سۇحبات • 12 شىلدە، 2019

مەيىرعات امانگەلدين: كينوداعى ۇستازىم – قاسىم سۇلتان

1442 رەت كورسەتىلدى

مەيىرعات امانگەلدين ەسىمىمەن كوپشىلىك قاۋىم رەجيسسەر رۇستەم ءابدىراشتىڭ «قازاق حاندىعى: «الماس قىلىش» جانە «التىن تاق» فيلمدەرىندەگى قاسىم سۇلتان بەينەسى ارقىلى جاقسى تانىس. اتالعان تۋىندىدا جارق ەتە قالعان جاس اكتەردىڭ جاسىنداي وتتى جانارى كوپشىلىك ەسىندە جاتتالعان. كۇنى كەشە حV حالىقارالىق «ەۋرازيا» كينوفەستيۆالىنىڭ شىمىلدىعىن تۇرگەن ايتۋلى كينوكارتينانى تاماشالاپ وتىرىپ، مەيىرعات كەيىپتەگەن قاسىم سۇلتان بەينەسىنە باسقا قىرىنان جانە ءبىر مارتە ۇڭىلگەندەي بولدىق. كورسەتىلىمنەن كەيىنگى اكتەرمەن وربىگەن اڭگىمەمىزدىڭ نەگىزگى اۋانى دا وسى ەكران مەن ساحناداعى رولدەرى اينالاسىندا بولدى.

– اكتەردىڭ باعىن اشاتىن تابي­عاتىنا ءدوپ تۇسكەن ءساتتى ءرول ەكەنى انىق. وسى تۇر­عىدان كەلگەندە، قا­سىم سۇلتان بەينەسى سىزگە نە بەر­دى؟ كەيىپ­­كەرىڭىزبەن قان­داي ۇقساس­تىق­تارىڭىز بار؟ 

– «جاقسى اكتەر كەز كەلگەن رولدە جارقىراي كورىنۋى كەرەك. شەبەرلىك دەگەن – سول» دەپ جاتادى. كەلىسۋگە دە، كە­لىسپەۋگە دە بولادى. ءبى­راق، قا­­لاي دەسەك تە، اكتەردىڭ با­عى – وڭ جام­باسىنا كەلەتىن ءساتتى رولىمەن دەر شاعىندا جو­لىعۋى. ول راس. مەن ءۇشىن قاسىم سۇلتان بەينەسى سونداي ءرول بولدى عوي دەپ ويلايمىن. وقۋ بىتىرە سالىپ، تەاتر ساحناسىندا ءتۇرلى كەيىپكەرلەردى ويناپ جۇرگەنىممەن، كينوعا ءبىراز يمەنە قادام باستىم. باعىما وراي، ۇلكەن ەكرانداعى دەبيۋتىم – قاسىم سۇلتان بولدى. العاش رولگە بەكىتىلگەنىمدى ەستىگەندە، قاتتى تولقىدىم. قورقىنىشتىڭ بولعانىن دا جا­سىرمايمىن. ويتكەنى بۇعان دەيىن تەاتر ساحناسىندا قوجا، باقىت، جاسبولات سىندى كىلەڭ بالالاردىڭ، مەكتەپ وقۋشىلارىنىڭ بەينەسىن كەيىپتەپ جۇرگەننەن كەيىن دە شىعار، قاسىم سۇلتانداي تاريحي كەسەك تۇلعاعا كەلگەندە ازداپ جۇرەكسىنگەنىم راس. بىراق، كينو بالا كۇننەن بەرگى ارمانىم بولعان سوڭ، كوپ ويلانبادىم، وزىمە ءوزىم «نارتاۋەكەل!» دەدىم. «كوز قور­قاق، قول باتىر» دەگەن راس ەكەن. ءبىر اي وتكەننەن كەيىن-اق، قاسىم رولىنە ەنە باستاعانداي بولدىم. ءتىپتى بەس ايدان كەيىن ءتۇسىرىلىم الاڭىنان ۇيگە ورالعانىمدا قالا تىرشىلىگىنە ۇيرەنە الماي ءبىراز توسىرقاپ ءجۇردىم. ويتكەنى كەڭ دالادا اتقا ءمىنىپ، اۋىلدىڭ تابيعاتىنا ابدەن ەت ۇيرەنىپ قالىپتى. سونى ساعىندىم (جىميدى). نەگىزى قاسىم سۇلتان بەي­نەسى مەن ءوز تابيعاتىمدا اي­تارلىقتاي ۇقساستىق بار دەپ ايتا المايمىن. كەرىسىنشە، قاسىم حان ماعان ومىردە سا­بىرلى، جيناقى بولۋدى ۇيرەتتى. ءتۇسىرىلىم بارىسىندا كەيىپكەرىمنىڭ تابيعاتىنا بايلانىستى بارىنشا سال­ماقتىلاۋ، ۇستامدىراق بولۋعا تىرىستىم. ال مەنىڭ بولمىسىمدا بالالىق قالىپ باسىمداۋ. ارينە، اكتەر رەتىندە ءوزىڭنىڭ جانىڭنان دا ءتۇرلى ىزدەنىستەرىڭدى قوساسىڭ عوي، بىراق قالاي دەسە دە قاسىم بەينەسى كينو الەمىندەگى ۇس­تازىم بولدى.

