جوسپارعا سايكەس بيىل ەل بويىنشا 685 اۋىلدى قامتۋ جوسپارلانعان. پاۆلودار وبلىسى بويىنشا بۇگىندە 9 اۋىلدىق ەلدى مەكەننىڭ 36 مەكەمەسى, ونىڭ ىشىندە مەكتەپتەر, اۋرۋحانالار, اكىمدىكتەر ساپالى ينتەرنەتپەن قامتاماسىز ەتىلگەن.
«اۋىلداردىڭ كەڭ جولاقتى ينتەرنەتكە قولجەتىمدىلىگىن قامتاماسىز ەتۋ – اۋقىمدى ءارى بىرەگەي جوبا. بۇل تۇڭعىش پرەزيدەنت – ەلباسى نۇرسۇلتان نازارباەۆتىڭ تاپسىرماسى بويىنشا «تسيفرلى قازاقستان» باعدارلاماسى اياسىندا جۇزەگە اسىرىلۋدا. اۋىلدارعا جۇرگىزىلىپ جاتقان تەلەكوممۋنيكاتسيا ينفراقۇرىلىمى شالعايدا ورنالاسقان ەلدى مەكەندەردەگى الەۋمەتتىك سالا نىساندارىن, بيۋدجەتتىك ۇيىمدار مەن مەملەكەتتىك مەكەمەلەردى جوعارى جىلدامدىقتى ينتەرنەتپەن قامتاماسىز ەتەدى. سونداي-اق تسيفرلى قىزمەتتەر مەن سەرۆيستەردى ەنگىزۋ دەڭگەيىن ارتتىرۋعا مۇمكىندىك بەرەدى. ءبىلىم بەرۋ, دەنساۋلىق ساقتاۋ جانە باسقا دا سالالاردى دامىتۋ ەسەبىنەن حالىقتىڭ ءومىر ءسۇرۋ ساپاسىن ارتتىرۋعا وڭ ىقپال ەتەدى», دەدى شاقات اۋىلىنداعى ورتا مەكتەپتە جۇرگىزىلگەن جۇمىس ناتيجەلەرىمەن تانىسۋ بارىسىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ.
ۆەدومستۆو باسشىسى سونداي-اق «پاۆلودار» ارنايى ەكونوميكالىق ايماعىنا جانە ايماقتا ورنالاسقان ءىرى كاسىپورىندارعا, اتاپ ايتقاندا «پاۆلودار مۇنايحيميا زاۋىتى» جشس, «گيسسەنحاۋس» جشس, ەكىباستۇز قالاسىنداعى «پرومماشكومپلەكت» جشس جۇمىستارىمەن تانىستى. بۇل كاسىپورىنداردا تسيفرلى تەحنولوگيالار, ەكونوميكالىق تيىمدىلىككە قول جەتكىزۋگە جانە ءوندىرىستى وڭتايلاندىرۋعا مۇمكىندىك بەرەتىن تەحنولوگيالىق جانە بيزنەس-پروتسەستەردى اۆتوماتتاندىرۋ, تەحنولوگيالىق پروتسەسكە بىرىكتىرىلگەن يننوۆاتسيالىق شەشىمدەردى قابىلداۋ بەلسەندى تۇردە قولعا الىنعان. ءبىلىم بەرۋ سالاسىن تسيفرلاندىرۋ دەڭگەيىن پاۆلودارلىقتار مينيسترگە «جاس دارىن» مامانداندىرىلعان مەكتەبىنىڭ مىسالىندا كورسەتتى. سونىمەن قاتار تسيفرلاندىرۋعا جاۋاپتى ۆەدومستۆو باسشىسى «ازاماتتارعا ارنالعان ۇكىمەت» كەاق مەملەكەتتىك كورپوراتسياسى فيليالىنىڭ حالىققا قىزمەت كورسەتۋ ورتالىعى مەن كوشى-قون قىزمەتى ورتالىعىنىڭ جۇمىسىنا ەرەكشە نازار اۋداردى. حقو-نىڭ جابدىقتالۋىن قاراپ شىعىپ, وڭىرلىك فيليالداعى ارىپتەستەرىمەن اڭگىمەلەستى. سونداي-اق ۇزىن-سونار كەزەكتەردىڭ تۋىنداۋىنا جول بەرمەۋ جانە حقو ماماندارىنىڭ ساپالى ءارى تەز قىزمەت كورسەتۋى بويىنشا قولعا الىنعان شارالاردىڭ تيىمدىلىگىن باعالادى.
پاۆلودار وبلىسى
