ايماقتار • 21 تامىز، 2019

بۇقارالىق سپورتتىڭ ءورىسى ءوسىپ كەلەدى

20 رەتكورسەتىلدى

دەنى ساۋ ۇلت قانا قۋاتتى مەملەكەت قۇرىپ، ەكونوميكاسىن ويداعىداي دامىتا الادى. ال دەنى ساۋ ۇلتتى قالىپتاستىرۋدىڭ باستى فاكتورى – ازاماتتاردىڭ دەنەشىنىقتىرۋمەن جانە سپورتپەن اينالىسۋىنا مەملەكەت تاراپىنان قولايلى جاعدايلار تۋعىزۋ بولماق. وسىنداي وڭدى ءىس ەلىمىزدە ايقىن بايقالىپ وتىرعانىن ەشكىم جوققا شىعارا المايدى. ءارى مەملەكەت باسشىسى تاراپىنان بۇقارالىق سپورتتى دامىتۋعا قاتىستى قويىلعان مىندەتتەر ويداعىداي ورىندالىپ كەلەدى.

مىسالى قر تۇڭعىش پرەزيدەنتى – ەلباسى ن.نازارباەۆ 2012 جىلعى 27 قاڭتارداعى قازاقستان حالقىنا جولداۋىندا 2020 جىلعا قاراي ەلىمىزدە دەنەشىنىقتىرۋمەن جانە سپورتپەن اينالىساتىن ازاماتتاردىڭ قاتارىن 30 پايىزعا دەيىن ءوسىرۋ قاجەتتىگىن اتاپ كورسەتىپتى. سودان بەرى 7 جىل ءوتىپتى. ەلباسى بەلگىلەگەن ۋاقىت تا كەلىپتى. وسى اسۋدى الا الدىق پا؟ ناقتى دەرەكتەرگە سۇيەنسەك رەسپۋبليكا بويىنشا دەنەشىنىقتىرۋمەن جانە سپورتپەن جۇيەلى تۇردە شۇعىلدانۋشىلار سانى وتكەن 2018 جىلى 5 ميلليون 475 مىڭ 969 ادامدى قۇراپتى. ياعني مۇنىڭ ءوزى ەل تۇرعىندارىنىڭ 29،8 پايىزى دەگەن ءسوز.

بۇقارالىق سپورت پەن دەنەشىنىقتىرۋدىڭ قولجەتىمدىلىگىن كوتەرۋ ءىسى ەڭ الدىمەن وڭىرلەردەن تامىر تارتسا يگى. بۇل جونىنەن دە قۇدايعا شۇكىر جەرگە قاراپ قالاتىن جاعدايىمىز جوق ەكەنىن تاعى دا سول ناقتى دەرەكتەر ايقىن كورسەتەدى. ايتالىق بيىلعى 2019 جىلدىڭ العاشقى جارتىجىلدىعىنىڭ قورىتىندىسى بويىنشا وبلىستا دەنەشىنىقتىرۋ جانە سپورتپەن قامتىلعان حالىقتىڭ ۇلەسى 31،4 پايىزدى قۇراپ تۇر. بۇل ەل وڭىرلەرى اراسىندا ماڭعىستاۋ جانە اتىراۋ وبلىستارىنان كەيىنگى جوعارى كورسەتكىش.

ارينە بۇعان بۇقارالىق سپورتتى دامىتۋ ىسىندە قولعا الىنعان ءىس شارالار شوعىرى وڭ اسەرى مەن ىقپالىن تيگىزگەنى حاق. ونىڭ دامۋى قاجەتتى سپورتتىق ينفراقۇرىلىمنىڭ جاساقتالۋىمەن تىعىز بايلانىستى. بيىلعى جىلدىڭ سوڭعى ۆەدومستۆولىق ستاتيستيكاسى وبلىستا 1745 سپورتتىق نىسان جۇمىس ىستەپ تۇرعانىن العا تارتادى. تۇتاستاي ەل اۋقىمىندا كەم دەگەندە 100 دەنەشىنىقتىرۋ-ساۋىقتىرۋ كەشەنىن سالۋ قاجەتتىگى جونىندە وتكەن 2018 جىلى 5 قازاندا ەلباسى قويعان تاپسىرماعا سايكەس اقتوبە ايماعىندا اجەپتاۋىر قوزعالىس بايقالادى.