– رەجيسسەر رۇستەم ءابدى­راش پەن اكتەر مەيىر­عات­تىڭ اراسىنداعى شى­عار­ماشىلىق تاندەمدى قالاي باعا­لايسىز؟ 

– رۇستەم اعا ەرەكشە ادام عوي. ءوز باسىم ول كىسىنى ادام رەتىندە دە، كاسىبي مامان رە­تىندە دە قاتتى سىيلايمىن. ءتۇسىرىلىم جۇمىستارى ءال­دە­قا­شان اياقتالىپ كەتكە­نىمەن، شىعارماشىلىق بايلانىسىمىز ۇزىلگەن ەمەس. ۇنەمى جاس­تاردى جانىنا جاقىن تارتىپ، اقىل-كەڭەسىن ايتۋدان جالىقپايدى. رۇستەم اعامەن جۇمىس ىستەۋدىڭ ءوزى ۇلكەن عانيبەت. ول كىسىنىڭ ءبىر ەرەك­شەلىگى – شەجىرەنى، تاريحتى وتە جاقسى بىلەدى. كاسىبي سۋرەتشىلىگى دە ءوز الدىنا ءبىر توبە. ءار كادردان سۇلۋلىق ىزدەپ تۇرادى. ءبىزدى دە سول تالعامعا تاربيەلەدى. ەڭ باستىسى، اك­تەردىڭ ىزدەنىسىن شەكتەگەن ەمەس. كامەرا الدىندا بارىنشا ەركىن اشىلۋىڭا مۇمكىندىك بەرەدى. بەلگىلى ءبىر شەكاراعا سالىپ، ءوزىنىڭ رەجيسسەرلىك ءۇس­تەمدىگىن جۇرگىزۋ ول كىسىنىڭ تابيعاتىنا جات. سوندىقتان بولسا كەرەك، فيلمدە يم­پروۆيزاتسياعا كوپ باردىق. كامە­رامەن بىردەن «دوستاسىپ» كەتتىك. ءرۇس­تەم اعانىڭ تاعى ءبىر ەرەكشەلىگى – بارلىعىنا جانى اشىپ، قامقور بولىپ جۇرەدى. ءرول سۇراپ كەلگەن ادامنىڭ بەتىن قايتارعان ەمەس. كىشكەنتاي ەپيزودقا ەنگىزسە دە ايتەۋىر الدىنا كەلگەن ادامدى ريزا قىلماي قايتارمايدى. كوڭىلگە كوپ قارايدى. اسىرەسە، ءتۇسىرىلىم الاڭىنداعى مىنا ءبىر وقيعا ەسىمنەن كەتپەيدى. تۇلكىباستا وتكەن ءتۇسىرىلىمنىڭ بىرىندە 15-16 جاس­تاعى بالا كەلىپ: «اعا، مەنىڭ دە كينودا ويناعىم كەلەدى. كوپشىلىك ساحنادا بولسا دا ءرول تاۋىپ بەرىڭىزشى» دەپ قيىلدى. جانارى وت بولىپ جانىپ، كوڭىلى ونەر دەپ ورەكپىپ تۇرعان بوزبالانىڭ مەسەلىن قايتارعىسى كەل­مەي بارلىعىمىزدىڭ كوزى­مىزشە: «بۇگىن وسىندا قال، ەرتەڭ ءبىر­دەڭە قىلامىز»، – دەدى. ءبى­راق، كەيىن ول وقيعانى مۇلدەم ۇمىتىپ كەتىپپىن. پرەمەرا كۇنى الگى بالانى فيلمنەن نەگىزگى پلاندا كورىپ، رۇستەم اعاعا ىشتەي ريزا بولدىم. وسى جاعىنان كەلگەندە ول كىسى وتە قازاقي اقىننىڭ وتباسىندا تاربيەلەنگەنى سوزىنەن دە، ارەكەتىنەن دە كورىنىپ تۇرادى. بۇگىندە كوپ ادامنىڭ بويىندا كەزدەسە بەرمەيتىن قازاقى ءبىر دارحاندىق، كەڭدىك بار. سول مىنەزىن ەرەكشە قۇرمەت تۇتامىن. 

