الاڭداتقانى بىلاي تۇرسىن, تۇنگى جارىقتى ءتىلىپ وتكەن قوس زىمىران مەملەكەتتەردى سوعىس جاعدايىنا دەيىنگى دەڭگەيگە جەتكىزدى. وسىلايشا ءبىر اپتانىڭ ىشىندەگى بۇل ءۇشىنشى جارىلىس سەۋل تاراپىنان سولتۇستىك كورەيانىڭ ارەكەتى «جۇدىرىق جۇمساۋعا» دايىنمىن دەگەندى ءبىلدىرىپ, اقش پەن وڭتۇستىك كورەيانىڭ بىرلەسكەن اسكەري وقۋ-جاتتىعۋلارىنا قىر كورسەتۋدەي اسەر قالدىرىپ تۇر.
كورەيا ورتالىق تەلەگراف اگەنتتىگى تاراتقان حابارلامالارعا قاراعاندا, «جاڭا قارۋدى» سىناقتان وتكىزۋ ءساتىن كحدر باسشىسى كيم چەن ىن جانىنا بىرنەشە ادام الىپ, جەكە باقىلاپ تۇرعان.
«عالىمدار تەستىلىك بايقاۋ كەزىندە جوعارى ناتيجە كورسەتتى جانە قارۋلانۋدىڭ تۇرلەرى دە كوڭىلىمىزدەن شىعىپ وتىر» دەلىنگەن كحدر حابارلاماسىندا. الايدا قارۋدىڭ ءتۇرى تۋرالى باسقا مالىمەتتەر بەلگىسىز.
«زىمىراندار سولتۇستىك كورەيانىڭ شىعىس بولىگىنەن جىبەرىلىپ, جاپونيا مەن كورەي تۇبەگى اراسىنداعى تەڭىزگە قۇلادى. زىمىران 30 شاقىرىمدىق بيىكتىكتە 230 شاقىرىم ۇشتى», دەلىنگەن رەسمي حابارلامادا.
پحەنياننىڭ بۇل زىمىرىندارى وڭتۇستىك كورەيا تاراپىنىڭ دا مازاسىن قاشىرىپ, «كەز كەلگەن جاعدايعا دايىن بولۋ» پوزيتسياسىن ۇستانۋعا ءماجبۇر ەتتى. ال وڭتۇستىك كورەيا پرەزيدەنتى مۋن چجە ين پحەنياندى ايماقتاعى جاعدايدىڭ الدىن الۋ شارالارىن نازارعا الۋدى سۇرادى.
Reuter-ءدىڭ حابارلاۋىنشا, بۇل – اقش اسكەريلەرىن دە ءدۇر سىلكىندىرىپ, الاڭداتقان. وڭتۇستىك كورەيا اسكەريلەرىنىڭ دەرەكتەرىنە قاراعاندا, بۇل – اقش پەن سولتۇستىك كورەيا باسشىلارى اراسىنداعى كەلىسسوزدەردىڭ سوڭعى كەزەڭىنەن بەرگى التىنشى وقيعا.
وسى ورايدا اقش باس دەپارتامەنتى اقش-تىڭ سولتۇستىك كورەيا بويىنشا ارنايى ۋاكىلى ستيۆان بيگاننىڭ وسى اپتادا جاپونيا مەن وڭتۇستىك كورەياعا دەرەۋ اتتاندىرىلىپ, كحدر دەنۋكلەاريزاتسياسى بويىنشا ءىس-جۇمىستاردى باسشىلىققا الاتىنىن حابارلادى.
اڭگىمەنى ارىعا سوزباي-اق, پرەزيدەنت دونالد ترامپ وتكەن اپتادا عانا كيم چەن ىننىڭ بارلىق كەلىسىمدەر كۇشىندە ەكەنىن, ودان «وتە ادەمى قىزىل حات» العانىن جانە تاعى ءبىر مارتە كەزدەسۋدەن قاشپايتىنىن مالىمدەدى. بىراق بۇل حابارلامالاردىڭ بارلىعى دا ءالى ءجىتى تالداۋدى قاجەت ەتەدى.
وسى ورايدا ۇلىبريتانيا ءسىم باسشىسىنىڭ ورىنباسارى حەزەر ۋيلەر ءۇن قاتىپ, لوندوننىڭ سولتۇستىك كورەيا تاراپىنان اتىلعان زىمىراندارعا قاتىستى تۇسىنىسپەۋشىلىك تۋىپ وتىرعانىن جەتكىزدى.
ء«بىز سولتۇستىك كورەيا تاراپىنان 16 تامىز كۇنى اتىلعان بالليستيكالىق زىمىراندارعا الاڭداۋلىمىز. بۇل – بۇۇ قاۋىپسىزدىك كەڭەسىنىڭ قارارىنا جات قىلىق», – دەي كەلە ءمينيستردىڭ ورىنباسارى بريتانيانىڭ بارلىق بەيبىت ماقساتتارىن كوزدەيتىن ۇلكەن كەلىسسوزدەرگە اشىق ەكەنىن مالىمدەدى.
بۇعان دەيىن, اتاپ ايتقاندا, 2018 جىلعى 18 ساۋىردەن باستاپ كحدر باسشىلىعى بارلىق يادرولىق سىناقتاردى توقتاتۋ تۋرالى شەشىم قابىلداعانىن جازىپ كەلەمىز. اقش پرەزيدەنتى دونالد ترامپ پەن سولۇستىك كورەيا باسشىسى كيم چەن ىننىڭ 2018 جىلعى ماۋسىم ايىنداعى ءبىرىنشى سامميتىندە بىرلەسكەن قۇجات قابىلدادى. اتالعان قۇجات سولتۇستىك كورەيانىڭ تولىق دەنۋكلەاريزاتسياعا دايىن ەكەنىن مالىمدەگەنىمەن, قانداي ءىس-شارالاردى ناقتىلاۋى تيىستىگى تۋرالى ماقساتتار ەسكەرۋسىز قالىپ كەلدى.
ال بىلتىر قىركۇيەك ايىندا پحەنياندا وتكەن سامميت اياسىندا وڭتۇستىك جانە سولتۇستىك كورەيا مەملەكەتتەرىنىڭ باسشىلارى «سوحە» زىمىراندىق سىناق پوليگونىن تۇپكىلىكتى جابۋعا ۋاعدالاسىپ, ونداعى سىناق قۇرالدارىنىڭ كوزىن قۇرتۋعا كەلىسكەن ەدى.
بىرقاتار ساياسي ساراپشى وسى كەلىسسوزدەر باستالعان تۇستىڭ وزىندە سولتۇستىك كورەيانىڭ شەشىمدەرى سەنىمسىزدىك تۋعىزا باستاعانىن جازدى. ۇزاق جىلدار بويعى بۋلىققان ساياسي وشپەندىلىك زارىنىڭ وڭايلىقپەن وشە قويماسى دا بەلگىلى ەدى. نەگىزى اقش پەن سولتۇستىك كورەيا اراسىنداعى بۇل جىلىمىققا ءالى دە ۇلكەن ءۇمىت ارتاتىندار بار.
بۇۇ قاۋىپسىزدىك كەڭەسىنىڭ قارارى بويىنشا, سولتۇستىك كورەياعا كەز كەلگەن بالليستيكالىق زىمىران سىناعىن وتكىزۋگە قاتاڭ تىيىم سالىنعان.
