ەلباسىنىڭ الدىمەن ەكونوميكانى جۇرگىزەيىك, سول كەزدە الەۋمەتتىك ماسەلەلەر دە شەشىلەتىن بولادى, وسىلاردى رەتتەپ العان سوڭ ساياساتقا كەلەمىز دەگەن ءسوزىن ءومىر كورسەتىپ وتىر. وعان وسى جىلعى پرەزيدەنت سايلاۋى كەزىندە كوز جەتكىزدىك. قازاقستان حالقى وتكىر ساياسي ماسەلەلەردى تالقىلاۋعا بەلسەندى قاتىسۋعا دايىن ەكەنىن كورسەتتى. جارىسقا تۇسكەن ساياسي پارتيالار مەن قوعامدىق قوزعالىس وكىلدەرى ءوز باعدارلامالارى مەن جوسپارلارىن سايلاۋشىلاردىڭ نازارىنا ۇسىندى. ناتيجەسىندە سايلاۋشىلاردىڭ 80 پايىزى داۋىس بەرگەن بولاتىن. مۇنداي كورسەتكىشكە الپاۋىت مەملەكەتتەر دە قول جەتكىزە الماۋدا. ءوزىنىڭ تۇڭعىش جولداۋىن پرەزيدەنت قاسىم-جومارت توقاەۆ قوعامدىق ديالوگ تاقىرىبىنا ارنادى. «ەلدىڭ قوعامدىق-ساياسي ءومىرىن جاڭعىرتپايىنشا تابىستى ەكونوميكالىق رەفورمالارعا قول جەتكىزۋ مۇمكىن ەمەس» ەكەندىگىن ەرەكشە اتاپ كورسەتتى. وسىعان بايلانىستى كوپ پارتيالىلىقتى ودان ءارى دامىتۋ, قوعامدىق كەلىسىمدى ساقتاۋ, حالىقپەن ءتيىمدى بايلانىس ورناتۋ, ميتينگىلەر تۋرالى زاڭنامانى جەتىلدىرۋ سياقتى ماسەلەلەرگە باسا نازار اۋداردى.
پرەزيدەنت ەلىمىزدەگى قوعامدىق كەلىسىمدى نىعايتۋ مەن ۇلتارالىق بايلانىستى جەتىلدىرەتىن ءتىل ماسەلەسىنە دە ەرەكشە توقتالدى. بۇل جونىندە ول: «ەلىمىزدەگى ەتنوستىق توپتاردىڭ ءتىلى مەن مادەنيەتىن دامىتۋعا جاعداي جاساي بەرەمىز. قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن. بىراق مۇنداي دارەجەگە جەتۋ ءۇشىن ءبارىمىز داڭعازا جاساماي, جۇمىلا جۇمىس جۇرگىزۋىمىز كەرەك», دەپ اتاپ كورسەتتى.
پرەزيدەنت ءوز جولداۋىندا سوت پەن قۇقىق قورعاۋ جۇيەسىن جەتىلدىرۋگە, بيزنەستى دامىتۋعا, قارجى رەسۋرستارىن دۇرىس بولۋگە, حالىققا الەۋمەتتىك قولداۋ كورسەتۋگە, ەل ايماقتارى اراسىنداعى تەڭسىزدىكتى جويۋعا جانە باسقا دا حالىقتى تولعانتىپ جۇرگەن ماسەلەلەرگە ەرەكشە كوڭىل بولەدى. ءتىپتى ناقتى مىسالدار كەلتىرىپ, پروبلەمالاردى شەشۋدىڭ ءتيىمدى جولدارىن دا ۇسىنىپ وتىر. مىسالى, «7-20-25» باعدارلاماسىمەن پاتەر الاتىن جاننىڭ ايلىق تابىسى 320 مىڭ تەڭگەدەن كەم بولماۋى كەرەك كورىنەدى. جاعدايى تومەن جاندار وعان قول جەتكىزە المايدى. سوندىقتان وسى جىلدان باستاپ «باقىتتى وتباسى» جاڭا باعدارلاماسى ىسكە قوسىلعان, ول كەزدە اي سايىنعى تولەم 2% جانە العاشقى جارنا 10%-دى قۇرايتىن كورىنەدى. بۇل, ارينە الدەقايدا ءتيىمدى.
ءبىلىم بەرۋگە بۇرىنعىداي مەملەكەتتىڭ دامۋىنداعى ستراتەگيالىق ءرول بەرىلەدى. وقۋلىقتاردىڭ ساپاسى جانە قالا مەن اۋىل مەكتەپتەرىنىڭ ءبىلىم بەرۋدەگى الشاقتىعى ايتىلدى. سونداي-اق پرەزيدەنت جاس مامانداردى اۋىلعا جىبەرۋدىڭ مەحانيزىمدەرىن ويلاستىرۋ كەرەك ەكەنىن اتاپ ءوتتى. جوعارى وقۋ ورىندارى جۇمىسىنىڭ ساپاسىن جانە عىلىمي-زەرتتەۋلەردىڭ تيىمدىلىگىن ارتتىرۋ ماسەلەسىنە دە توقتالدى.
بۇل جولداۋدىڭ تاعى ءبىر ەرەكشەلىگى, ول قوعام مەن بيلىكتىڭ ءوزارا ىقپالداسقان ءىس-قيمىلىنىڭ وسى ءتۇرى نەعۇرلىم ءتيىمدى ەكەنىن ەسكەرتىپ, ازاماتتاردى اشىق ديالوگقا شاقىرۋى. پرەزيدەنت شەشىمىن كۇتىپ تۇرعان ماسەلەلەردى دە اشىق ايتىپ, دالەل كەلتىرە وتىرىپ سىنادى دا. مىسالى, كەيىنگى 5 جىلدا اتاۋلى الەۋمەتتىك كومەكتى قاجەت ەتەتىندەر 77 مىڭ ادامنان 1,4 ملن ادامعا جەتكەندىگى جانە وعان بولىنەتىن قارجىنىڭ دا 2017 جىلدان باستاپ 17 ەسە وسكەندىگىن اتاپ ءوتتى.
وسى ءتارىزدى وزەكتى, شەشىمىن كۇتىپ تۇرعان ماسەلەلەردىڭ بار ەكەنىن اشىق ايتا كەلە, ولاردى شەشۋدىڭ ۇتىمدى جولدارىن دا ۇسىندى, بۇل حالىقتىڭ كوڭىلىنەن شىعادى دەگەن ويدامىن.
باقىتقالي مۇسابەكوۆ,
قاراعاندى وبلىستىق «رۋحاني جاڭعىرۋ» جوبالىق كەڭسەسىنىڭ باس مەنەدجەرى
