«قولجەتىمدى باسپانا»: ول قانشالىقتى قولجەتىمدى؟
سەيسەنبى, 26 اقپان 2013 7:33
باسپانالى بولۋ – باسىم جۇرتتىڭ «باس اۋرۋى». ولاي دەيتىنىمىز, قازىرگى كۇنى قانشا تىراشتانىپ ەڭبەكتەنسەڭ دە, تاپقان-تايانعانىڭ بىردەن ءۇي ساتىپ الۋعا ءبارىبىر جەتپەيدى. پاتەر قۇنى قىمبات. جىل وتكەن سايىن باسپانا باعاسى وسپەسە كەميتىن ەمەس. ونى وتكەن جىلدىڭ ستاتيستيكا مالىمەتتەرى دە دالەلدەپ وتىر. ماسەلەن, 2012 جىلى جاڭا تۇرعىن ءۇيدى ساتۋ قۇنى – 12,1 پايىزعا, جايلى باسپانانى جالعا بەرۋ – 14,4 پايىزعا قىمباتتاعان. ارينە, باعاعا ءارتۇرلى فاكتورلار اسەر ەتەدى. قۇرىلىس ماتەريالدارىنىڭ, جەر تەلىمدەرىنىڭ قىمباتتىعى, سونداي-اق, وعان قاجەتتى ينفراقۇرىلىمداردى ورناتۋ دا وڭايعا سوقپاي وتىرعاندىعى, جالپى ەلىمىزدە قۇرىلىس يندۋسترياسىنىڭ كەنجە دامىعاندىعى دەيمىز, ايتەۋىر قىمباتشىلىققا سەبەپ كوپ.
سەيسەنبى, 26 اقپان 2013 7:33
باسپانالى بولۋ – باسىم جۇرتتىڭ «باس اۋرۋى». ولاي دەيتىنىمىز, قازىرگى كۇنى قانشا تىراشتانىپ ەڭبەكتەنسەڭ دە, تاپقان-تايانعانىڭ بىردەن ءۇي ساتىپ الۋعا ءبارىبىر جەتپەيدى. پاتەر قۇنى قىمبات. جىل وتكەن سايىن باسپانا باعاسى وسپەسە كەميتىن ەمەس. ونى وتكەن جىلدىڭ ستاتيستيكا مالىمەتتەرى دە دالەلدەپ وتىر. ماسەلەن, 2012 جىلى جاڭا تۇرعىن ءۇيدى ساتۋ قۇنى – 12,1 پايىزعا, جايلى باسپانانى جالعا بەرۋ – 14,4 پايىزعا قىمباتتاعان. ارينە, باعاعا ءارتۇرلى فاكتورلار اسەر ەتەدى. قۇرىلىس ماتەريالدارىنىڭ, جەر تەلىمدەرىنىڭ قىمباتتىعى, سونداي-اق, وعان قاجەتتى ينفراقۇرىلىمداردى ورناتۋ دا وڭايعا سوقپاي وتىرعاندىعى, جالپى ەلىمىزدە قۇرىلىس يندۋسترياسىنىڭ كەنجە دامىعاندىعى دەيمىز, ايتەۋىر قىمباتشىلىققا سەبەپ كوپ.
ءيا, بۇگىندە قولما-قول اقشاعا ءۇي ساتىپ الۋ دەگەنىڭىز ۇلكەن ارمان. تەك يپوتەكا, نەسيە الىپ, نەمەسە ايلىق جالاقىڭنان باسقا قانداي دا ءبىر قوسىمشا قارجى كوزىن تاۋىپ بارىپ قول جەتكىزبەسەڭىز, باسپانا ساتىپ الۋعا قاجەتتى سوما قازىر قاراپايىم جۇمىسشىنىڭ ءوڭى تۇگىلى تۇسىنە دە كىرە بەرمەيدى. حالىقتىڭ كوپشىلىگى بانكتەن قارىز الىپ قانا ءۇي الىپ ءجۇر. ال بىزدەگى بانكتەردىڭ كرەديتتىك ستاۆكالارى ءوزى قىمبات ءۇيدى ودان سايىن شارىقتاتىپ وتىرعانى شىندىق. ونى تومەندەتۋگە مەملەكەت بارىنشا تىرىسىپ باعۋدا. سونىڭ ناتيجەسىندە ەندى ءبىر قاۋىم ەل مەملەكەتتىك باعدارلامالاردىڭ مۇمكىندىكتەرىن پايدالانۋمەن باسپانالى بولىپ وتىر. حالىق «ايتەۋىر ءبىر نارسەسىنە ىلىگىپ قالارمىز با» دەۋمەن مەملەكەتتىك باعدارلامالارعا ۇلكەن ءۇمىت ارتىپ وتىراتىندىعى دا وسىدان.
