ابىرالى ولكەسى – ونەر كەنىشى. شەرتپە كۇيدىڭ شەبەرى تاتتىمبەت, ءان دۇلدىلدەرى – ءامىرە قاشاۋباەۆ پەن ءجۇسىپبەك ەلەبەكوۆ, قازاق حالقىنىڭ ماقتان تۇتقان بۇلبۇل قىزى – بيبىگۇل تولەگەنوۆا ابىرالىدان تۇلەپ شىققاندار. وسىلارعا قاراپ-اق, ولكە ونەرىن باعامداي بەرىڭىز. ونىڭ سىرتىندا ۇجىم 1994 جىلى مادەنيەت مينيسترلىگىنىڭ ۇيعارىمىمەن الماتى قالاسىندا «ابىرالى اۋدانىنىڭ كۇندەرىن» وتكىزىپ, تەاتر جانىنان قۇرىلعان «قاينار» جانە «مەيزەك» انسامبلدەرى وسى جولى حالىقتىق اتاققا قول جەتكىزگەنى تاعى بار. كەلەسى 1995 جىلى ۇجىم ەلىمىز اتىنان تۇركياعا بارىپ تۇركى تەكتەس ەلدەر ونەر فەستيۆالىنە قاتىسىپ, اۋىل ابىرويىن اسىرعان.
2008 جىلى قاينارلىق ورەندەر تۋما تالانت يەسى امىرە قاشاۋباەۆتىڭ 120 جىلدىعىنا بايلانىستى «پاريجگە بارعان دومبىرا» اتتى سپەكتاكدى بيىك دەڭگەيدە ساحنالاپ, 2009 جىلى رەسپۋبليكا كولەمىندە وتكەن مارتەبەلى بايقاۋعا «ابىلاي حان» پەساسىن قويىپ, باس ءجۇلدەنى جەڭىپ العان.
جوعارىداعى ونەر سايىسىندا تەاتر ونەرپازدارى بيسات شاعىروۆ, ۇلان ىسقاقوۆ پەن باۋىرجان توكەنوۆ جاڭا قىرلارىنان تانىلسا, ۇجىمنىڭ كوركەمدىك جاعىنان وسۋىنە مادەنيەت ءۇيىنىڭ ديرەكتورى قۇدايبەرگەن تۇرىسبەكوۆتىڭ سىڭىرگەن ەڭبەگى وتە زور.
جاقىندا تەاتردىڭ مەرەيتويىنا وراي قاينار اۋىلىندا القالى جيىن ءوتتى. وندا وبلىستىق اقساقالدار كەڭەسى توراعاسىنىڭ ورىنباسارى جانە اۋىل تەاترىن ۇيىمداستىرۋشىلاردىڭ ءبىرى ءدۇيسەنباي قوشقاربەك ۇلى ءسوز سويلەپ, اۋىل مادەنەتىنىڭ بيىك دارەجەگە كوتەرىلۋىنە ۇلەس قوسقان ەل ازاماتتارى ءتولجۇما ارىستانباەۆ, مەيرامبەك يساتاەۆ, بولاتبەك جانبولاتوۆ ت.ب. ازاماتتاردىڭ ەڭبەگىن ەسكە السا, جيىننىڭ قۇرمەتتى قوناعى سەمەي قالاسىنىڭ اكىمى ەرماك ءسالىموۆ قاينار حالىق تەاترى 1969 جىلدىڭ جەلتوقسان ايىندا رەسپۋبليكالىق بايقاۋدا «حالىق تەاترى» اتاعىن جەڭىپ العانىن تاعى ءبىر ەسكە سالدى.
سالتاناتتى جيىن بارىسىندا قاينارلىق ءبىر توپ ونەرپازدارعا سىي-جورالعىلار ۇسىنىلىپ, مەرەيتولىق توسبەلگىمەن ماراپاتتالىپ, ونەر ارداگەرلەرىنە تەاترى ۇجىمى ازىرلەگەن ەستەلىك فوتو-البوم سىيعا بەرىلدى. مەرەيتويدىڭ ءسانىن كەلتىرگەن قوناقتار ءداستۇرلى ءانشى ەرلان رىسقالي, بەلگىلى ونەرپاز نۇريدەن قۇسمانوۆ, كۇيشى-سازگەر ساعىندىق ەرناپ, ءانشى انار قاليەۆالار ەل قوشەمەتىنە بولەندى.
جانات تۇگەلباەۆ,
قازاقستاننىڭ قۇرمەتتى ءجۋرناليسى
شىعىس قازاقستان وبلىسى, ابىرالى اۋىلى
