الماتىدا 50 مىڭنان استام اعاش اپاتتى جاعدايدا تۇر. ال جارتى ميلليونعا جۋىق تال اۋرۋ دەپ تانىلعان. ەمدەۋدى قاجەت ەتەتىن اعاشتاردىڭ دەنى تۇركسىب پەن ناۋرىزباي اۋدانىندا ءوسىپ تۇر. قازىر قالا بيلىگى ولاردى جەكە تەكسەرىپ, مينەرالدىق تىڭايتقىشتارمەن ەمدەۋدى قولعا الماق.
سونداي-اق, مەگاپوليستە جاسىل جەلەكتىڭ سانىن كوبەيتۋ كوزدەلىپ وتىر. وسىعان وراي, كۇزدە Jasyl Almaty ءۇش جىلدىق جوباسى باستالماق. ونىڭ اياسىندا قالا بويىنشا كەم دەگەندە ميلليون ءتۇپ اعاش وتىرعىزىلادى. ەڭ الدىمەن الاتاۋ, ناۋرىزباي, جەتىسۋ, المالى اۋداندارىنداعى تالداردى كوبەيتۋ جوسپارلانعان. جاسىل ەكونوميكا باسقارماسىنىڭ ماماندارى اعاشتاردى يندۋستريالىق ايماق ماڭىنا وتىرعىزاتىنىن جەتكىزدى. بىراق قالا اكىمى الدىمەن حالىق كوپ شوعارلانعان جەرلەردەگى جاسىل جەلەكتىڭ سانىن كوبەيتۋدى تاپسىردى.
«ەڭ الدىمەن ادامدار تۇراتىن جەرگە وتىرعىزۋ كەرەك. الاتاۋ اۋدانىنىڭ حالقى نە دەپ جاتىر؟ دالاعا شىققاندا كولەڭكە جوق, ويتكەنى تال جوق, ساياباق جوق دەيدى. سول سەبەپتى ولار كۇننىڭ اپتاپ ىستىعىندا وتىرۋعا ءماجبۇر. ء تىپتى ورىندىقتار, بالالارمەن قىدىراتىن جەر جوق دەيدى. ال شىن مانىندە تال ەگەم دەگەندەر بولسا, بوس جەر تولىپ جاتىر. سوندىقتان ماماندارمەن اقىلداسا وتىرىپ, قالانىڭ كوركىن كەلتىرەتىن, ءارى جاسىل جەلەك بولاتىنداي جەرگە ەگۋ كەرەك», دەدى باقىتجان ساعىنتاەۆ.
بۇدان بولەك, ماماندار الماتىنىڭ ەكولوگيالىق احۋالىن جاقسارتۋ باعىتىنداعى جۇمىستاردى ارمەن قاراي جالعاستىرماق. اۆتوبۋستاردى 100 پايىزعا جاڭارتۋ مەن تروللەيبۋس پاركىن رەتتەۋ, اۋاعا تارايتىن زياندى قالدىقتاردى جىلىنا 630 تونناعا دەيىن ازايتۋعا مۇمكىندىك بەرەدى. سونداي-اق, قالاارالىق قوعامدىق كولىكتەردى جاڭارتۋ مەن جەكەمەنشىك سەكتوردى تولىققاندى گازعا قوسۋ ماسەلەسى دە پىسىقتالۋدا. ال قالا كوركىن بۇزاتىن سۇرىقسىز قوقىس كونتەينەرلەرىن ءبىر ۇلگىدە ەتىپ, جەكە تۇرعىن ۇيلەردىڭ قاسىنا دا ورناتۋ قاراستىرىلۋدا.
الماتى
