ال ەندى اقىلدان اقشا وزعان مىنا زاماندا ازىپ-توزۋعا اينالعان ادامي اسىل قاسيەتتەردى قالاي قالپىنا كەلتىرەمىز؟ جاۋابى جوق سۇمدىق سۇراق. بالكىم, اڭقاسى كەپكەن ارالدىڭ ارناسى ايتەۋىر ءبىر تولار. قازاقستانىمىز قارىشتاپ, اسپان استىن اۋزىنا قاراتقان الىپ مەملەكەتتەردىڭ قاتارىنا قوسىلار. جانكۇيەرلەرىن جايراڭداتۋىنان قايرانداتۋى كوپ «قايرات» فۋتبولشىلارى ەۋروپانىڭ چەمپيوندار ليگاسىندا توپ جارار. عۇلاما عالىمدار عاسىر ىندەتتەرىن ەمدەيتىن ەرەكشە دارىلەر شىعارار. الاۋىز اعايىندارىمىز جۇزگە, رۋعا بولىنگەندەرىن قويار. ءبارى دە مۇمكىن.
الايدا ادامدىقتىڭ اتى ارىپ, تونى توزسا, بۇل دەرتتىڭ داۋاسى تابىلمايدى. جاھاندى جاۋىزدىق بيلەيدى. بەس قۇرلىقتىڭ بەلىن قايىستىرعان قالىڭ جۇرتتىڭ سورى سوندا قاينايدى. ويتكەنى ولگەن ادامگەرشىلىك قايتا تىرىلمەيدى.
ادامگەرشىلىك ازايعان قوعامدا ادىلەتتىڭ اق تۋى ەشقاشان اسقاقتامايدى. دجۋنگلي زاڭى ورناپ تىستىلەر مەن كۇشتىلەردىڭ عانا ايى وڭىنان تۋادى. جۋان جۇدىرىقتى اكىم-قارالار ءالسىز الەۋمەتتىڭ توبەسىندە اڭگىرتاياق ويناتادى. جازىقسىز جاپا شەككەندەردىڭ كوز جاسى كول بولىپ اعادى. اتتوبەلىندەي اۋقاتتىلار بار بايلىقتى باۋىرىنا باسىپ, قايىرشىلانعان قاراپايىم بۇقارا ءبيتىن سىعىپ, قانىن جالايدى. باستىق بىتكەننىڭ باعىنىشتىلارىن باسىنۋى بەلەڭ الادى. جوعارى جاقتان ادىلدىك سۇراپ اۋىل مەن استانا اراسىندا اقتابان شۇبىرىندى بولعان شاعىمدانۋشىلاردىڭ شاڭى شارتاراپتى كومەدى.
جەر-جەردەن جەتىپ جاتاتىن جانتۇرشىگەرلىك «جاڭالىقتارعا» قۇلاق قۇرىشىمىزدىڭ قانعاندىعى سونداي, قالىپتى حابار-وشارداي قابىلدايمىز. قاتىگەزدىك قاپتاپ, مەيىرىمدىلىك جوعالىپ بارادى. ەجەلدەن حالقىمىزدىڭ قانىنا سىڭگەن قايىرىمدىلىقتىڭ ءوزى قازىرگى تاڭدا جارناما ءۇشىن جاسالاتىنى بەلگىلى. قالتالى مىرزالار ازىن-اۋلاق قارجى جۇمساپ جوق-جىتىككە قۇدايى كۇلشە تاراتسا گازەتكە جازىپ, تەلەديداردان كورسەتىپ كوككە كوتەرەمىز. جاقسىلىقتى ەسەپپەن جاسايتىن «جاڭا قازاقتار» اقپارات قۇرالدارىنا اقىسىن تولەپ «اتىمتاي جومارتتىقتارىن» جان-جاقتى ناسيحاتتاتىپ, جارياعا جار سالۋعا ابدەن ادەتتەنگەن. ءسويتىپ قايىرلارىن شايىر قىلىپ جىبەرەدى. ءتىپتى جارلى-جاقىبايلاردى جارىلقاپ تاستاعانداي شىرەنگەندە ۇزەڭگى باۋلارىن ءۇزىپ جىبەرە جازدايدى-اۋ, جازعاندار.
