ءا.قاستەەۆ مۇراجايىنىڭ قابىرعاسىنان سۋرەتشىنىڭ «DEBUT» اتتى شىعارماشىلىق كورمەسى اشىلدى. وسىعان دەيىن تالاي بايقاۋلاردا توپ جارىپ, تالاي كورمەنىڭ كورىگىن قىزدىرىپ جۇرسە دە الماس ءۇشىن كەڭ اۋقىمدا ۇيىمداستىرىلعان تۇڭعىش جەكە كورمەسىنىڭ ماڭىزى زور. كورمەگە سۋرەتشىنىڭ ۇستازدارى مەن قالامداس-قاناتتاستارى كىل جۇيرىك كارتينالار دەپ باعالاعان ۇزدىك شىعارمالارى ۇسىنىلعان. قىلقالام شەبەرى ناتۋرانى جالپىلاۋ مەن مونۋمەنتاليزاتسيالاۋعا جاقىن. ول نەگىزگى بەينەنى شىنايى جازۋ ءۇشىن عانا ەمەس, سونىمەن قاتار ونىڭ جاسىرىن ىشكى ماعىناسىن كورسەتۋدى ماقسات تۇتقان.
الماس شىعارمالارىندا كوشپەلى حالقىمىزدىڭ تۇرمىس تىرشىلىگى, سالت-ءداستۇرى, ادەت-عۇرپى كەڭىنەن كورىنىس تابادى. تۇياعىمەن ور قازىپ, اۋىزدىعىمەن الىسقان تۇلپار دا, جاۋىنا جەبەدەي اتىلعان حاس باتىر دا, سامالمەن جارىسىپ ىڭكارىنە جان ءسوزىن ايتۋعا اسىققان بوزبالا دا, تىرشىلىكتىڭ تىنىمسىز قوزعالىستار مەن ۇزدىكسىز كۇرەستەردەن تۇراتىنىنا ۇڭىلدىرەدى, فيلوسوفيالىق تەرەڭدىككە تارتادى. ەڭ باستىسى, شىعارمالارىنىڭ رۋحىنان حالقىمىزعا ءتان مىنەز بايقالادى.
– الماس ءوزىنىڭ كەسكىندەمەلىك تۋىندىلارىندا دەتاليزاتسيادان سانالى تۇردە الشاقتاپ, كومپوزيتسيانىڭ مونۋمەنتالدىعىنا ۇمتىلادى. ول ءوزى مەن كەنەپتەگى بەينەنىڭ ارا قاشىقتىعىن ساقتاي وتىرىپ جالپىلىققا قول جەتكىزەدى. ياعني, سۋرەتشى سىرتقى تۇرمىستىق سۋرەتتەۋدەن گورى فيلوسوفيالىق ويلاۋعا تالپىنادى. وعان اۆتوردىڭ «اكە قاناتى», «ديالوگ», «اۋىز بەكىتۋ», «سىرلاسۋ», «كەلىسىم الدىندا» كومپوزيتسيالارى جاقسى مىسال بولا الادى. مۇندا قىلقالام شەبەرى باستى بەينەنى اۋقىمدى ەتىپ كورسەتسە, جازىقتىق بەتىندەگى زاتتار مەن فيگۋرالار ءۇشىن كەنەپ كولەمى ارقاشان تارلىق ەتەتىندەي اسەر قالدىرادى.
ال «اۆتوپورترەتىندە» ءار كەزەڭدە دە ءوز ءداۋىرىنىڭ قاھارمانى بولىپ تابىلاتىن سۋرەتشى بەينەسىن كۇردەلى قوزعالىستا بارىنشا ايشىقتى ەتىپ جازادى. مۇنداعى سۋرەتشىنىڭ باستى قارۋلارى – قىلقالام مەن پاليترا. سونىمەن قاتار «ويانۋ», «قىزىل كىتاپ», «جاڭا اۋەن», «سۋرەتشىنىڭ جولى», «شارىقتاۋ» كەنەپتەرى تۇرمىستىڭ شيەلەنىسىن, شىعارماشىلىقتىڭ تىنىسىن, سەزىم مەن ويدىڭ درامالىق ديالوگىن كورسەتەدى. نۇرعوجاەۆ شىعارماشىلىعىندا زاماناۋي قازاق بەينەلەۋ ونەرىندەگى جاڭا ىزدەنىستەر مەن تالپىنىستار كورىنىس تابۋدا, – دەيدى كورمە جەتەكشىسى ونەرتانۋشى سامال مامىتوۆا.
سۋرەتشىنىڭ قالامىنا ىلىككەن تاقىرىپتاردىڭ جەلىسى كەڭ. اكە مەن بالا, ماحاببات, قوعامداعى وتكىر ماسەلەلەر, سونداي-اق ەڭ باستىسى ادام جانە ونىڭ ومىرمەن نەمەسە وزىمەن كۇرەسى. بۇل بەينەلەردىڭ ارقايسىسى عالامدىق تەبىرەنىسپەن كومكەرىلگەن. ولار وتكىر جاعىستار مەن مونوحرومدى تۇستەر ۇيلەسىمىندە كۇردەلى راكۋرستا شەشىلىپ, دەنە-بىتىمدەرىنە ەرەكشە ءمان بەرىلە بەينە ءبىر ءمۇسىنشى سەكىلدى ساز بالشىقپەن ەمەس, ءتۇس ارقىلى سومدالادى. جۇماقىن قايرامباەۆ, ومىربەك جۇبانيازوۆ سەكىلدى ۇستازداردىڭ شەبەرحاناسىندا شىڭدالعان الماس نۇرعوجاەۆ تا بۇگىنگى تاڭدا و. تاڭسىقباەۆ اتىنداعى الماتى ساندىك-قولدانبالى ونەر كوللەدجىندە شاكىرت باۋلىپ ءجۇر.
الماتى
