راس, قارلىعاش اپاڭىز بىرنەشە كورپەنى قۇراپ تاستاپتى. ماتا قيىندىلارىن قيۋلاستىرىپ, تارتىمدى دۇنيە شىعارعان شەبەرلىگىنە قايران قالدىق. مۇندا نەشە ءتۇرلى قازاقي ناقىشتاعى ويۋلاردان, ورنەكتەردەن قۇرالعان كورپەلەر كوزدىڭ جاۋىن الادى. «نەمەرەلەرىمنىڭ بوقشاسىنا جارايتىن شىعار», دەيدى كۇلە سويلەگەن بايىرعى ۇستاز ريزا كەيىپتە.
– مەنىڭ شەشەم قانشاي دا ىسمەر كىسى ەدى. لەزدە ءبىر كويلەكتى تىگىپ, تويعا كيىپ بارا جاتسا, قىدىرىپ كەلىسىمەن قولعاپ, ش ۇلىق توقىپ نەمەرەلەرىنىڭ جىلى ءجۇرۋىن قاداعالايتىن. كەۋدەشە توقۋ, تۇماق تىگۋ ول كىسى ءۇشىن تاڭسىق ەمەس ەدى, – دەيدى وسى ۇيگە قىدىرىستاپ كەلگەن قۇداعيى ورىنكۇل دە قوشتاي سويلەپ.
جاڭاقورعان اۋدانى, قاندوز اۋىلىنداعى ورتا مەكتەپتە بىرنەشە جىل ۇستازدىق ەتىپ, كەيىننەن مەكتەپ ديرەكتورى لاۋازىمىنان زەينەتكەرلىككە شىققان قارلىعاش بەكمۇحانبەتوۆا ءتول ونەرىمىزدى كۇندەلىكتى ماشىعىنا اينالدىرىپ, نەمەرەلەرىنە ۇيرەتىپ كەلەدى.
– قيمىلسىز قاراپ وتىرۋ – ءومىردىڭ ءمانىن كەتىرەدى. اۋىرا باستايسىڭ, باسقالاردىڭ مازاسىن الاسىڭ. سوندىقتان قيمىلسىز قاراپ وتىرۋ مەن ءۇشىن توزاقپەن بىردەي. بىلتىردان بەرى جاس كەزىمدە ءبىراز سەرىك ەتكەن تىگىنشىلىككە قايتا بەت بۇردىم. ۇيدە ءتۇرلى ماتالاردىڭ قيىندىلارى مەن جىرتىستارى جيىلىپ-اق قالعان ەكەن, سولاردى بىرتىندەپ كادەگە جاراتۋدامىن, – دەيدى ول.
كونەنىڭ كوزىن كورگەن ىسمەر ۇستازدىڭ ايتۋىنشا, تىگىنشىلىك تەگىن ونەر ەمەس. ول قىز بالانى توزىمدىلىككە, ۇنەمدىلىككە, شەبەرلىككە, بوياۋلاردى اجىراتىپ, ولاردىڭ ءبىر-بىرىمەن ۇيلەسىمدىلىك تابۋىن ءتۇسىنىپ, تانۋعا شىڭدايدى, تازالىققا, اسەمدىككە ۇندەيدى, جان-دۇنيەسىن بايىتىپ, وي-ءورىسىن كەڭەيتەدى. مۇنى قولىنىڭ ەپ-سەبى بولۋمەن قاتار ونەرگە بەيىمى بار, قيالى ۇشقىر جان كەلىستىرىپ اتقارا الادى. بوياۋ تۇرلەرىنىڭ ۇيلەسىمدىلىگىن دە جەتە بىلگەن ءجون. ءساندى تۇستەردىڭ ءبىر-بىرىمەن جاراسىم تاۋىپ, ادەمىلىك الەمىنە ءيىرۋى كوڭىلگە شاتتىق ورناتادى دەسەك ارتىق ەمەس. ول ارقىلى حالقىمىزدىڭ قۇنارلى دۇنيەتانىمىن, ەستەتيكالىق تالاپ-تالعامىن, سۇلۋلىقتى اڭساعان ىڭكار سەزىمىن ايتقىزباي-اق تانيسىڭ.
نۇرماحان نازىمحان ۇلى
قىزىلوردا وبلىسى,
جاڭاقورعان اۋدانى,
قاندوز اۋىلى