بۇل ءۇشىن اقتوبە وبلىسىنىڭ دەنەشىنىقتىرۋ جانە سپورت باسقارماسى تاراپىنان ءتيىستى تالداۋلار جاسالىپ مادەنيەت جانە سپورت مينيسترلىگىنە جولدانعان. ونىڭ كەيبىر قىرلارىنا كوز جىبەرسەك جالپى سۇلباسى تومەندەگىدەي بولىپ شىعادى. ەڭ الدىمەن ايتارىمىز مادەنەيەت جانە سپورت مينيسترلىگى ەلباسى تاپسىرماسىنا ورىنداۋ ءۇشىن بيىلعى 2019 جىلدىڭ 15 مامىر كۇنى 100 دەنەشىنىقتىرۋ-ساۋىقتىرۋ كەشەندەرى قۇرىلىسىنىڭ تىزبەسىن بەكىتكەنى. سوعان سايكەس 2019-2021 جىلدار ارالىعىندا وبلىستا 6 دەنەشىنىقتىرۋ-ساۋىقتىرۋ كەشەندەرى قۇرىلىستارىن تۇرعىزۋ كوزدەلگەن.

– ونىڭ قازىرگى ىسكە اسىرىلۋ بارىسى ءار قيلى ساتىلاردا. حرومتاۋ جانە بايعانين اۋداندارىندا اتالعان سپورت كەشەندەرىنىڭ جوبالاۋ-سمەتالىق قۇجاتتارى (جسق) ازىرلەنىپ مەملەكەتتىك ساراپتامادان وتكىزىلدى. مۇعالجار جانە تەمىر اۋداندارىندا جسق جاساقتالۋ ۇستىندە. ال ويىل اۋدانىندا بۇل ءىس الداعى تامىز ايىنا بەلگىلەندى – دەدى گازەت تىلشىسىنە اقتوبە وبلىستىق دەنەشىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ.

ايماقتا بۇقارالىق سپورتتى دامىتۋ شەڭبەرىندەگى كەشەندەر قۇرىلىسى اتالعان مينيسترلىك تىزبەسىمەن شەكتەلمەيدى. بۇل باعىت بويىنشا وزگە دە جوبالار مەن جوسپارلار قاراستىرىلۋدا. سونىڭ ءبىرى «اۋىل – ەل بەسىگى» باعدارلاماسىنىڭ تيگىزىپ وتىرعان شاپاعاتى دەۋگە بولادى. مىسالى وسى باعدارلاما اياسىندا تەمىر اۋدانىنىڭ شۇبارقۇدىق كەنتىندەگى كەشەن قۇرىلىسىنا رەسپۋبليكالىق جانە وبلىستىق بيۋدجەتتەردەن 275 ميلليون تەڭگە بولىنگەن.

ايتسە دە ەل-جۇرتتى بۇقارالىق سپورتقا جۇمىلدىرۋ ىسىندە وڭ شەشىمىن تابا الماي جۇرگەن ماسەلەلەر دە جوق ەمەس. ايتالىق «قالا قۇرىلىسى، قالالىق جانە اۋىلدىق ەلدى مەكەندەردى جوسپارلاۋ جانە قۇرىلىس سالۋ» اتتى نورماتيۆتىك-تەحنيكالىق قۇجاتتارعا كوز سالساق  الدىڭعى پىكىرىمىزدىڭ شىندىققا سايكەس كەلەتىنى ايقىندالا تۇسىدە. ماسەلەنىڭ ءمانىسى مىنادا. جوعارىدا اتالعان نورماتيۆتىك-تەحنيكالىق قۇجاتقا سايكەس اۋدان ورتالىقتارى مەن تۇرعىندار سانى 3 مىڭنان اساتىن اۋىلداردا، سونداي-اق ءىرى ەلدى مەكەندەردە بۇقارالىق سپورتتى ورىستەتۋ ءۇشىن قاجەتتى نىساندار بوي كوتەرۋگە ءتيىس.