– «قازاق حاندىعى»، «ال­تىن تاق» ءفيلمى­مەن تۋرا ءبىر كۇنى تۇ­ساۋى كەسىل­گەن «كا­نيكۋلى off-line» كار­­تينا­سىنداعى بەينەڭىز قا­سىم سۇل­تان­عا مۇلدەم قا­را­ما-قارسى... شى­نى­ڭىز­­دى ايتى­ڭىزشى، ەكران­داعى ەكى ءتۇرلى مەيىر­عاتتىڭ قاي­­سىسى ءوزى­ڭىزگە كوبى­رەك ۇنادى؟ 

– قيىنداۋ سۇراق ەكەن (كۇلدى). اكتەر ءۇشىن ءار جاساعان جۇمىسى ىس­تىق قوي. ارينە، جاۋاپكەرشىلىك تۇرعىسىنان كەلگەندە، قاسىم سۇل­تان­نىڭ سالماعى اۋىر بولدى. ءىز­دەنىسكە دە ءجىتى ءمان بەردىم. ال «كانيكۋلى off-line» كومەدياسىندا جاعداي مۇلدەم باسقا. مۇندا مەن ءوزىمدى وينادىم. ءسوزسىز، كومەديانىڭ دا قيىندىعى جەتەرلىك. بىراق بۇل فيلمدەگى اتموسفەرا بالالىق شاققا قايتا ساياحات شەككىزگەندەي ساعىنىشقا، قىزىقتى ەستەلىكتەرگە تولى بولدى. ونىڭ ءۇستى­نە، تەاترداعى ۇستازىم، رەجيسسەر نۇر­قانات جاقىپباي: «اك­تەر ارقاشان ءوزىنىڭ بالالىعىن جو­عالت­پاۋى كەرەك»، دەپ ۇنەمى ايتىپ وتىرادى. وسى ءسوز جادىمىزعا ءسىڭىپ قالعاننان بولار، جاستار تەاترىنىڭ بارلىق اكتەرى بالالىق قالپىن جو­عالت­پاۋعا ۇمتىلادى. قاي رولگە دە جاس­تىق جالىنمەن كەلۋگە جانىن سالادى. ويتكەنى ءبىزدىڭ تەاترداعى نەگىزگى قاعيدا – سول. سوندىقتان بولسا كەرەك مەن «كانيكۋلى off-line»-دى ءتىپتى دە جاتىرقاعان جوقپىن. فيلم­نىڭ ءتۇسىرىلىمى تەك بالالار مەن كورەرمەندەرگە عانا ەمەس، وزىمە دە قاتتى قىزىق بولدى. سەبەبى ستسەناري شىنايىلىعىمەن ۇتتى دەپ ويلايمىن. ومىردە قانداي بولساق، فيلمدە دە سول تابيعاتىمىزدى وزگەرتپەي بەرۋگە تىرىستىق. باستىسى – ەموتسيانى قولدان جاسامادىق، ءبارى بولمىسىمىزداي شىنايى بولدى. ون سەگىز كۇن بويى بالالارمەن ءبىر ۇيدە تۇ­رىپ، بىرگە تاماقتانىپ، ويناپ، از عانا ۋاقىتتا ءبىر-بىرىمىزگە باۋىر باسىپ كەتتىك. ارينە، باستاپقىدا قالانىڭ بالالارى اۋىلعا ۇيرەنە الماي توسىرقاپ ءجۇردى. كەيىن كەڭ دالاعا بوي ۇيرەتىپ، ءتىپتى قايتقىلارى كەلمەي قالدى. بۇل – اكتەرلەرگە ەركىندىك بەرگەن رەجيسسەردىڭ تاپقىرلىعى. سونىڭ ارقاسىندا جەڭىل، ويناقى، كوڭىلدى فيلم ءومىر­گە كەلدى. تۋىندىنىڭ كينو­پروكاتتاعى جالپى تابىسىنا قاراپ، «جاساعان جۇمىسىمىز كوپشىلىك كورەرمەننىڭ كو­ڭىلىنەن شىقتى عوي» دەپ وي تۇيدىك. قازىر كومە­ديانىڭ ەكىنشى ءبولىمىن ءتۇسىرۋ جوس­پار­لانىپ جاتىر. ءساتىن سالسا، جاقىن كۇندەرى وتاندىق كينوتەاترلاردان كورىپ قالۋ­لارىڭىز مۇمكىن.

