– جانەل, سەنى كۇرەس تۇرلەرىمەن, سونىڭ ىشىندە دزيۋدو جانە قازاق كۇرەسىمەن شۇعىلدانادى دەپ ەستىگەنمىن. سەن سياقتى نازىك قىزدىڭ ءدال مۇنداي جەكپە-جەك تۇرلەرىنە قالاي دەن قويىپ جۇرگەنىن بىلگىم كەلەدى.
– سپورتپەن شۇعىلدانا باستاعانىما ەكى جىلداي بولدى. العاش 9 سىنىپتا كۇرەس ۇيىرمەسىنە باردىم. ول كەزدە كاسىبي تۇرعىدا قانداي دا ءبىر جەتىستىككە جەتەمىن دەگەن ماقسات بولعان ەمەس. تەك قانداي جاعدايدا دا ءوز ءوزىمدى قورعاي الۋىم كەرەك دەپ شەشىپ, جەكپە-جەكتى تاڭدادىم.
– جەكپە-جەكتىڭ وزگە دە تۇرلەرى بار عوي, كۇرەس نەسىمەن قىزىقتىردى؟
– ءوزىم شىعىس قازاقستان وبلىسىنىڭ زايسان قالاسىنىڭ تۋماسىمىن. ءبىزدىڭ كىشكەنتاي قالادا كۇرەس تۇرلەرىنە قىزىعۋشىلىق جوعارى. ونىڭ ۇستىنە ءۇيدىڭ جانىندا كۇرەس ۇيىرمەسى بار. باستاپقىدا اتا-انام سپورتقا دەن قويعانىما قارسى بولدى. كۇرەس قىز بالاعا ارنالماعان دەگەن سىڭايداعى ءبىراز پىكىر ايتىلدى. بىراق ءوزىم ىشتەي شەشىم قابىلداپ قويعان ەدىم, سوندىقتان ايتقانىمنان قايتپايمىن دەدىم. ەرىككەننەن ەمەس, وزىمە ۇنايتىن بولعاندىقتان ۋاقىت ءبولىپ جۇرگەنىمدى تۇسىنگەن سوڭ ۇيدەگىلەر دە قولداۋ كورسەتە باستادى.
– العاشقى جەتىستىكتەرىڭ دە سەبەپ بولعان شىعار...
– مۇمكىن. كۇرەسكە قاتىسا باستاعان سوڭ اراعا جارتى جىلداي ۋاقىت سالىپ وبلىستىق بىرىنشىلىككە قاتىسىپ, ەكىنشى ورىن الدىم. ءۇش جەكپە-جەك وتكىزىپ, سونىڭ بىرەۋىندە جەڭىلدىم. العاشقى جارىسىم عوي, كادىمگىدەي ۋايىمداپ, قوبالجىدىم. بىراق سايىس باستالعان سوڭ ونىڭ ءبارى ۇمىتىلدى. فينالدا جەڭىلىس تاپقاندا كوڭىل كۇيىم ءتۇستى.
– ال دوستارىڭ سەنىڭ قىزىعۋشىلىعىڭا قالاي قارايدى؟ سەنىڭ قاتارىڭا قوسىلعاندار بار ما؟
– قاتارلاستارىمنىڭ ءبىرازى تاڭعالعان. اسىرەسە قىزداردىڭ اراسىندا «كۇرەس ءتۇرىن نەگە تاڭدادىڭ؟» دەپ سىن ايتقاندار كوپ بولدى. ۇنەمى قولىڭ بوسامايدى: ساباق, ودان سوڭ جاتتىعۋ نە جارىس. «سوڭعى جىل عوي, بىزبەن نەگە قىدىرمايسىڭ» دەپ رەنجيتىندەردى ەستىدىم. جارىس دەپ ءجۇرىپ تالاي قىزىقتان قالىس قالدىم. بىراق بۇل مەنىڭ تاڭداۋىم. ۋاقىت وتە بىرنەشە قۇربىم دا كۇرەسپەن شۇعىلدانا باستادى.
– قاي سالماقتا كۇرەسەسىڭ؟
– قازىر 48 كيلودا بەلدەسەمىن. باستاپقىدا 44 كيلودا كۇرەسكەنمىن. سالماق قوسۋ دا بەلگىلى ءبىر تارتىپپەن ءجۇرۋى ءتيىس. سوندىقتان تاماقتانۋعا قاتتى كوڭىل بولەمىن. فاستفۋد, گازدالعان سۋسىن, قۋىرىلعان كارتوپتاردى ءبىرجولا پايدالى تاعامدارعا الماستىردىم.
– ال ءبىلىم مەن سپورتتىڭ قايسىسىنا باسىمدىق بەرەسىڭ؟
– مەنىڭشە, ادام الدىمەن ءبىلىمدى بولۋى كەرەك. ساباقتى تاڭداۋىما ۇيدەگىلەردىڭ دە اسەرى بار. ولار ءبىلىم ءبىرىنشى ورىندا تۇرۋى كەرەك دەپ سانايدى. سپورت تا كەرەك. سوندىقتان ءبىلىم مەن سپورت ءبىر-بىرىنە كەدەرگى ەمەس دەپ ويلايمىن. ءبىلىم جولىن قۋاتىنىم انىق, بىراق سونىڭ الدىندا وليمپيادا ويىندارىندا توپ جارسام دەگەن ارمانىم دا جوق ەمەس.
– شاحماتتا دا ءبىراز جەتىستىككە جەتىپسىڭ. وسى تۋرالى ايتا كەتسەڭ...
