20 تامىز، 2019

قاراعاندىدا «تىلدەر مەن مادەنيەتتەر ديالوگى» فورۋمى ءوتتى

79 رەتكورسەتىلدى

كەنشىلەر استاناسىندا قاراعاندى وبلىستىق «رۋحاني جاڭعىرۋ» باعدارلاماسىنىڭ وڭىرلىك جوبا كەڭسەسى مەن وبلىس اكىمى اپپاراتىنىڭ «قوعامدىق كەلىسىم» مەكەمەسى ۇيىمداستىرعان «تىلدەر مەن مادەنيەتتەر ديالوگى» اتتى فورۋم-كەزدەسۋگە «مۇحتار اۋەزوۆ» قوعامدىق قورىنىڭ ديرەكتورى مۇرات اۋەزوۆ باستاعان دەلەگاتسيا ارنايى كەلىپ قاتىستى.

سونداي-اق جيىنعا ۋكراينانىڭ قازاقستانداعى قۇرمەتتى كونسۋلى ەرلان دوسماعامبەتوۆ پەن جاڭا قۇرىلعان «قوعام. ءتىل. مادەنيەت» قب پرەزيدەنتى، عالىم نۇرسۇلۋ بوكەتوۆا، قاراعاندى وبلىستىق «رۋحاني جاڭعىرۋ» جوبالىق كەڭسەسىنىڭ باس مەنەدجەرى باقىتقالي مۇسابەكوۆ، اقىن سەرىك اقسۇڭقار ۇلى، زەرتتەۋشى-ساراپشى مارات ازبانباەۆ قاتىسىپ، حاكىم اباي جانە ۇلى مۇحتار تۋرالى اڭگىمەنىڭ كورىگىن قىزدىردى.

فورۋمنىڭ باستاماشىسى نۇرسۇلۋ بوكەتوۆا تىلدەر مەن مادەنيەتتەر ديالوگىنا ارنالعان جيىننىڭ قوعامدىق دامۋدىڭ ماڭىزدى كورىنىسى ەكەنىنە توقتالدى.

– ءبىز «سوتسيۋم. ءتىل. مادەنيەت» اتتى قوعامدىق قور قۇردىق. سول ارقىلى قوعامدىق سانانى جاڭعىرتۋ، قۇندىلىقتار جۇيەسىن قالىپتاستىرۋ سياقتى ۇلكەن مىندەتتەردى ورىنداۋعا ءوز ۇلەسىمىزدى قوسقىمىز كەلەدى، دەدى ول.

فورۋمدا ءسوز العان مۇرات اۋەزوۆ ارقا جەرىنىڭ كوپتەگەن ويشىلداردىڭ وتانى ەكەنىن ەرەكشە اتاپ ءوتتى. الاشتىڭ كوسەمى ءالىمحان ەرمەكوۆ، جازۋشى اقسەلەۋ سەيدىمبەك، اقىن بۇركىت ىسقاق جايلى ەستەلىكتەرىمەن ءبولىستى.

– ديالوگ دەگەنىمىزدىڭ ءوزى ءبىر-ءبىرىمىزدى تىڭداي ءبىلۋ عوي. بۇل  وتە ماڭىزدى دۇنيە. ابايدىڭ ءوزى ءبىزدى بۇعان شاقىرعان. «رۋحاني جاڭعىرۋ» باعدارلاماسىنىڭ ەكى مازمۇندى كەزەڭى بار: تاريحتى تانۋ جانە وسى تاريحتى مەڭگەرۋ. ءبىزدىڭ بارلىعىمىز تاريحتىڭ مۇراگەرى بولۋ ونەرىنە ۇيرەنۋىمىز كەرەك. ءبىلىپ قانا قويماي، حالقىمىزدىڭ تاريحىندا بولعان جاقسى دۇنيەلەردى ءوزىمىزدىڭ، وتانداستارىمىزدىڭ ساناسىنا ءسىڭىرۋىمىز قاجەت، دەپ اتاپ ءوتتى مادەنيەتتانۋشى.

مۇرات اۋەزوۆ وسىنداي پىكىرتالاستى ۇيىمداستىرعانى ءۇشىن قاراعاندىلىقتارعا العىس سەزىمىن ءبىلدىرىپ، ءوزىنىڭ «ۆرەمەن سۆيازۋيۋششايا نيت» اتتى تۋىندىسىن «دوستىق ءۇيىنىڭ» كىتاپحاناسىنا تارتۋ ەتتى.

– سايىپ كەلگەندە ەكى اسپەكت بار. ول ءبىزدىڭ جاراتىلىسىمىزدىڭ تابيعي ساپاسى رەتىندە دۇنيەگە كەلەتىن بىتىمگەرشىلىك. بۇل جەرگە قۋعىن-سۇرگىنگە ۇشىراعان جانە كۇشتەپ قونىس اۋدارىلعان حالىقتار ءوز ەركىمەن كەلگەن جوق. قازاقتار ولاردى امان ساقتاپ قالدى. ەكىنشى جاعىنان الىپ قاراعاندا، ءبىز ادىلىرەك، باقىتتىراق بولاشاققا يە بولۋعا قۇقىلىمىز. مەنىڭ ويىمشا، مۇنداي ۇدەرىسكە ءبىزدىڭ سانامىزدىڭ قانشالىقتى قاتىسى بارىن ءدال وسىنداي جولمەن ايقىنداپ الۋىمىز كەرەك، – دەدى مۇرات مۇحتار ۇلى.

جيىن بارىسىندا تاريحشىلار مەن ابايتانۋشىلار ءوز پىكىرلەرىن ورتاعا سالدى.

سونداي-اق فورۋم اياسىندا جەرگىلىكتى اقىن-جازۋشىلاردىڭ باسىن بىرىكتىرەتىن «ارنا» ادەبي كلۋبىنىڭ تۇساۋكەسەر ءراسىمى ءوتتى.

فورۋم قوناقتارى دولينكاداعى ساياسي قۋعىن-سۇرگىن قۇرباندارىن ەسكە الۋ مۇراجايىن ارالاپ كورىپ، بۇقار جىراۋ اۋدانىنداعى بۇقار  قالقامان ۇلىنىڭ مەموريالىنا بارىپ قايتتى.

 

قاراعاندى وبلىسى

 

سوڭعى جاڭالىقتار

ۇقساس جاڭالىقتار