جۇرت باسپانا جايىندا جىلت ەتكەن جاڭالىققا دا قۇلاق تۇرە قارايدى. ماسەلەن, جاڭا جىلدان بەرى ءجيى ايتىلىپ, ەلدى ەلەڭ ەتكىزگەن «قولجەتىمدى باسپانا-2020» باعدارلاماسىنىڭ ءجونى بولەك. اسىرەسە, باعدارلامادا باسىمدىق بەرىلگەن جاس وتباسىلارعا ارنالعان جەڭىلدىكتەر كىم-كىمدى دە قىزىقتىرعانداي.
نەگىزىنەن ەلىمىزدە باسپانا ماسەلەسىن شەشۋگە از كۇش جۇمسالىپ جاتقان جوق. وسى رەتتە ەلىمىز تاۋەلسىزدىك العاننان بەرى بۇل سالانى دامىتۋ ماقساتىندا بىرنەشە ماڭىزدى قۇجاتتار قابىلداندى. ايتالىق, تۇرعىن ءۇي قۇرىلىسىن دامىتۋدىڭ 2005-2007 جىلدارعا ارنالعان مەملەكەتتىك باعدارلاماسى, 2008-2010 جىلدارعا, 2011-2014 جىلدارعا ارنالعان باعدارلامالار حالىقتى باسپانامەن قامتۋدى باستى مىندەت ەتتى. الايدا, نەگىزگى بولىگى الەمدى الەككە سالعان قارجى داعدارىسىنا شارپىلعان بۇل باعدارلامالار حالىقتىڭ ەكونوميكالىق جاعىنان بەلسەندى نەگىزگى توپتارى ءۇشىن تۇرعىن ءۇيدىڭ قولجەتىمدىلىگىن تولىق قامتاماسىز ەتۋگە مۇمكىندىك بەرە المادى. ايتسە دە, بۇل باعدارلامالار بىزدەگى باسپانا پروبلەماسىنىڭ ءتۇيىنىن تارقاتۋعا جاسالعان قادامداردىڭ العاشقى ساتىلارى بولاتىن. وسى باعدارلامالاردىڭ اياسىندا ۇكىمەتتەن قىرۋار قارجى ءبولىنىپ, بۇل سالاعا قان جۇگىردى دەي الامىز. دەرەكتەرگە سۇيەنە سويلەسەك, 2011 جىلى قارجىلاندىرۋدىڭ بارلىق كوزدەرى بويىنشا 6,5 ملن. شارشى مەتر تۇرعىن ءۇي پايدالانۋعا بەرىلدى, ول جوسپارلانعان ىسكە قوسۋ كولەمىنەن 8,3 پايىزعا ارتىق.
ەلباسى وتكەن جىلعى حالىققا جولداۋىندا جىل سايىن جالعا بەرىلەتىن تۇرعىن ءۇيدىڭ كولەمىن 1 ملن. شارشى مەترگە جەتكىزۋدى جانە ساتىپ الۋ قۇقىعىمەن جالداۋ تەتىگىن, سونداي-اق قۇرىلىس يندۋسترياسىن دامىتۋ جونىندەگى كەشەندى شارالاردى كوزدەيتىن بىرىڭعاي «قولجەتىمدى باسپانا – 2020» باعدارلاماسىن ازىرلەۋدى تاپسىردى. وسىلايشا, 2012 جىلدىڭ شىلدەسىنەن باستاپ اتالمىش باعدارلاما ىسكە قوسىلعان بولاتىن.
