الماتى قالاسىن دامىتۋعا باعىتتالعان كەڭەستە تالقىلانعان نەگىزگى ماسەلەلەر قاتارىندا قولجەتىمدى تۇرعىن ءۇي جانە الەۋمەتتىك نىساندار سانىن كوبەيتۋ, جۇرتشىلىقتى تۇراقتى جۇمىسپەن قامتۋ, كولىك جانە جول ينفراقۇرىلىمىن جەتىلدىرۋ, كاسىپكەرلىكتى دامىتۋ مەن تۋريستىك سالانىڭ الەۋەتىن ارتتىرۋ سىندى ماڭىزدى تاقىرىپتار سارالاندى. ۇكىمەت باسشىسى قالا مەن وبلىستاعى حالىق سانى ءوسۋىنىڭ جوعارى قارقىنىنا بايلانىستى دامۋدىڭ وزەكتى تۇيتكىلدەرىن شەشىپ, سول ارقىلى ءوڭىردىڭ ينۆەستيتسيالىق تارتىمدىلىعىن ارتتىرۋ قاجەت ەكەنىن ايرىقشا اتاپ ءوتتى. ول بىرلەسكەن جوبالاردى ىسكە اسىرۋ جانە العا جىلجىتۋ ءۇشىن الماتى مەن الماتى وبلىسىنىڭ جوبالىق ءوفيسىن قۇرۋدى تاپسىردى.
تۇڭعىش پرەزيدەنت – ەلباسى نۇرسۇلتان نازارباەۆ تاۋەلسىزدىكتىڭ التىن بەسىگىنە بالاناتىن الماتى قالاسىنىڭ دامۋىنا ۇلكەن كوڭىل ءبولىپ وتىرعانىن, مەملەكەت باسشىسى قاسىم-جومارت توقاەۆ قالا ينفراقۇرىلىمىنىڭ ساپاسىن جاقسارتۋ, قوعامدىق قاۋىپسىزدىكتى نىعايتۋ, كولىك جۇيەسىن, مەديتسينا مەن ءبىلىم بەرۋدى دامىتۋ جونىندە ناقتى تاپسىرمالار بەرگەنىن تىلگە تيەك ەتكەن ۇكىمەت باسشىسى, مەملەكەتتىك ورگاندارعا الماتىنىڭ ەل ەكونوميكاسىنداعى ماڭىزدىلىعىن اتاپ ءوتىپ, ميلليونداردى توعىستىرعان مەگاپوليستىڭ دامۋىن ۇدايى باقىلاۋدا ۇستايتىنىن جەتكىزدى. باسقوسۋ بارىسىندا الماتى قالاسىنىڭ اكىمى باقىتجان ساعىنتاەۆ قالانى دامىتۋ جوبالارى تۋرالى باياندادى.
پرەمەر-مينيستر الماتى قالاسىنىڭ شەتكەرى اۋداندارى مەن الماتى وبلىسىنىڭ ىرگەلەس اۋماعىن دامىتۋ كۇن تارتىبىندە تۇرعان ماڭىزدى ماسەلە ەكەنىن باسا ايتتى. بۇل تۇرعىدا اتقارىلىپ جاتقان اۋقىمدى جۇمىستىڭ بارلىعى ەل يگىلىگى مەن تۇرعىنداردىڭ جايلى ءومىرى ءۇشىن جاسالعان مەملەكەت قولداۋى ەكەنىن ەسكەرگەن ءجون. ەسكە سالساق, 2019 جىلى تۇڭعىش پرەزيدەنت – ەلباسى ن.ءا.نازارباەۆتىڭ تاپسىرماسىمەن ءىرى قالالاردىڭ شەتكەرى ايماقتارىنىڭ ماسەلەلەرىن شەشۋگە جىل سايىن 30 ملرد تەڭگە, ونىڭ ىشىندە الماتى قالاسىنىڭ شەتكەرى ايماقتارىنا 10 ملرد تەڭگە بولىنگەن بولاتىن.
«اگلومەراتسيا تۇرعىندارىنىڭ تۇرمىس ساپاسىن جاقسارتۋ جونىندەگى شارالاردى جۇزەگە اسىرۋ قالا مەن وبلىستىڭ 730 مىڭنان استام تۇرعىنىن ءتيىستى ينفراقۇرىلىممەن قامتاماسىز ەتۋگە مۇمكىندىك بەرەدى», دەدى ا.مامين.
پرەمەر-مينيستر كەڭەس قورىتىندىسى بويىنشا قارجى جانە ۇلتتىق ەكونوميكا مينيسترلىكتەرىنە مۇددەلى مەملەكەتتىك ورگاندارمەن, الماتى جانە الماتى وبلىسىنىڭ اكىمدىكتەرىمەن بىرلەسىپ, قالا ماڭىنداعى اۋدانداردى, ىرگەلەس اۋماقتاردى دامىتۋ بويىنشا ءىس-شارالاردى ۋاقتىلى جۇزەگە اسىرۋدىڭ قاجەتتى شارالارىن قابىلداپ, قارجىلاندىرۋ ماسەلەلەرىن پىسىقتاۋدى تاپسىردى.
ەل ۇكىمەتىنىڭ باسشىسى «ۋربانيستيكا ورتالىعى» مەن №405 اۆيا جوندەۋ زاۋىتىندا بولىپ, الماتى قالاسى قۇرىلىسىنىڭ جاڭا جوباسىمەن, قالانىڭ قۇرىلىس يندۋسترياسىن دامىتۋ جوسپارلارىمەن تانىستى, سونداي-اق قۇرىلىسشىلار كۇنىنە ارنالعان سالتاناتتى جيىنعا قاتىستى.
سونداي-اق الماتى قالاسىنا جۇمىس ساپارى بارىسىندا پرەمەر-مينيستر ايگىلى الما-اراسان بوكتەرىندەگى ايۋساي شاتقالىن تازارتۋعا ارنالعان ەكولوگيالىق سەنبىلىككە قاتىسىپ, تابيعات تازالىعى مەن ەكولوگياعا ەنجار قاراي المايتىن ەل تۇرعىندارىنا جاقسى ۇلگى كورسەتتى. قالا جۇرتشىلىعىن جۇدىرىقتاي جۇمىلدىرعان شاراعا مىڭعا تارتا ادام اتسالىستى. ەلىمىزدىڭ ءار ايماعىندا جاپپاي قولداۋ تاۋىپ جاتقان «بىرگە – تازا قازاقستان!» ەكولوگيالىق جوباسى ۇكىمەت باسشىسىنىڭ تىكەلەي باستاماسىمەن جۇزەگە اسقان بولاتىن.
الماتى
