مادەنيەت جانە سپورت ءمينيسترى اقتوتى رايىمقۇلوۆا مۇنداي سپورت سايىسى ەلىمىزدە تۇڭعىش رەت ءوتىپ جاتقانىن ايتادى.
«بۇل چەمپيونات توكيوداعى 2020 جىلى وتەتىن پاراليميادا ويىندارىنا جولداما تاراتاتىن اقتىق سايىس بولماق. مۇنداي بىرىنشىلىك ەلىمىزدە العاش رەت ءوتىپ وتىر. وعان الەمنىڭ 76 ەلىنەن ۇمىتكەرلەر قاتىسادى. ءبىزدىڭ ەلدە مۇمكىندىگى شەكتەۋلى جانداردىڭ سپورتپەن اينالىسۋىنا بارىنشا جاعداي جاسالىپ جاتىر. نۇر-سۇلتان قالاسىندا ەلباسى نۇرسۇلتان نازارباەۆتىڭ قاتىسۋىمەن تۇڭعىش پارااليمپيادالىق جاتتىعۋ ورتالىعى اشىلعان بولاتىن. جازعى جانە قىسقى پاراليمپيادالىق سپورت تۇرلەرىنەن سپورتتىق رەزەرۆتەگى ۇلتتىق قۇرامانىڭ مۇشەلەرى سىندارلى سايىستارعا وسى ورتالىقتا دايىندالىپ ءجۇر. جالپى ەلىمىزدە پارا پاۋەرليفتينگپەن 600-دەن استام ادام اينالىسادى», - دەدى مينيستر چەمپيوناتتىڭ اشىلۋ سالتاناتىنا وراي وتكەن ءباسپاسوز-كونفەرەنتسياسىندا.
قازاقستان قۇراماسى ءاربىر سالماق ساناتىندا باق سىنايدى. ۇلتتىق قۇراما ساپىندا 2017 جىلعى ريو-دە-جانەيروداعى پاراليمپيادا ويىندارىنىڭ كۇمىس جۇلدەگەرى راۋشان قويشىباەۆا, سونداي-اق يندونەزياداعى 2018 ازيالىق ويىندارىنىڭ جەڭىمپازدارى داۆيد دەگتيارەۆ, راحمەدجان حاماەۆ, الينا سولودۋحينا جانە گۇلبان ابدىكالىقوۆا ونەر كورسەتەدى.