ەلباسى 2010 جىلعى جولداۋىندا دا 2011-2014 جىلدارعا ارنالعان تۇرعىن ءۇي باعدارلاماسىن ىسكە اسىرۋدى تاپسىرىپ, سونىڭ ناتيجەسى بويىنشا تازا ارلەنگەن تۇرعىن ءۇيدىڭ ءبىر شارشى مەترىنىڭ قۇنى الماتى جانە استانا قالالارىندا 142,5 مىڭ, اقتاۋ, اتىراۋ جانە وسكەمەن قالالارىندا 112,5 مىڭ تەڭگە, ال قالعان وڭىرلەردە 90 مىڭ تەڭگە شەگىندە بولاتىن قازاقستاننىڭ «تۇرعىن ءۇي قۇرىلىس جيناق بانكى» ارقىلى جەرگىلىكتى اتقارۋشى ورگانداردىڭ قاتىسۋىمەن كرەديتتىك تۇرعىن ءۇي سالۋدىڭ جاڭا جۇيەسى ازىرلەنگەن ەدى. ال بيىلدان باستاپ ناقتى ىسكە قوسىلعان «قولجەتىمدى باسپانا-2020» باعدارلاماسىنىڭ ەكى باعىتى «تۇرعىن ءۇي قۇرىلىس جيناق بانكىنىڭ» وسى جۇيەسى نەگىزىندە جۇزەگە اسىرىلماق.
قولجەتىمدى باسپانا باعدارلاماسى ىسكە قوسىلدى دەگەننەن-اق حالىقتىڭ كوپشىلىگى بۇل باعدارلامانى جۇزەگە اسىراتىن تەك وسى بانك ەكەن دەپ ويلاۋلارى دا ورىندى. سەبەبى, قاراپايىم حالىققا قاتىستى باعىتتار نەگىزىنەن وسى بانككە جۇكتەلگەن.
جالپى, باعدارلاما التى باعىت بويىنشا جۇمىس ىستەيدى. ونى ءارتۇرلى وپەراتورلار جۇزەگە اسىرادى. ماسەلەن, «قازاقستاندىق يپوتەكالىق كومپانيا» يپوتەكالىق ۇيىمى», «سامۇرىق-قازىنا» جىلجىمايتىن م ۇلىك قورى» اكتسيونەرلىك قوعامدارى, جەرگىلىكتى اتقارۋشى ورگاندار جانە تاعى باسقالار. ال ەكى باعىت «تۇرعىن ءۇي قۇرىلىس جيناق بانكىنە» تيەسىلى. ونىڭ ءبىرىنشىسى – حالىقتىڭ بارلىق ساناتتارى ءۇشىن تۇرعىن ءۇي, ەكىنشىسى – جاس وتباسىلارعا ارنالعان تۇرعىن ءۇي دەپ اتالادى.
«ءبىرىنشى باعىت بويىنشا جەرگىلىكتى اتقارۋشى ورگاندار ءۇي سالىپ, ونى «تۇرعىن ءۇي قۇرىلىس جيناق بانكى» ارقىلى بارلىق ساناتتاعى ادامدارعا ساتادى. ياعني جەرگىلىكتى اكىمدىك رەسپۋبليكالىق بيۋدجەت قورىنىڭ نەسيەسى ارقىلى تۇرعىن ءۇي قۇرىلىستارىن جۇرگىزەدى. تۇرعىن ءۇي ساتىپ الۋعا تىلەك بىلدىرۋشىلەر ءتىزىمىن قۇراستىرۋ ناقتى ءبىر ءۇيدىڭ قۇرىلىسىن سالۋ كەزەڭىندە باستالادى», دەپ تۇسىندىرەدى كەڭەسشى ماماندار. ەندى «تۇرعىن ءۇي قۇرىلىس جيناق بانكىنىڭ» كەڭەسشى ماماندارى بەرگەن مالىمەتتەر بويىنشا باعدارلاما ەرەجەلەرىنە نازار اۋدارايىق. الدىمەن تۇرعىن ءۇي قۇرىلىس جيناق جۇيەسىنىڭ قاتىسۋشىلارى ءۇشىن ناقتى ءۇي قۇرىلىسىن سالۋ تۋرالى اكىمدىكپەن كەلىسىمگە قول قويعاننان كەيىن بانك باسپاسوزدە جانە بانكتىڭ سايتىندا ناقتى ءبىر ءۇي بويىنشا تۇرعىن ءۇي ساتىپ الۋشىلار