ول كەزدە, ءدال وسى جەردە, لەنين اتىنداعى كولحوزدىڭ مادەنيەت ءۇيى سانالاتىن ەڭسەلى عيماراتتىڭ الدىندا پرولەتاريات كوسەمدەرى لەنين مەن ءستاليننىڭ (كەڭەس وداعىنىڭ بارلىق بۇرىشىنا كەڭ تاراعان «لەنين مەن ستالين گوركادا» مونۋمەنتى - اۆت.) اياقتارىن ايقاستىرىپ, ءبىر-بىرىنە ەمىنە قاراپ وتىرعان ەرەكشە ەسكەرتكىش تۇرىپتى. وزات كولحوزشى العاداي بوكەنباەۆ كوكەمنىڭ اۋداندىق رەداكتسياعا كەلگەن ءبىر ساتىندە ايتقانى: 1953 جىلدىڭ سۋىق كوكتەمىندە دۇنيەدەن وتكەن ءستاليننىڭ تاس ءمۇسىنىن ورنىنان الىپ تاستاۋ تۋرالى ەكى جىلدان سوڭ باستالعان ناۋقان ۇزىناعاشقا دا جەتەدى. تاپسىرما ءتۇسۋىن تۇسكەنمەن كولحوز باسشىلارى كۇندەي كۇركىرەپ نەمىستى جەڭگەن قاھارلى كوسەمنىڭ تاس ءمۇسىنىن قۇلاتۋعا جۇرەكتەرى داۋالامايدى. اقىرى پارتيا ۇيىمى باس بولىپ, تيراننىڭ ەسكەرتكىشىن قالايدا وسى ءتۇنى تايدىرۋعا تاس-ءتۇيىن بەكىنەدى. پارتيا «تاپسىرىسىن» ورىنداۋ اتاقتى كوممۋنيست-تراكتورشىعا جۇكتەلەدى. باتىلدىق ءۇشىن جارتى بوتەلكە اراق ءىشىپ, ءتۇن جامىلىپ جالعىز جورىققا شىققان ول باتىردىڭ «كوزسىز ەرلىگى» سول كۇن ەرتەسىمەن-اق جازىلماعان تاريحقا اينالاتىنىن ەشكىم بىلمەگەن! سويتسە, ماڭدايداعى قوس شامىنىڭ ءبىر كوزى عانا ولىمسىرەپ جاناتىن شىنجىر تاباندى «دت» تراكتورىمەن دىتتەگەن جەرىنە ۇرەي قۇشاعىندا جەتكەن تراكتورشى تەمىر ارقاندى لەنيننىڭ موينىنا لاقتىرىپ, تاس ءمۇسىندى ساي تابانىنا ءبىر-اق سۇيرەپ اپارىپ تاستاعان ەكەن...
ارينە تاريحي ساباقتاستىق دەۋگە كەلمەس, كوپ كەشىكپەي ستالين «كەتىپ», لەنيننىڭ ءمۇسىنى ەكىنشى مارتە تۇعىرىنا «ىڭ-شىڭسىز» قايتا قونعان ءدال سول جەردە ەر قاراساي بابامىزدىڭ ەسكەرتكىشىنىڭ دە ءبىر ورىنعا ەكى مارتە قويىلعانى بار. ويتكەنى باتىردىڭ ءبىرىنشى ەسكەرتكىشىندەگى ات پەن ادامنىڭ تاستان قاشالعان مۇسىندەرىنىڭ كولەم-ولشەمى ەش ۇيلەسپەسە دە ءبىرشاما جىل «ەسكەرتكىش اتىن جامىلىپ تۇردى». ابىروي بولعاندا, كوزىقاراقتى ازاماتتار قاتەلىكتى تۇزەتتى, شۇكىر. الماتىداعى اتىنىڭ التى قۇلاش سۇيرەتىلگەن قۇيرىعى جەر تىرەگەن, ءوزىنىڭ كەرنەيدەي قالپاعى كوك تىرەگەن ابىلايحان ەسكەرتكىشىنە قاراي-قاراي, «كۇڭكىلدەي-كۇڭكىلدەي» ءجۇرىپ حالىقتىڭ كوزى وعان دا ۇيرەندى. ەندىگى جەردە «ە-ە, ومىردە ارىستانداي ايبارلى ابىلايحان مەن ونىڭ ارعىماعى وسىنداي بولعان» دەپ, بۇل قۇبىلىستى جاس ۇرپاقتىڭ ساناسىنا ءسىڭىرۋ عانا قالدى. وسىندايدا تاستان قاشاسا دا, شويىننان قۇيسا دا كەيىپكەرىن اينىتپايتىن حاس شەبەر, قازاقتان شىققان تۇڭعىش ءمۇسىنشى, قازاقستاننىڭ حالىق سۋرەتشىسى حاكىمجان ناۋرىزباەۆتىڭ ەسىمىن ەسكە الىپ, شەبەرلىگىنە باس شايقايسىڭ. «اباي», «شوقان», «جامبىل», «بالا جامبىل» ەسكەرتكىشتەرى!..