شىنتۋايتىنا كەلگەندە بۇلاي بولماي وتىر. ياعني تۇرعىنداردىڭ سپورت عيماراتتارى مەن كەشەندەرىنە قاتىستى سۇرانىستارى مەن تالاپ-تىلەكتەرى وتەلمەي كەلەدى دەۋگە بولادى. ءبىر سوزبەن ايتقاندا بۇعان قاجەتتىلىك بار. وزگەسىن ايتپاعاندا 30 مىڭعا جۋىق حالقى بار شالقار اۋدانىنىڭ ورتالىعى شالقار قالاسىندا دەنەشىنىقتىرۋ-ساۋىقتىرۋ كەشەنىنىڭ جوقتىعىن نەمەن تۇسىندىرسەك ەكەن؟ بۇل ءتىزىمدى بۇدان ءارى جالعاستىرا بەرۋگە بولادى. بىراق بۇدان كەلەتىن ەشقانداي پايدا جوقتىعى تاعى دا ايان.

بۇل ماسەلەلەر 2019 جىلدىڭ 15 تامىزىندا وتكىزىلگەن اقتوبە وبلىستىق ءماسليحاتىنىڭ الەۋمەتتىك-مادەني دامۋ جونىندەگى تۇراقتى كوميسسياسىنىڭ كەڭەيتىلگەن ماجىلىسىندە تالقىلانعان. دۇرىس-اق. شەشىمىن كۇتىپ جۇرگەن ماسەلەنىڭ بۇلايشا كوتەرىلۋى وتە ورىندى. دەگەنمەن بۇقارالىق سپورتتى دامىتۋ جانە تۇرعىنداردىڭ دەنەشىنىقتىرۋمەن جانە سپورتپەن اينالىسۋ ۇعىمىن تەك ءبىر عانا سپورت كەشەندەرىن سالۋمەن شەكتەي سالۋعا بولمايدى دەر ەدىك.

سوندىقتان دا تۇراقتى كوميسسيا مۇشەلەرى، ءماسليحات دەپۋتاتتارى مەن وبلىستىق باسقارما باسشىلارى قاتىسقان باسقوسۋدا سپورت عيماراتتارىن ءتيىمدى پايدالانۋ جانە دەنەشىنىقتىرۋمەن اينالىسۋ ءۇشىن وبلىس پەن اۋدان ورتالىعىنداعى اۋلالار مەن ساياباقتاردى بۇگىنگى تالاپتارعا ساي جابدىقتاۋ جونىندە ماسەلەلەر كوتەرىلسە تولدىققاندى بولار ەدى. بۇلاي بولماعان. شىنتۋايتىنا كەلگەندە ومىردە بۇل ماسەلەدە قولعا الىناتىن شارالار جەتكىلىكتى. سوعان قاراماستان بۇل جونىندە ءبىر اۋىز ءسوزدىڭ ايتىلماعانى وكىنىشتى-اق.

راس، بيىلعى 2019 جىلدىڭ العاشقى جارتىجىلدىعى ارالىعىندا ايماقتا بۇقارالىق باعىتتاردا وتكىزىلگەن سايىستار مەن جارىستاردىڭ سانى 1500-دەن اسىپ ءتۇسىپتى. وعان 60 مىڭنان استام ادام قامتىلعان. ارينە بۇل جاعىمدى جايت ءارى ءتاۋىر كورسەتكىش. ايتسە دە، بۇنىڭ ءوزى بۇقارالىق سپورت پەن دەنەشىنىقتىرۋدىڭ قولجەتىمدىلىگىن كوتەرۋ جونىندەگى ءىس-شارالاردىڭ تەك ءبىر ءتاسىلى مەن جولى ەكەنى كامىل. بۇل رەتتە وڭىردەگى وكىلەتتى ورگاندار بۇعان قاتىستى ماسەلەلەردىڭ مازمۇنى مەن تۇرلەرىن ودان ءارى تەرەڭدەتە تۇسۋگە ۇمتىلسا بۇقارالىق سپورتتىڭ ءورىسى ودان ءارى وسە تۇسپەك.

 

اقتوبە وبلىسى

        

سوڭعى جاڭالىقتار

الەمدەگى احۋال قانداي؟

كوروناۆيرۋس • بۇگىن، 10:57

قىزىلوردا: تاعى 3 ادام تىركەلدى

ايماقتار • بۇگىن، 09:57

مما: UFC-ءدى سىنعا الدى

سپورت • بۇگىن، 09:20

جۇدىرىقتاي جۇمىلايىق

رۋحانيات • بۇگىن، 07:45

كاسىپكەرلەر تىلەگى ەسكەرىلدى

بيزنەس • بۇگىن، 07:40

«موسكۆانىڭ» ماسەلەسى كوپ

ايماقتار • بۇگىن، 07:36

ۇقساس جاڭالىقتار