پۋلىنا قاتىسۋعا وتىنىشتەر قابىلداۋ باستالعاندىعى تۋرالى حابارلاندىرۋ جاريالايدى. وتىنىشتەر قابىلداۋ 2 ايعا سوزىلادى. جينالعان وتىنىشتەردىڭ ىشىنەن تۇرعىن ءۇي قۇرىلىس جيناق جۇيەسىنە قاتىسۋدىڭ ۇزاقتىعى مەن ساپاسى ەسەپكە الىنا وتىرىپ, بالل جۇيەسىنە سايكەس ەڭ كوپ بالل جيناعان, سالىنىپ جاتقان پاتەر سانىنا تەڭ قاتىسۋشىلار سانى ىرىكتەلىپ الىنادى. مىسالى, 300 پاتەرلى ءۇي سالىنسا, ال تۇسكەن ءوتىنىش سانى 600 بولسا, وندا تىزىمگە ەڭ كوپ بالل جيناعان 300 ءوتىنىش بەرۋشى ەنگىزىلەدى. قالعاندارى «رەزەرۆتىك» تىزىمدە قالادى. ەڭ كوپ بالل جيناعان ءوتىنىش بەرۋشىلەر پاتەردى ساتىپ الۋ ءۇشىن تولەم قابىلەتىن راستايتىن ءتيىستى قۇجاتتاردى بەرەدى. ەگەر كىمدە-كىم ءوزىنىڭ تولەم قابىلەتىن راستاي الماعان جاعدايدا, ءوتىنىش بەرۋشىلەر سانىن تولىقتىرۋ «رەزەرۆتىك» تىزىمنەن جۇزەگە اسىرىلادى. ءارى قاراي تۇرعىن ءۇيدى ءبولۋ پروتسەدۋراسى جۇرگىزىلەدى – تولەم قابىلەتىن راستاعانداردىڭ ءتىزىمى قۇراستىرىلادى.
ەگەر سالىمشىنىڭ ءۇيدى ساتىپ الۋعا قالتاسى كوتەرمەسە, بىراق سالىمداردى جينايتىن جانە ءۇيدىڭ جالدىق اقىسىن تولەي الاتىن قابىلەتى بولسا, وندا تۇرعىزىلعان ءۇي وعان ۇزاق مەرزىمگە 8 جىلعا جالعا بەرىلەدى. بۇل ۋاقىت ارالىعىندا جالعا الۋشى تومەن پايىزبەن تۇرعىن ءۇي زاەمىن الۋ ءۇشىن تۇرعىن ءۇي جيناقتارىن جيناپ وتىرۋى ءتيىس.
قتقجب-نىڭ سالىمشىسى 1 شارشى مەتردىڭ قۇنى 90 مىڭ تەڭگەگە باعالانعان جالپى كولەمى 60 شارشى مەتردى قۇرايتىن ءۇيدى الدىن-الا تۇرعىن ءۇي زاەمى ارقىلى يەلەنگىسى كەلەتىن بولسا, وندا ونىڭ 8 جىل بويى اي سايىن تولەيتىن تولەمى 66 مىڭ 800 تەڭگە بولماق. بۇل جەردە ەسكەرەتىنى سالىمشى 38 مىڭ 250 تەڭگەنى زاەم بويىنشا پايىزدى تولەسە, 28 مىڭ 620 تەڭگەمەن جيناق سالىمدارىن تولىقتىرىپ وتىرۋى ءتيىس. كەيىن الدىن-الا تۇرعىن ءۇي زاەمى تۇرعىن ءۇي نەسيەسىمەن قايتا قارجىلاندىرىلادى دا اي سايىنعى تولەمى 18 مىڭ 900 تەڭگەگە تومەندەيدى.
ءبىر ەسكەرە كەتەتىن ماسەلە, بانكتىڭ سالىمشىلارى مەملەكەت ۇسىنعان پاتەرلەردەن قۇر قالسا ءۇيسىز قالامىز دەگەن ويدان اۋلاق بولعانى ءجون. ەگەر, اكىمدىكتىڭ ءۇيىن كۇتكىسى كەلمەسە بانكتىڭ كەز كەلگەن سالىمشىسى پاتەر قۇنىنىڭ 50 پايىزىن جيناعان سوڭ, قالعان ەلۋ پايىزىن بانكتەن نەسيەگە الىپ (4,5-5 پايىزبەن), بۇرىنعىداي ءوزى قالاعان قۇرىلىس كومپانيالارىنان دا ساتىپ الا الادى.
