ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ العاشقى جارتىجىلدىق كولەمىندە ەل ەكونوميكاسىنىڭ ءوسىمى 4,1 پايىزعا, نەگىزگى كاپيتالعا سالىنعان ينۆەستيتسيالاردىڭ مولشەرى 11,7 پايىزعا وسكەنىن ايتا كەلىپ, حالىقتىڭ الەۋەتىن ارتتىرۋعا باعىتتالعان كەشەندى شارالاردى ودان ءارى دامىتۋ قاجەتتىگىن العا تارتقان بولاتىن. بۇكىل الەم ەكونوميكاسىن, ەۋرووداقتاعى جاعدايلاردى سارالار بولساق, قازاقستاننىڭ قازىرگى جاعدايى جامان ەمەس. ءتىپتى ءبىر پايىزدىق ءوسىمنىڭ ءوزى جاقسى كورسەتكىش.
ءبىز ماكروەكونوميكالىق كورسەتكىشتەردى كوبىرەك نەگىزگە الىپ جاتامىز. بۇل رەتتە ميكروەكونوميكالىق جاعدايلارعا دا اسا ءمان بەرۋ قاجەت. ويتكەنى مۇنىڭ ارتىندا ادام كاپيتالى, حالىقتىڭ الەۋمەتتىك جاعدايى جاتىر. الەمدىك تاجىريبەگە سۇيەنسەك, حالىقتىڭ ەكونوميكالىق يممۋنيتەتىن قۋاتتاندىراتىن باستى كۇش – سالىق. مەنىڭشە, بىزدەگى سالىقتىڭ ءتۇسىمى ءوز دەڭگەيىندە ەمەس سەكىلدى.
ەكونوميكانىڭ نەگىزگى قوزعاۋشى كۇشى – كاسىپكەرلەر. ءيا, كاسىپكەرلىكتى قولداۋعا ۇلكەن باسىمدىق بەرىپ وتىرمىز. الايدا, ولاردىڭ سالىق تولەۋ ماسەلەسى ءالى دە تولىق جولعا قويىلماعان. تابىس تابۋ بار دا, سوعان سالىق تولەۋ جاعى كەمشىن. وسى ماسەلە ايرىقشا ءمان بەرۋدى قاجەت ەتەتىن جاعدايلاردىڭ ءبىرى.
كاسىپكەرلەردىڭ حالىق الدىنداعى جاۋاپكەرشىلىگى قاي دەڭگەيدە ەكەنىنە كوبىرەك ءمان بەرەتىن كەز كەلدى. بىرىنشىدەن, جوعارىدا ايتقان سالىق تولەۋ ماسەلەسى. ەكىنشىدەن, ءوزى شىعارعان ءونىمدەرىنىڭ ساپالى بولۋىن قاداعالاۋعا, حالىق تۇتىناتىن بارلىق تاۋارلاردىڭ جوعارى ساپا ۇدەسىنەن شىعا بىلۋىنە كاسىپكەرلىكپەن اينالىساتىن ازاماتتار جەتە ءمان بەرۋگە ءتيىس. كوپتەگەن ءوندىرۋشى كومپانيالار تەكسەرىس ءتيىستى دارەجەدە بولماعان سوڭ تاۋار ساپاسىنا سىلبىر قارايتىندى شىعاردى. اينالىپ كەلگەندە مۇنىڭ استارىندا ۇلت دەنساۋلىعى دەگەن ۇلكەن ماسەلە جاتىر.
قازىر فەرمەرلىك شارۋاشىلىقتان كەلەتىن تاۋارلاردىڭ باسىم بولىگى ءتۇرلى قوسپالارعا تولى. ءتىپتى الىپ مەگاپوليس سانالاتىن الماتىنىڭ اينالاسىنان ءتاۋىر ءسۇت نەمەسە ەت ونىمدەرىن ساتىپ الۋدىڭ ءوزى قيىن. مۇنداي پروبلەما ءاربىر وڭىردە بار. وسىنى باستى نازاردا ۇستاپ, قويىلاتىن تالاپتى بارىنشا كۇشەيتسەك, ەكونوميكامىز ورىستەيدى ءارى حالىق تۇتىناتىن تاۋارلار ساپاسى ارتا تۇسەدى.
دامىعان يندۋسترياسىز, عىلىمي جەتىستىكتەرسىز يننوۆاتسيالىق ەكونوميكانى دامىتۋ مۇمكىن ەمەس. سوندىقتان يندۋستريانى ءورىستەتۋ ءۇشىن ۇلكەن زاۋىت-فابريكالار سالعاندا ونىڭ يننوۆاتسيالىق قىرىنا ءمان بەرۋ كەرەك. سونىمەن قاتار ولاردىڭ ءوندىرەتىن تاۋارلارى الەمدىك ستاندارتقا ساي, باسەكەگە قابىلەتتى ءونىم بولۋى شارت. بۇل تۇرعىدا تەك ەكسپورت ماسەلەسىن العا وزدىرىپ قويماي, ءوز حالقىمىزدى كيىم-كەشەكپەن, ازىق-ت ۇلىكپەن جانە باسقا دا قاجەتتى تاۋارلارمەن قامتاماسىز ەتۋ جايىن رەتكە كەلتىرسەك, ناعىز جەتىستىك وسى. پرەزيدەنتىمىز دە وسى جاعدايعا باسا نازار اۋدارۋ كەرەكتىگىن العا تارتىپ وتىر.
