16-20 تامىز ارالىعىندا دۇنيە ءجۇزىنىڭ جاس كوشباسشىلارى قازاقستان استاناسىنا الەمنىڭ ەڭ اۋقىمدى ستۋدەنتتىك جوبالارىنىڭ ءبىرى – HPAIR Asia Conference-2019 شاراسىنا قاتىسۋ ءۇشىن جينالادى. كونفەرەنتسيا ۇيىمداستىرۋشىلارى دەلەگاتتار مەن باس شاھار حالقىن ەستەن كەتپەس اسەرگە بولەۋ ءۇشىن دە جوبا باعدارلاماسىن ءتۇرلى مادەني باستامالارمەن بايىتىپتى. سونىڭ ءبىرى – I Carnival مادەنيەت جانە ءداستۇر كارناۆالى. حالىقارالىق جارمەڭكە فورماتىندا وتەتىن ونەر وقيعاسى قالا تۇرعىندارى مەن قوناقتارىنا كونفەرەنتسيا دەلەگاتتارى ۇسىنار ءداستۇرلى تاعامداردىڭ ءدامىن تاتىپ, ۇلتتىق كادەسىيلار ساتىپ الۋىنا تاماشا مۇمكىندىك بەرەدى. ال ايتۋلى جوبا اياسىندا وتەتىن I Night حالىقارالىق مادەنيەت مەرەكەسىندە ءتۇرلى ەلدەن كەلگەن قاتىسۋشىلار ءوز حالقىنىڭ ۇلتتىق مۋزىكا, تەاتر جانە بي ونەرىنەن شاشۋ شاشادى.
– I Night جانە I Carnival جوباسى – الەمنىڭ ءتۇرلى حالىق وكىلدەرى اراسىنداعى رۋحاني دوستىق پەن ىنتىماقتاستىقتى نىعايتۋعا ىقپال ەتەتىن بىرەگەي مادەني وقيعالاردىڭ ساناتىندا. وسى ورايدا ءبىز ءوز تاراپىمىزدان Kazakhstan Night جەكە ءىس-شاراسىن دايىنداپ جاتىرمىز. وندا شەتتەن كەلگەن قوناقتارعا قازاق مۋزىكاسىنىڭ جاۋھارلارىن, اتاپ ايتساق دومبىرا مەن قوبىزدىڭ ەجەلگى كۇيلەرىنەن باستاپ, Q-pop زاماناۋي مادەنيەتىنە دەيىنگى عاسىرلار بويعى ەۆوليۋتسياسىن كورسەتكىمىز كەلەدى. الەمنىڭ تۇكپىر-تۇكپىرىنەن جينالعان كونفەرەنتسيا قاتىسۋشىلارى – قۇرمەتتى مەيماندارىمىزدىڭ ەلوردامىز, جالپى قازاقستان تۋرالى ۇمىتىلماس اسەر العانىن قالايمىز, – دەيدى HPAIR Asia Conference-2019 ۇيىمداستىرۋ كوميتەتىنىڭ توراعاسى, نازارباەۆ ۋنيۆەرسيتەتتىڭ ستۋدەنتى ءلايلا احمەتوۆا.
ەستەرىڭىزگە سالا كەتەيىك, HPAIR Asia Conference-2019 كونفەرەنتسياسىن نازارباەۆ ۋنيۆەرسيتەتپەن ىنتىماقتاستىقتا ازيا جانە حالىقارالىق قاتىناستار بويىنشا گارۆارد ۋنيۆەرسيتەتى (HPAIR: Harvard College Project for Asian and International Relations) بىرلەسىپ ۇيىمداستىرادى. ءوزىنىڭ 28 جىلدىق تاريحىندا HPAIR Asia Conference ورتالىق ازيا اۋماعىندا العاش رەت وتكەلى وتىر. كونفەرەنتسيانىڭ كۇن ءتارتىبى التى تاقىرىپتىق باعىتتى جانە اۋقىمدى مادەني باعدارلامانى قامتيدى.