حالىق اراسىندا «تۇرعىن ءۇي قۇرىلىس جيناق بانكىنە» سالىمشى بولساڭ بولدى, مەملەكەتتىك باعدارلامامەن ءۇيلى بولا قالاسىڭ دەگەن تۇسىنىك تە جوق ەمەس. بىراق بۇگىن دەپوزيت اشىپ, ەرتەڭ-اق مەملەكەتتىك باعدارلامامەن ءۇي الا قويۋ مۇمكىن ەمەس. سەبەبى, بانكتە سىزگە دەيىن قانشاما سالىمشى بار جانە ءار ءۇيدىڭ قۇرىلىسى بىتكەن سايىن ولار باللدىق جۇيەمەن ىرىكتەلىپ وتىرادى. بىراق بۇل باعدارلاما 2020 جىلعا دەيىن جالعاساتىنىن ەسكەرسەك, بانك سالىمشىلارى مەملەكەتتىك باعدارلاماعا قازىر بولماعانىمەن بىرتىندەپ رەتىمەن ىلىگەتىنىنە سەنىم ارتۋعا بولادى. سەبەبى, باعدارلاما اياسىندا 2012-2020 جىلدارى جالپى الاڭى 69050,0 مىڭ شارشى مەتر, ونىڭ ىشىندە 2012 جىلى – 6050,0 مىڭ شارشى مەتر, 2013 جىلى – 6600,0 مىڭ شارشى مەتر, 2014 جىلى – 6900,0 مىڭ شارشى مەتر, 2015 جىلى – 7200,0 مىڭ شارشى مەتر, 2016 جىلى – 7600,0 مىڭ شارشى مەتر, 2017 جىلى – 7700,0 مىڭ شارشى مەتر, 2018 جىلى – 8000,0 مىڭ شارشى مەتر, 2019 جىلى – 9000,0 مىڭ شارشى مەتر, 2020 جىلى 10000,0 مىڭ شارشى مەتر تۇرعىن ءۇي سالۋ جوسپارلانىپ وتىر.
«تۇرعىن ءۇي قۇرىلىس جيناق بانكىنىڭ»ەكىنشى باعىتى جاس وتباسىلاردىڭ الەۋمەتتىك ماسەلەسىن شەشۋگە باعىتتالعان. جەرگىلىكتى اتقارۋشى ورگاندار جاس وتباسىلارعا جالعا بەرىلەتىن ءۇي سالىپ, ونى ۇزاق مەرزىمگە جالعا بەرەدى. 8 جىلعا جالعا بەرىلگەن پاتەردە تۇرىپ جاتقان ۋاقىت ىشىندە جاس وتباسى پاتەردى ساتىپ الۋ ءۇشىن «تۇرعىن ءۇي قۇرىلىس جيناق بانكىنەن» تومەن پايىزبەن بەرىلەتىن نەسيەگە قول جەتكىزۋ ءۇشىن جيناق سالىمدارىن تۇرعىن ءۇي قۇرىلىس جيناق جۇيەسىندە اشقان ەسەپ-شوتىنا ۋاقتىلى جيناقتاپ وتىرۋى كەرەك.
جاس وتباسىلارعا قويىلاتىن باستى تالاپتار, بىرىنشىدەن, ەرلى-زايىپتىلاردىڭ ەكەۋىنىڭ دە جاسى 29-دان اسپاعان بولۋى كەرەك. وسى جەردە جاستاردىڭ كوپشىلىگى تۇسىنبەي جۇرگەن ءبىر سۇراق, جاسى 29-داعىلار قاتىسا ما جوق پا دەگەندە بولىپ وتىر. ال 29-عا تولعان ادام سول كۇننەن باستاپ 29-دان اسقان بولىپ ەسەپتەلەدى. سونداي-اق, نەكەنىڭ تىركەلگەن كەزەڭى 2 جىلدان كەم ەمەس, ەرلى-زايىپتىلاردىڭ جانە ولاردىڭ وتباسى مۇشەلەرىنىڭ مەنشىك قۇقىعىندا باسپانانىڭ بولماۋى, ەرلى-زايىپتىلاردىڭ ەكەۋىنىڭ دە ارىز بەرگەن ەلدى مەكەن بويىنشا تىركەۋلەرىنىڭ بولۋى ءتيىس.