– اتام ءالى كۇنگە دەيىن زايساندا شاحماتتان شاكىرت تاربيەلەپ ءجۇر. بالا كۇنىمنەن سول كىسىنىڭ شاحمات ويناپ وتىراتىنىن كورىپ وسكەنمىن. مەن دە وينايىنشى دەپ كوپ مازاسىن السام كەرەك, ءبىرتىن-ءبىرتىن شاحماتتىڭ ەرەجەلەرىن ۇيرەتە باستادى. ول كەزدە ءبىرىنشى سىنىپتا وقيتىنمىن. ال بەسىنشى سىنىپتا وبلىستىق جارىسقا قاتىسىپ, ەكىنشى ورىن يەلەندىم. بىلتىر 17 جاسقا دەيىنگىلەر اراسىندا دا ەكىنشى ورىنعا قول جەتكىزدىم. بىراق قازىر تەك ۇيدە وينايمىن. اتام «ساباعىڭا كەدەرگى بولادى» دەپ تۋرنيرلەرگە قاتىسپاعانىمدى ءجون كوردى.
– ال وڭىردە سپورتشىلاردى قولداۋ جاعى قالاي؟
– دزيۋدودان وبلىستىق قۇرامانىڭ مۇشەسىمىن. سوندىقتان بارلىق شىعىندارىمىزدى وبلىستىق باسقارما وتەيدى. بىلتىر كوكتەمدە ەل بىرىنشىلىگىندە توپ جارعالى قازاق كۇرەسىنەن ايەلدەر قۇراماسىندامىن.
– قازاق كۇرەسىنەن قۇراما ساپىندا قانداي دا ءبىر جارىستارعا قاتىسىپ ۇلگەردىڭ بە؟
– ازىرگە تەك وقۋ-جاتتىعۋ جيىندارىمەن شەكتەلىپ ءجۇرمىن. سەبەبى وقۋعا بايلانىستى جارىستارعا قاتىسۋعا ۋاقىت بولمادى. نەگىزى قۇرامامىز جاس. ءوزىم سياقتى قىزدار. ءبىر-بىرىمىزبەن تانىسىپ, ءتىل تابىسىپ ۇلگەردىك.
– جاقىندا شەتەلگە وقۋعا كەتەدى ەكەنسىڭ. سپورتتان قول ءۇزىپ قالامىن دەپ قورىقپايسىڭ با؟
– مەن وقۋعا باراتىن ليتۆادا نەگىزىنەن باسكەتبولعا ەرەكشە دەن قويىلادى ەكەن. كۇرەس تۇرلەرىنە ايتارلىقتاي قىزىعۋشىلىق جوق. ازىرگە باپكەر تاپقان جوقپىن, تەك سول ەلدەگى دزيۋدونىڭ دامۋىمەن تانىسىپ جاتىرمىن. ساباعىمدى رەتكە كەلتىرىپ العان سوڭ, جاتتىعۋدى دا قولعا الامىن. زايسانداعى باپكەرلەرىم دە كومەكتەسىپ تۇراتىندارىن ايتىپ جاتىر. روللان ۋالحانوۆ پەن ولجاس سوتتسيالوۆ سەكىلدى جاتتىقتىرۋشىلارىم «كۇرەستى تاستاما, سول جاقتا تاجىريبە جيناپ, بىزبەن بولىسەسىڭ» دەپ تاپسىرما بەرۋدە.
– نەلىكتەن تاڭداۋ ليتۆاعا ءتۇستى؟
– باستاپقىدا نازارباەۆ ۋنيۆەرسيتەتكە تۇسەمىن دەپ ويلاعانمىن. ەمتيحاننىڭ العاشقى كەزەڭىنەن ءوتتىم دە, تەك ەكىنشى كەزەڭىنە اۋىرىپ قالىپ قاتىسا المادىم. ۇيدەگىلەر ەلدە قالعانىمدى قالاعان. ەۋروپادا مادەنيەت تە, كوزقاراس تا بولەك. مەن جاسپىن. ال ليتۆادا ەلىمىزدەن بارعان ستۋدەنتتەر دە از ەمەس, ءارى ءورىستىلدى تۇرعىندار دا كوپ ەكەن.
كومپيۋتەرلىك باعدارلامالاۋ ماماندىعىن تاڭدادىم, ەمتيحاندى اعىلشىن تىلىندە تاپسىردىق. وزىمە روبوت, زاماناۋي تەحنولوگيا قىزىق. سول سالانىڭ ەلىمىزدە دامۋىنا ۇلەسىمدى قوسسام دەيمىن.
– ادەبي كىتاپ وقۋعا ۋاقىت بولا ما؟
– ارينە الەمدىك كلاسسيكانى ءسۇيسىنىپ وقيمىن. سونىڭ ىشىندە ميحايل بۋلگاكوۆتىڭ «ماستەر جانە مارگاريتا» كىتابى ەرەكشە ۇنايدى.
– سەنىڭ جاسىڭدا بۇل تۋىندى تىم كۇردەلى ەمەس پە؟
– بۋلگاكوۆتىڭ ءتىلىن, ويىن بىردەن ءتۇسىنۋ قيىن. نە ايتقىسى كەلگەنىن ۇعىنۋ ءۇشىن ءبىر سويلەمدى بىرنەشە رەت وقيمىن. بىراق سوندا دا قاتتى ۇنايدى. قاتارلاستارىما دا كەڭەس بەرەمىن.
اڭگىمەلەسكەن ءمادينا اسىلبەك,
جۋرناليست
