسىپتىڭ ءتۇرلى سالالارى، اۋىل شارۋاشىلىعى، دەنساۋلىق ساقتاۋ سياقتى سەكتورلار جانە شاعىن جانە ورتا بيزنەس بولىپ تابىلادى. كەلىسىمدە قازاقستان رەسپۋبليكاسىنىڭ زاڭنامالىق اكتىلەرىندە كوزدەلمەگەن نورمالار، اتاپ ايتقاندا، ۆاليۋتانىڭ ايىرباستالۋى جانە قاراجات اۋدارۋ، تەندەرلەر وتكىزۋ، سونداي-اق سولتۇستىك ينۆەستيتسيالىق بانكتىڭ اكتيۆتەرى مەن كىرىستەرىن سالىق سالۋدان بوساتۋ جونىندەگى نورمالار بەلگىلەنەدى.

سونداي-اق وسى كۇنى دەپۋتاتتار مەملەكەتتىك قىزمەتتەر كورسەتۋ ماسەلەلەرى بويىنشا تۇزەتۋلەرگە ەكىنشى وقىلىم بويىنشا وڭ باعاسىن بەردى. زاڭ جوباسىن تالقىلاۋ اياسىندا 775 تۇزەتۋ ءتۇسىپ، ولار مۇددەلى مينيسترلىكتەر، ۆەدومستۆولار مەن قوعامدىق ۇيىمدار وكىلدەرىنىڭ قاتىسۋىمەن جۇمىس توبىنىڭ ون سەگىز وتىرىسىندا جانە كوميتەتتىڭ كەڭەيتىلگەن وتىرىستارىندا قاراستىرىلعان.

جالپى وتىرىستا ءماجىلىستىڭ 5 سەسسياعا ارنالعان جۇمىس جوسپارى بەكىتىلدى. ول جونىندە ءماجىلىس توراعاسى نۇرلان نىعماتۋلين پالاتا الدىندا اتقارىلاتىن جۇمىستاردىڭ كوپتىگىن، ونىڭ ىشىندە، پارلامەنتتىك تىڭداۋلار، كوشپەلى وتىرىستار، كونفەرەنتسيالار سياقتى باسقا دا ماڭىزدى شارالار قامتىلعانىن ايتا كەلىپ:

-ەڭ باستىسى، ءۇش فراكتسيا مۇشەلەرى، اسسامبلەيا دەپۋتاتتارى بارشامىز بىرلەسىپ، ساپالى زاڭ شىعارۋ مىندەتىمىزدى وتە جوعارى دەڭگەيدە اتقارۋىمىز كەرەك،- دەپ اتاپ ءوتتى.

ايتا كەتەيىك، جالپى وتىرىستا پارتيالىق ءتىزىم بويىنشا سايلانعان دەپۋتات نۇرلان ءالىمجانوۆ انت قابىلداپ، الەۋمەتتىك-مادەني دامۋ كوميتەتىنىڭ قۇرامىنا سايلاندى.

سوڭعى جاڭالىقتار

ۇقساس جاڭالىقتار