اۋىلدا… قۇبىر شىعارىلادى
سارسەنبى, 17 ءساۋىر 2013 2:08
ءۇرجار اۋدانىنىڭ اكىمى باۋىرجان جاناقوۆ شالعايداعى وڭىرگە ىسساپارمەن كەلگەن ءبىزدىڭ بۇيىمتايىمىزدى بىلىسىمەن, «وڭىردە جاڭالىق كوپ» دەپ الىپ, ماقانشى اۋىلىندا ەلىمىزدە تەڭدەسى جوق پلاستيكالىق قۇبىرلاردى شىعارىپ جاتقان «ءباتۋا» جاۋاپكەرشىلىگى شەكتەۋلى سەرىكتەستىگىنىڭ 3 ميلليارد تەڭگە ءوز قارجىلارىنا پلاستيكالىق زاۋىتتى ىسكە قوسقاندارىن, ول-ول ما, سارىتەرەك تەلىمىندە 1900 گەكتارعا سويا داقىلىن ەگىپ, ونى ەكسپورتقا شىعارا باستاعاندارىن, قوناقۇي, جاتاقحانا, اسحانا, ەكى استىق ساقتايتىن قورانى سالعاندارىن, اۋدان بيۋدجەتىنە قىرۋار قارجى قۇيعاندارىن, جۇزدەگەن ادامدى جۇمىسقا قابىلداعاندارىن» ىلتيپاتپەن جەتكىزدى.
سارسەنبى, 17 ءساۋىر 2013 2:08
ءۇرجار اۋدانىنىڭ اكىمى باۋىرجان جاناقوۆ شالعايداعى وڭىرگە ىسساپارمەن كەلگەن ءبىزدىڭ بۇيىمتايىمىزدى بىلىسىمەن, «وڭىردە جاڭالىق كوپ» دەپ الىپ, ماقانشى اۋىلىندا ەلىمىزدە تەڭدەسى جوق پلاستيكالىق قۇبىرلاردى شىعارىپ جاتقان «ءباتۋا» جاۋاپكەرشىلىگى شەكتەۋلى سەرىكتەستىگىنىڭ 3 ميلليارد تەڭگە ءوز قارجىلارىنا پلاستيكالىق زاۋىتتى ىسكە قوسقاندارىن, ول-ول ما, سارىتەرەك تەلىمىندە 1900 گەكتارعا سويا داقىلىن ەگىپ, ونى ەكسپورتقا شىعارا باستاعاندارىن, قوناقۇي, جاتاقحانا, اسحانا, ەكى استىق ساقتايتىن قورانى سالعاندارىن, اۋدان بيۋدجەتىنە قىرۋار قارجى قۇيعاندارىن, جۇزدەگەن ادامدى جۇمىسقا قابىلداعاندارىن» ىلتيپاتپەن جەتكىزدى.
«جاقسىنى كورمەككە» دەگەن, سالىپ ۇرىپ ماقانشىعا جەتتىك. 45 شاقىرىمدىق جول تاقتايداي تەگىس, اسفالت توسەلگەن, الماتى, تاسكەسكەن, ءۇرجار ارقىلى قىتايدىڭ ۇرىمشىسىنە دەيىن سالىنىپ جاتقان ساپالى جولدىڭ «الماتى – وسكەمەن» تراسساسىنا دەيىنگى ارالىقتاعى جوندەۋ جۇمىستارى باستالىپ كەتىپتى.
ماقانشى اۋىلدىق وكرۋگىنىڭ اكىمى سوۆەتحان قاليەۆ ءبىزدى اۋىلدىڭ شەت جاعىنداعى پلاستيكالىق زاۋىتتىڭ اۋلاسىنا الىپ كەلدى. 630 جانە ودان ءسال جىڭىشكەلەۋ 315 ميلليمەترلىك, ۇزىندىعى 6 مەترلىك قۇبىرلار تاۋ-تاۋ بولىپ ءۇيىلىپ جاتىر. بۇل قۇبىرلار اۋىل شارۋاشىلىعى القاپتارىن سۋلاندىرۋدا تاپتىرمايتىندى. قالا ۇيلەرىندەگى سۋ, بۋ قۇبىرلارىنداعى اتالمىش پلاستيك بۇيىمدار تەمىرگە قاراعاندا ەكى-ءۇش ەسە ءتوزىمدى. پلاستيك قۇبىرلار 50-60 جىلعا دەيىن شىرىمەيدى, ونى الماستىرۋ دا ونشا قيىندىق تۋعىزبايدى.
– زاۋىتتىڭ اشىلعانىنا ءبىر جىل. ال «ءباتۋا» سەرىكتەستىگىنىڭ قۇرىلعانىنا ءۇش جىل. سەرىكتەستىك باسشىلارى 3 ميلليارد تەڭگە ءوز قارجىلارىن سالىپ, سارىتەرەكتە سويا ءوسىرىپ جاتىر, ءتۇرلى عيماراتتاردى سالىپ, كوپتەگەن تەحنيكا ساتىپ الدى. سويانىڭ ءبىر تونناسى 80-100 مىڭ تەڭگە تۇرادى. 2012 جىلى 2400 گەكتارعا سويا ەگىپ, گەكتارىنان 20 تسەنتنەر ءونىم الدىق. دەمەك, كەتكەن قارجى ەسەلەنىپ قايتادى دەگەن ءسوز. قازىر پلاستيك قۇبىرلار زاۋىتىندا 49 ادام جۇمىس ىستەسە, ال سويا وسىرۋمەن جاز كەزىندە 300-گە تارتا ادام اينالىسادى, – دەيدى «ءباتۋا» سەرىكتەستىگىنىڭ پلاستيكالىق زاۋىتتاعى ۇيلەستىرۋشىسى ەربوسىن قاشاقوۆ.
قازىر دالادا 630 مم. 5 مىڭ مەتر, 315 مم. 3 مىڭ مەتر قۇبىر ءازىر تۇر. قۇبىرلارعا دەگەن سۇرانىس ۇلكەن. بىراق ءبىز سويا ءوسىرەتىن القاپقا قۇبىرلاردى تارتىپ, تامشىلاتىپ سۋارۋدى جۇزەگە اسىرىپ جاتىرمىز. ءوزىمىزدىڭ قاجەتتىلىگىمىزدى ورىنداعان سوڭ ساتىپ, پايدا تابۋ دا ويدا بار. ءبىزدىڭ جوبا يندۋستريالاندىرۋ كارتاسىنا ەنگىزىلگەن. ۇكىمەتتەن 730 ميلليون تەڭگە العان سوڭ باسقا دا ءىرى جوبالاردى جۇزەگە اسىرۋ ويدا بار. ەڭ باستىسى, شالعايداعى ءۇرجار اۋدانى تۇرعىندارىن جۇمىسپەن قامتاماسىز ەتسەك, ابىروي ەمەس پە, دەيدى ەربوسىن الداسۇگىر ۇلى.
پلاستيكالىق زاۋىتتا ەڭبەك ەتىپ جاتقان ماقانشى اۋىلىنىڭ تۇرعىندارى بەرىك قالقاروۆ, نۇرداۋلەت ورداشەۆ,تۇرلان ساليەۆ, تاعى باسقالار جالاقىنى ۋاقتىلى الىپ تۇراتىندارىن, ماماندىققا توسەلىپ العاندارىن, الداعى ۋاقىتتا تاعى دا جۇمىس كۇشىنىڭ قاجەت بولاتىنىن ايتادى.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
ءۇرجار اۋدانى.
سۋرەتتى تۇسىرگەن اۆتور.