ومىرلىك قۇندىلىقتار وزگەردى. قازاقتىڭ رۋحاني قۇبىلاسى قۇنانبايدىڭ ابايى ايتقان بەلگىلى بەس دۇشپانىمىز – «وسەك, وتىرىك, ماقتانشاق, ەرىنشەك, بەكەر مال شاشپاق» الىستاعانىڭىز نە, سەنىمدى سەرىگىمىزدەي قىر سوڭىمىزدان قالار ەمەس. كەرىسىنشە, ءبارىمىز اسىق بولۋعا ءتيىس «تالاپ, ەڭبەك, قاناعات, راقىم, تەرەڭ وي» ءتارىزدى اسىلداردى توت باستى.
ارتىقتاۋ كەتسەم ايىپقا بۇيىرماسسىزدار, كەيدە ءبىزدىڭ كەيبىر شەنەۋنىكتەردىڭ تۇلا بويى جامان ادەت, جاداعاي قىلىقتارعا تۇنىپ تۇرعانداي كورىنەتىنى بار. ەلىنە ادال قىزمەت ەتىپ جۇرگەن ابىرويلى ازاماتتار از ەمەس, ارينە. بىراق سولاردىڭ قايىرلى قادامىنا قاقپان قۇراتىن قارا نيەتتى باقاستارى دا جەتىپ ارتىلادى. باتىراش-قوتىراشتاردىڭ قولداۋىمەن تۇلپاردان تۇعىر وزسا, ورتاق ءىسىمىز قايدان ىلگەرى باسسىن. باۋ-باقشادا وسكەن تابيعي تازا ونىمدەردى دۇكەن سورەلەرىنەن ىعىستىرىپ تاستاعان جىلىجايدىڭ جارتىلاي جاساندى جەمىستەرىندەي, جۇندىقول كوكەلەرىنىڭ كومەگىمەن جايلى كرەسلولارعا جايعاسقان «جاس پەرىلەر» وزدەرىندەگى قابىلەت كەمدىگىنە, تاجىريبە تاپشىلىعىنا قاراماي, قاراماعىنداعى مايتالمان مامانداردى قىرىپ جىبەرە جازدايدى. شىركىن, وسىلاردىڭ لاۋازىمدىق ءوسۋ جولىنداعى ولەرمەندىكتەرى تالابى تاۋداي بولعانىمەن تاۋى شاعىلا بەرەتىن تالانتتى تۇلعالاردىڭ بويىنا بىتسە عوي...
ۇلتتىق نامىسىمىز ۇيقىعا كەتسە, ويانۋى قيىن. نامىسسىز ۇل وتانى تۇگىل وتباسىن قورعاۋعا جارامايدى.
ازاماتتىق ار-ۇياتىمىز بىلعانسا, اششى كىردەن ارىلۋىمىز نەعايبىل. بەتسىز ۇرپاق وسسە ەلدىڭ ەرتەڭى ب ۇلىڭعىر تارتپاق. يمانسىزدىق يەكتەسە جاقىنىڭنىڭ جاتقا اينالۋى وپ-وڭاي. اتا-اناسىنان بەزگەن بەزبۇيرەك بالالار, تار قۇرساعىن كەڭىتىپ تاپقان ءسابيىن تاعدىر تالكەگىنە تاستايتىن كوكەك انالار كوبەيەدى.
ەڭ سوراقىسى, ادامدار ءبىر-ءبىرىن, وتانىن, تۋعان جەرىن ءسۇيۋ قابىلەتىنەن ايىرىلدى. بۇل دەگەنىڭىز رۋحاني اپاتتىڭ بەلگىسى ەمەي نەمەنە؟ قۇداي-تاعالانىڭ ەكى اياقتى, ەت جۇرەكتى قۇلىنا سىيعا تارتقان ساف تازا سەزىمىنەن مۇلدەم ادالانساق كوكتەن شاپاعات نۇرىن شاشقان كۇن سونگەندەي بار الەمدە قاراتۇنەك ورنايدى. ارامدىق, پالەقورلىق, جالاقورلىق, كورەالماۋشىلىق, تاعىسىن تاعى جاماندىقتار جايلاعان ورتا كىمگە وپا بەرمەك؟
...كىرشىكسىز كىسىلىك سالتانات قۇراتىن كەرەمەت زامان ءتۇبى ءبىر تۋار...
ءاي, قايدام...
ايتسە دە ءۇمىتتى كۇندەردەن ءۇمىت ۇزبەيىكشى! ەندەشە كىسىلىكتىڭ «قىزىل كىتابىن» اشامىز با, قايتەمىز؟