– سوزىڭىزدە ەرەكشە توق­تالىپ وتكەندەي، ونەر­دەگى العاشقى قادام­دا­رى­ڭىزدىڭ كۋاگەرى – جاس­تار تەاترى. ونەر ورداسىنىڭ قا­زىر­گى جاع­دايى، دەڭگەيىن قالاي باعالاي­سىز؟ تەاتر ءسىز­گە نە بەردى؟

– جاستار تەاترى ەڭ اۋەلى مەنى اكتەر بولۋ، ۇلكەن ساحنادا ونەر كورسەتۋ دەيتىن ارمانىممەن قاۋىشتىردى. سول ءۇشىن دە مەن وسىنداي عاجايىپ الەمنىڭ ەسىگىن ايقارا اشىپ بەرىپ، تالعامپاز تەاتر، ساحنا مادەنيەتىنە تاربيەلەگەن ۇستازىم، ونەردەگى اكەم، سۇيىك­تى اعايىمىز – نۇرقانات جا­قىپبايعا قارىزدارمىن. نۇر­قانات اعاي ۇزاق جىل تىڭ­عىلىقتى ىزدەنىپ، بىرنەشە بۋىن شاكىرتتەرىنە ءتالىم بە­رە ءجۇرىپ، بارلىعىن ءوزى ىرگە­سىن قالاعان ءبىر تەاتردىڭ شاڭىراعى استىنا ۇيىستىرا ءبىلدى. جاستار تەاترىندا قىزمەت ەتەتىن اكتەرلەردىڭ ارمانى دا، ماقسات-مۇددەسى دە ورتاق، ول – زاماناۋي جاڭا­شىل تەات­ر ونەرىن تۋدىرۋ. سوندىقتان بولسا كەرەك، ءبىز ءبىر-ءبىرىمىزدى ىممەن، كوزقاراسپەن-اق ءتۇسىنىپ، ۇعىساتىن دەڭگەيگە جەتتىك. وزگە تەاترلارداعى ارىپتەستەرىمىز: «سەندەردىڭ تەاتر­لارىڭ ءبارىبىر باسقا. ەرەك­شەلەنىپ جۇرە­سىڭدەر»، دەيدى. ول ەرەكشەلىك – تەات­ر اكتەرلەرىنىڭ بارلىعىنىڭ ءبىر ۇستازدان ءتالىم الىپ، ءالى كۇنگە دەيىن ءبىر اكەنىڭ بالاسىنداي تاربيەلەنىپ كەلە جاتقاندىعىندا بولسا كەرەك. وقۋ بىتىرگەنىمىزگە بىرنەشە جىل وتسە دە، ءبىز ءۇشىن نۇرقانات اعاي – ۇستاز، ال ءبىز ستۋدەنت سياقتىمىز. ۇنەمى سول كىسىنىڭ پىكىرىنە قۇلاق اسىپ، اقىلىن ازىق ەتىپ كەلەمىز. ءتىپتى اعاي كەزەكتى پرەمەرادان كەيىن ءرو­لىمىز جايلى ەشتەڭە دەمەي قالسا، ءوزىمىزدى ءبىرتۇرلى سەزىنىپ، ىشتەي قامشىلاي تۇسەمىز. ول كىسى ءبىزدى جانكەش­تىلىككە، تاۋەكەلشىلدىككە، ەڭ باستىسى الدىمىزعا ۇلكەن ارمان قويىپ، سول ارمانعا سەندىرىپ ءۇي­رەتتى. سونىڭ ارقاسىندا بولار، ءبۇ­گىندە جاستار تەاترىن ەلىمىزدەن بولەك، الىس-جاقىن شەتەلدىك ونەر ۇجىمدارى مەن كورەرمەندەر جاقسى بىلەدى، قۋانا قارسى الادى. بىرنەشە مەملەكەتكە بارىپ، فەستيۆالدەردەن جۇلدەلى ورالىپ ءجۇرمىز. مۇنىڭ بارلىعى ۇستازىمىزدىڭ ۇجىمدا قالىپتاستىرىپ، بويىمىزعا سىڭىرگەن اۋىزبىرشىلىك پەن باۋىرمالدىق سەزىم­دەرىنىڭ ارقاسى ەكەنى انىق.

