جارياعا جار سالار جاقسىلىعىمىز
جۇما, 15 ناۋرىز 2013 1:33
ەلىمىزدىڭ الەم جۇرتشىلىعى الدىنداعى ابىرويىنىڭ اسقاق ەكەنىن, تاعى ءبىر دالەلدەگەن ءسات, كۇنى كەشە فرانتسيا جەرىندە وتكەن حالىقارالىق كورمەلەر بيۋروسى باس اسسامبلەياسىنىڭ 152-ءشى سەسسياسى بارىسىندا قازاق حالقىنىڭ مارتەبەسىن كوككە جەتكىزگەن EXPO حالىقارالىق كورمەسى 2017 جىلى ەۋرازيا جۇرەگى استانا قالاسىندا وتەتىندىگى ءمالىم بولعانى بارشامىزعا ايان.
جۇما, 15 ناۋرىز 2013 1:33
ەلىمىزدىڭ الەم جۇرتشىلىعى الدىنداعى ابىرويىنىڭ اسقاق ەكەنىن, تاعى ءبىر دالەلدەگەن ءسات, كۇنى كەشە فرانتسيا جەرىندە وتكەن حالىقارالىق كورمەلەر بيۋروسى باس اسسامبلەياسىنىڭ 152-ءشى سەسسياسى بارىسىندا قازاق حالقىنىڭ مارتەبەسىن كوككە جەتكىزگەن EXPO حالىقارالىق كورمەسى 2017 جىلى ەۋرازيا جۇرەگى استانا قالاسىندا وتەتىندىگى ءمالىم بولعانى بارشامىزعا ايان.
حالىقارالىق كورمە وتكىزۋگە نيەت بىلدىرگەن 6 مەملەكەت ىشىنەن ىرىكتەلىپ الىنعان بەلگيانىڭ لەج قالاسى مەن قازاق ەلىنىڭ ماقتانىشىنا اينالعان استانا قالاسى بولاتىن. وسىنداي تارتىستى بايگەدە قازاق جۇرتىنىڭ سەنىم ارتىپ, ۇكىلەپ قوسقان بايگە اتى سۇرىنبەي ءوز بەلەسىن باعىندىردى دەپ ايتساق ارتىق بولماس. حالىقارالىق كورمەلەر بيۋروسى باس اسسامبلەياسىنىڭ 152-ءشى سەسسياسىنا قاتىسقان مەملەكەتتەردىڭ 103 داۋىسىن سەنىمدى تۇردە ءوز قورجىنىنا جيناعان قازاقستاننىڭ مەرەيلى داڭقى قۇرلىققا تاعى ءبىر جەتىستىگىمەن ءمالىم بولدى. بۇل يگى شارا قازاقستان حالقىنا تەك قانا جەتىستىك الىپ كەلەتىن, جاۋاپكەرشىلىگى مول الەمدىك دەڭگەيدەگى ورنى ەرەكشە جيىن ەكەنى بارشاعا بەلگىلى. اتالعان شارا 2017 جىلدىڭ 10 شىلدەسىندە باستالىپ, سول جىلدىڭ 10 قىركۇيەگىنە دەيىن جالعاسادى. جەر شارىنىڭ 100-دەن استام ەلىنەن 3-4 ميلليونعا تارتا ادام ەلىمىزدىڭ ءجۇرەگى استاناعا اياق باساتىنى ءمالىم. وسىناۋ جاۋاپكەرشىلىكتى موينىنا ەش كۇمانسىز سەنىممەن العان الاش ەلى بارشاعا ءوزىنىڭ كەڭ پەيىلىمەن قوناقجايلىلىعىن پاش ەتە وتىرىپ, الەمدى تولعاندىرعان «بولاشاقتىڭ ەنەرگياسى» تۋرالى ماسەلەنى كوتەرمەك.
استاناداعى ەحرو-2017 كورمەسى تمد ەلدەرى مەن ورتالىق ازيا اۋماعىنداعى ەڭ العاشقى حالىقارالىق دەڭگەيدەگى وتكىزىلەتىن كورمەگە اينالادى. بۇل دەگەن ءسوز – ەلىمىزدىڭ قۇرلىق اراسىنداعى مارتەبەسىنىڭ وق بويى جوعارى ەكەندىگىن كورسەتەدى. بۇل جەڭىسكە قول جەتكىزۋىمىز تاۋەلسىز ەلىمىزدىڭ 20 جىل ىشىندەگى جەتكەن جەتىستىكتەرىنىڭ ءبىر پاراسى بولارى انىق.
2010 جىلى ەقىۇ سامميتىنە توراعالىقتى جانە 2011 جىلى ازيادانى جوعارى دارەجەدە ۇيىمداستىرىپ, وتكىزە بىلگەن الاش ولكەسىنە جاھان حالقى تاعى دا ۇلكەن سەنىم بىلدىرۋدە. قازاقستاننىڭ الەم الدىندا وسىنداي ابىرويلى مارتەبەگە جەتۋى ەلباسىمىزدىڭ ەرەن ەڭبەگى مەن ساليقالى ساياساتىنىڭ جەمىسى دەپ تولىعىمەن ايتا الامىز. بارشا ادامزات بالاسىنىڭ تىنىشتىقتا عۇمىر كەشۋىنە ۇلگى بولارلىق ۇلكەن باستاما جاساپ, سەمەي اتوم يادرولىق پوليگونىن جابۋ ءۇشىن جاساعان تەڭدەسسىز ەڭبەگىن الەم جۇرتشىلىعى جوعارى باعالادى.
تەك قازاق ەلىنىڭ عانا ەمەس, بارلىق عالامدى تولعاندىرعان وزەكتى ماسەلەلەردى شەشۋگە بەلسەندى اتسالىسىپ, ۇتىمدى وي تاستاي ءبىلەتىن ەلباسىمىزعا, بۇكىل ەل «بولاشاقتىڭ ەنەرگياسى» تاقىرىبىندا وتەتىن حالىقارالىق كورمەدە قۋات تاپشىلىعىنان شىعۋدىڭ بىردەن-ءبىر جولىن ۇسىناتىنىنا ەش كۇمانسىز سەنىممەن قاراۋدا. بۇل بەلەستى دە باعىندىراتىنىمىزعا كامىل سەنەمىن. ەندىگى تىلەك ءبىر جاعادان باس, ءبىر جەڭنەن قول شىعارا وتىرىپ, ەلىمىزدە وتكەلى جاتقان تاريحي ماڭىزى مەن كەلەر ۇرپاققا بەرەرى مول بۇل كورمەنى ويداعىداي وتكىزۋگە بارلىعىمىز اتسالىسۋىمىز قاجەت دەپ ەسەپتەيمىن.
اقبۇلان سالبەك ۇلى.
اقمولا وبلىسى,
قورعالجىن اۋدانى.
