«قتج» ۇك» اق فيليالى – «قاراعاندى ماگيسترالدىك جەلى ءبولىمى» ۆوكزالدىق شارۋاشىلىق جونىندەگى ديرەكتوردىڭ ورىنباسارى ءومىرتاي شەريازدانوۆ مالىمدەگەندەي, جاڭعىرتىلعان ۆوكزال قىركۇيەك ايىندا جولاۋشىلاردى قابىلداي باستايدى.
– ۆوكزالدىڭ ەسكى عيماراتىندا جۇمىس 70-80% اياقتالدى. بەلگىلەنگەن مەرزىم ىشىندە ۇلگەرۋ ءۇشىن قۇرىلىس ماتەريالدارىن جەتكىزۋ جەدەلدەتىلدى, بريگادالارداعى ادامدار سانى ارتتىرىلدى. بۇگىندە ەسكالاتورلار ورناتىلىپ, مۇمكىندىگى شەكتەۋلى ادامدارعا ارنالعان بولمەلەر, ولاردىڭ جۇگىن قابىلدايتىن ارنايى ورىندار ازىرلەنىپ جاتىر. ۆوكزالدىڭ جاڭا تەرمينالىنىڭ قۇرىلىسى قازان ايىندا اياقتالۋى ءتيىس, – دەدى ول.
ءومىرتاي شەريازدانوۆتىڭ ايتۋىنشا, قاراعاندى تەمىرجول ۆوكزالى قايتا جاڭارتىلعاننان كەيىن ءسان-سالتاناتى بويىنشا ەلىمىزدەگى ەڭ ۇزدىك كەرۋەن سارايلارىنىڭ ءبىرى بولماقشى. مىسالى, عيماراتتى ارلەۋ جۇمىستارىنا زاماناۋي ماتەريالدار, اتاپ ايتقاندا, تابيعي تاسقا ۇقساستىعى وتە جاقىن تراۆەرتين قولدانىلىپ جاتىر. ايتا كەتەتىن تاعى ءبىر جايت, جاڭارتۋدان كەيىن عيمارات تاريحي ارحيتەكتۋرالىق كەلبەتىن جوعالتپايتىن بولادى. ۆوكزال قاسبەتىنىڭ ءستيلى وزگەرىسكە ۇشىرامايدى, ال عيمارات ىشىندەگى بىرەگەي ورنەكتەلگەن جاپسىرمالار ساقتاۋلى كۇيىندە قالادى.
عيماراتتىڭ ءۇش قاباتتى جاڭا قاناتىندا كاسسالار, كۇتۋ زالدارى, مەدپۋنكت, مۇمكىندىگى شەكتەۋلى ادامدارعا ارنالعان دەمالىس بولمەسى, انا مەن بالا بولمەسى, فۋدكورتتار مەن ساۋدا دۇڭگىرشەكتەرى ورنالاسادى. جولاۋشىلار پەررونعا جەر ءۇستى وتكەلدەرى بويىنشا تۇسەتىن بولادى. ءبىر سوزبەن ايتقاندا, ۆوكزالدىڭ كەلۋشىلەر ءۇشىن ىڭعايلى, قاۋىپسىز ءارى كەڭ بولۋى باستى ماقسات ەتىپ قويىلعان.
تەمىر جول ۆوكزالىنىڭ جاعىرتىلۋى ءوڭىر باسشىلىعىنىڭ ءجىتى نازارىندا. تاياۋدا وبلىس اكىمى ەرلان قوشانوۆ عيماراتتاعى قۇرىلىس جۇمىستارىمەن تانىسىپ, مەردىگەر كومپانيا باسشىلارىنا بىرقاتار تاپسىرما بەردى. اتاپ ايتقاندا, ول جۇمىس كەستەسىنىڭ ساقتالىپ, جوندەۋ جۇمىستارىنىڭ جىل سوڭىنا دەيىن تولىقتاي اياقتالۋ كەرەكتىگىن ەسكە سالدى. سونداي-اق, ءوڭىر باسشىسى جۇمىس بارىسىندا تۋىنداعان بارلىق ماسەلەلەردى جەدەل شەشىپ وتىرۋدى شەگەلەپ تاپسىردى.
قاراعاندى وبلىسى