– تەاتر مەن كينو اكتە­رىنىڭ قان­داي ايىرما­شى­لىعى بار؟ قوس سالادا قا­تار قىزمەت ەتكەن ءتاجىري­بەڭىز­دەن نە ءتۇيدىڭىز؟

– ادەتتە، تەاتر اكتەرلەرى كينو­دا جاساندى، «تەاترالنىي» وينايدى دەپ ءجيى سىن ايتىپ جاتادى. بۇل جەردە بارلىق ماسەلە ءارتىستىڭ شە­بەرلىگىنە كەلىپ تىرەلەدى دەپ ويلايمىن. ويتكەنى تەاتردىڭ دا، كينونىڭ دا ءوز ەرەكشەلىگى، ويناۋ تالابى بولادى. ماسەلەن، تەاتردا ءارتىس ارەكەتى كورەرمەننىڭ كوز الدىندا. مىندەت – الدىڭعى قاتاردان باستاپ، سوڭعى قاتار­دا وتىرعان كورەرمەنىڭە ءسو­زىڭدى دە، ءوزىڭدى دە جەتكىزۋ. سودان كەيىن ءار ويناعان سايىن ءرولىڭ دامىپ، تولىعىپ، جەتىلىپ وتىرادى. تەاتر اكتە­رىنە قاتەلەسۋگە بولمايدى. ويتكەنى ءار ارەكەتىڭدى قالت جىبەرمەي قاداعالاپ وتىرعان كورەرمەن بار. وسى تۇرعىدان كەلگەندە، تەاتر اكتەرىنە جۇك­تەلەر ەموتسيالىق، ەنەر­گيالىق سالماق اۋىرلاۋ. ال كينودا ءبارى باسقاشا. مۇندا بايىپپەن سويلەۋگە، قاراپايىم قالىپ­تى ۇستانۋعا مۇمكىندىك بەرىلەدى. ءساتسىز كادرلاردى قايتا تۇسىرۋگە بولادى. كي­نودا باستىسى كامەرامەن دوستاسىپ ۇيرەنۋ كەرەك. قالعانى تاجىريبەمەن، ەموتسيونالدىق كۇيمەن كەلە بەرەدى. ماسەلەن، «قازاق حاندىعى» ءفيلمىنىڭ العاشقى ءبولىمى تۇسىرىلگەن 5 اي ۋاقىتتىڭ ىشىندە مەن ءوزىمدى شىن ءمانىن­دە كادىمگىدەي سۇلتان سەزىنىپ، سول كەيىپتەن شىققىم كەلمەي، كەرەمەت ءبىر كۇي كەشتىم. سوڭىندا كەيىپكەرىمدى ازداپ قيماي دا قالدىم. ويتكەنى رەجيسسەردەن باستاپ، شىعارماشىلىق توپ تۇگەلىمەن ماعان سولاي قارادى. ءتىپتى ءتۇسىرىلىم