ەندى ازداپ ەسەپكە جۇگىنەيىك. جاس وتباسى قۇنى 5 ميلليون 400 مىڭ تەڭگەنى قۇرايتىن كولەمى 60 شارشى مەتردەن ء(بىر شارشى مەترى 90 000 مىڭ دەپ ەسەپتەگەندە) تۇراتىن باسپانانى ساتىپ الماس بۇرىن, بىرىنشىدەن, 8 جىل بويى ەسەپ-شوتقا كەلىسىم-شارت بويىنشا ەسەپتەلگەن 28 مىڭ 620 تەڭگەنى سالىم رەتىندە جيناقتاپ وتىرۋى ءتيىس. ال پاتەردىڭ جالعا بەرىلۋ قۇنى ءار 1 شارشى مەتر ءۇشىن 100 تەڭگە بولادى. ەگەر بەلگىلەنگەن ءتارتىپ بويىنشا جيناقتاۋ شوتىنا سالىمدار سالىنبايتىن بولسا, وندا باسپانانى جالعا العان تۇلعا ءۇيدى بوساتۋى ءتيىس. ياعني جالعا العان پاتەردە تۇرىپ جاتىپ سالىمشى ءۇش اي بويىنا دەپوزيتكە سالىم سالماسا, ءۇيدى ساتىپ الاتىن تۇرعىن ءۇي زاەمىن الۋ مۇمكىندىگى بولمايدى دەپ ەسەپتەلەدى. سوندىقتان, بولاشاقتا ءۇي الامىن دەگەن وتباسى قالايدا اي سايىنعى ءوزى ءۇشىن دەپوزيتىن تولەپ تۇرۋى ءتيىس.
8 جىل ۋاقىت وتكەننەن كەيىن ءارى شارت ورىندالعان سوڭ پاتەردى جەكە مەنشىككە ساتىپ الۋ ءۇشىن بانك تاراپىنان 4 پايىزبەن 15 جىلعا تۇرعىن ءۇي زاەمى بەرىلەدى. ال بۇل نەسيەنى وتەۋ ءۇشىن ون بەس جىل بويى اي سايىن 18 مىڭ 900 تەڭگە تولەپ وتىرۋ قاجەت.
سونىمەن قاتار, باعدارلامادا جالعا بەرىلەتىن باسپاناعا كىرۋ ءۇشىن جالعا الۋشى ءوزىنىڭ جيناق شوتىنا 6 ايلىق مولشەرىندە كەپىلدەنگەن جارناسىن قۇيۋى ءتيىس دەلىنگەن باعدارلامادا. ءبىزدىڭ ەسەپتەۋىمىزشە, بۇل كەم دەگەندە 170-180 مىڭ تەڭگە. ال بۇل باعىت بويىنشا قۇجاتتار تاپسىرۋ جەرگىلىكتى حالىققا قىزمەت كورسەتۋ ورتالىقتارى ارقىلى جۇزەگە اسادى.
ارينە, قازىرگى كۇنى ءبىر بولمەلى پاتەردى 60-70 مىڭعا جالداپ تۇرىپ جاتقان جاستار ءۇشىن بۇل ۇلكەن كومەك, بولاشاقتا پاتەرلى بولۋدىڭ بىردەن-ءبىر جولى. مەملەكەت تاراپىنان جاسالىپ وتىرعان زور قامقورلىق, مول مۇمكىندىك. الايدا قازىرگى كۇنى 25-26 جاستارىندا ۇيلەنىپ ۇلگەرگەن جاستارىمىز از. ەندەشە, بۇل باعدارلاما دا بارلىق جاس وتباسىلاردى جارىلقاي الماسى انىق. سەبەبى, باعدارلامادا جاس وتباسىلاردىڭ نەكەگە تۇرعاندارىنا ەكى جىل ۋاقىت تولىپ, ەرلى-زايىپتىلاردىڭ جاسى 29-عا تولماعان بولۋى كەرەك دەلىنگەن. ولاي بولسا, بىزدەگى باسپاناسىز جۇرگەن جاس وتباسىلار ءۇيلى بولۋ ءۇشىن تاعى ءبىر جاڭا باعدارلاما كەرەك-اۋ وسى, بولماسا, باياعى زامانداعىداي ەرتە ۇيلەنىپ, بالالى-شاعالى بولۋعا تىرىسۋ قاجەت…
دينارا بىتىكوۆا,
«ەگەمەن قازاقستان».
——————————
سۋرەتتى تۇسىرگەن
ەرلان وماروۆ.
