مەگاپوليستى دامىتۋدىڭ باستى باعىتتارى شاعىن جانە ورتا بيزنەسكە قولداۋ كورسەتۋ ەكەنىن اتاپ وتكەن اكىم حالىقتىڭ ۇشتەن ءبىرىنىڭ كاسىپكەرلىك سالادا جۇمىس جاسايتىنىن باسا كورسەتتى.
مىسالى, قالانىڭ ءىوو-دە شوب-ءتىڭ تابىسى 40%-دى جانە قالا بيۋدجەتىنىڭ 60%-ىن قۇرايدى. «الماتى» اكك-نىڭ جۇمىسىن وڭتايلاندىرۋ, «Almaty Invest» ينۆەستيتسيا ورتالىعىن جانە قالانىڭ 6 اۋدانىندا فيليالى بار «Qolday» كاسىپكەرلىك ورتالىعىن قۇرۋ شوب-كە قولداۋ كورسەتۋدىڭ ءتيىمدى شارالارى بولىپ تابىلادى.
سونىمەن قاتار, «Almaty Finance» قارجى كومپانياسى جانە شوب-كە سارالانعان پروتسەنتتىك ولشەممەن, قالانىڭ ورتالىق بولىگىنە 7% , ال شەت ايماعىنا 2% مولشەرمەن نەسيە بەرەتىن «Almaty» ميكرونەسيەلىك ۇيىمى جۇمىسىن باستادى. «الماتى بيزنەس-2025» باعدارلاماسى بويىنشا كاسىپكەرلەر بىلىمدەرىن جەتىلدىرۋدە.
اكىم كاسىپكەرلەرگە قارجىلىق كومەكتەن وزگە لوگيستيكادا ينفراقۇرىلىمدىق شەشىمدەر ارقىلى قولداۋ كورسەتىلەتىنىن ايتتى. مىسالى, بايتۇرسىنوۆ جانە قوناەۆ كوشەلەرىندەگى ۆەلوجولدار سىزباسىن وزگەرتۋ ارقىلى شوب-كە قولداۋ جاسالادى, بىراق مۇندا ۆەلوسيپەدشىلەر مۇددەسى ەش شەكتەلمەيدى. باقىتجان ساعىنتاەۆ ءوزىنىڭ سوزىندە كەيبىر الەۋمەتتىك جەلىنى قولدانۋشىلار اكىمدىك شەشىمىنە قاتىستى جالعان اقپاراتتار تاراتاتىنىن اتاپ ءوتتى.
تيميريازوۆ كوشەسى بويىنداعى برت الىنادى, پانفيلوۆ كوشەسىنىڭ كونتسەپتسياسى قايتا قارالادى, قورشاۋلار قايتارىلادى, قالا كوشەلەرىندەگى كولىك جولاقتارى جويىلادى ەكەن دەگەن نەبىر الىپقاشپا سوزدەر پايدا بولۋدا. «ماعان كەيبىر جۋرناليستەر كەلەدى, الەۋمەتتىك جەلىلەر ارقىلى وسى ماسەلەلەرگە قاتىستى ساۋالدار قويادى. الىپقاشپا سوزدەرگە قۇلاق تۇرمەڭىزدەر, ولار جالعان ءارى تۇككە تۇرمايدى. ەشتەڭە جابىلمايدى, وزگەرمەيدى ءارى جويىلمايدى. شىندىققا جاناسپايتىن وسەكتى تاراتۋشىلار حايپقا ۇمتىلۋشىلار», دەپ اتاپ ءوتتى مەگاپوليس اكىمى.
الماتى