جۇ­مىستارى وتكەن ەلدى مەكەن، اۋىلدارداعى ۇلكەن كى­سىلەر، اسىرەسە اپالار جا­عى ۇستىمە كىرەۋكەمدى كيىپ، قا­رۋ-جاراعىمدى اسىنىپ قاستارىنان وتكەنىمدە «قا­سىم سۇلتان كەلە جاتىر» دەپ ورىندارىنان تۇرىپ قۇرمەت كورسەتەتىن. بالالار دا «قاسىم اعا» اتاپ كەتتى. ءسويتىپ ءبىر ساتتە مەن ءوزىمنىڭ مەيىرعات ەكەنىمدى ۇمىتىپ، قاسىم سۇلتان بولىپ ءومىر ءسۇردىم. مىنە، كوردىڭىزدەر مە، كينو اكتەرىنە ءتۇسىرىلىم وتەتىن مەجەلى ۋاقىت ارالىعىندا وسى تەكتەس كۇيدى سەزىنۋى ما­ڭىزدى. ءوز وبرازىڭا لايىق­تى دەڭگەيدە سەنە الساڭ، ءرولىڭ دە شىنايى شىعادى. ال تەاتردا ولاي ەمەس. ساحناعا ءار شىققان سايىن كەيىپكەرىڭنىڭ كۇيىن قايتا-قايتا سەزىنىپ، كوڭىل ەلەگىنەن وتكىزۋگە تۋرا كەلەدى. بۇل، اسىرەسە تراگەديا جانرىنداعى قويىلىمداردا اۋىرلاۋ. بىراق، اكتەر ءۇشىن دە، كورەرمەن ءۇشىن دە تەاتر سونىسىمەن ىستىق دەپ ويلايمىن. جالپى، تەاتر مەن كينونىڭ ەرەكشەلىگىن امەريكالىق ايگىلى اكتەر ال پاچينودان ارتىق باعالاۋ مۇمكىن ەمەس. اكتەر ايتادى: «...تەاتردا دا، كينودا دا ويناۋ – ارقان جىپتە جۇرگەندەي. ءجىپ تەاتر­دا جوعارى ىلىنسە، كينودا جەرگە قويىلادى. تەاتردا قۇ­لاساڭ – وڭباي قۇلايسىڭ». تۋرا ايتىلعان. ەڭ باستىسى، جانرلار ەرەكشەلىگىن سەزىنە ءبىلۋ قاجەت. ۇنەمى ىزدەنىپ، ءوز-ءوزىن دامىتىپ، جەتىلدىرىپ جۇرەتىن اكتەرگە مۇنداي قاۋىپ تونبەيدى. جاقسى اكتەرگە شە­بەرلىكتەن بۇرىن، ەڭ اۋەلى تەرەڭ ءبىلىم كەرەك.

– ىشتەي جاقسى كو­رىپ، ۇنەمى ساعىنىپ، وينا­عىڭىز كەلىپ جۇرەتىن كەيىپ­كەر­لەرىڭىز بار ما؟ 

– ارينە، ونداي رولدەر تەاتردا وتە كوپ. بەردىبەك سوقپاقباەۆتىڭ «مەنىڭ اتىم قوجا» شىعارماسى بويىنشا رەجيسسەر نۇرقانات جاقىپباي قويعان «كوزىمە ءبىر كورىنسەڭ، بالا عاشىق...» سپەكتاكلىندەگى – قو­جا، ءسا­كەن ءجۇنىسوۆتىڭ «تىراۋ-تى­راۋ، تىر­نالارىنداعى» – باقىت، ع.ءمۇسى­رەپوۆتىڭ «قىز جىبەگىندەگى» – تولە­گەن، قانات ءجۇنىسوۆتىڭ «العاش­قى ماحابباتىنداعى» – جاس­بولات بەينە­لەرى اسىرەسە جا­نىما جاقىن. بالالارعا ار­نالعان ەرتەگىلەردە ويناعان دا ۇنايدى. ويتكەنى ونداي قويىلىمداردا تازالىق بار. كورەرمەندەرىڭ دە ءدال سونداي تاپ-تازا. جالپى، با­لالاردىڭ قۋانىشىن، ەموتسياسىن سەزىنۋ ەرەكشە قىزىق قوي. سوندىقتان تەاترداعى رولدەرىمنىڭ ەشقايسىسىن ءبىرىن ەكىنشىسىنەن ءبولىپ-جارىپ قاراي المايمىن. بارلىعى ءوز الدىنا قىزىق، قىمبات. ايتسە دە بولاشاقتا ويناسام، شىعارماشىلىق ءومىربايانىمدى تولىقتىرسام دەگەن كەيىپكەرلەر دە جوق ەمەس. ول، اسىرەسە، كينو سالاسىنا قاتىستى. الدا جاق­سى، ساپالى ستسەناريلەر كەلىپ، ۇسىنىس ءتۇسىپ جاتسا، مەلو­دراما جانرىندا جانە سپورتقا، ونىڭ ىشىندە كۇرەسكە قاتىستى فيلم، سەريالدارعا تۇسۋگە قۋانا كەلىسكەن بولار ەدىم. بۇگىندە مەنى سپورت تۋرالى كارتينالار قاتتى قىزىقتىرىپ ءجۇر.

– ال بولاشاقتا قانداي رەجيسسەرلەرمەن بىرلەسە جۇمىس ىستەگىڭىز كەلەدى؟ 

– اكتەر ءۇشىن ءار رەجيسسەر وزىنشە ءبىر تاجىريبە مەكتەبى عوي. اسىرەسە، رەسەيلىك رەجيسسەرلەردىڭ شەبەرحاناسىن كورىپ، تانىسقىم كەلەدى. وتاندىق رەجيسسەرلەردەن اقان ساتاەۆپەن جۇمىس ىستەۋ مەن ءۇشىن وتە قىزىق. 

– اكتەر مەيىرعات امان­گەلدينگە نە تىلەيسىز؟ 

– وزىمە ايتار تىلەك تە، تالاپ تا وتە كوپ (كۇلدى). اسىرەسە، «ەرىنبە، كوپ وقى» دەگىم كەلەدى. ويتكەنى مەنىڭ ەڭ وسال تۇسىم – جالقاۋلىعىم، بارعا قاناعات جاساپ قالاتىندىعىم. مۇنى تەاتردا ۇستازىمىز دا ۇنەمى ايتىپ، قامشىلاپ وتىرادى. «اكتەر ىزدەنىسىن توقتاتقان كۇنى ولەدى» دەيدى رەجيسسەر. سوندىقتان دا ادام وزىنەن جاقسى اكتەر جاسا­عىسى كەلسە، ەڭ اۋەلى كوپ وقىپ، ىزدەنۋى كەرەك. مەنىڭ ءبىر جامان ادەتىم – قىزىعى كەتىپ قالسا، كەز كەلگەن ءىستى سوڭىنا جەتكىزبەي، تاستاپ جۇرە بەرەمىن. مەنى ۇنەمى قىزىقتىرىپ، تاڭعال­دىرىپ وتىرۋ قاجەت. وسى ادەتىمدى جەڭگىم كەلەدى. قالعانىن كاسىبي ءھام ومىرلىك تاجىريبە ءوزى-اق قالىپ­تاستىرادى دەپ ويلايمىن. 

– اڭگىمەڭىزگە راحمەت.

اڭگىمەلەسكەن 
نازەركە جۇماباي،
«Egemen Qazaqstan»
اينا الپىسباي، 
ل.ن.گۋميلەۆ اتىنداعى ەۇۋ ستۋدەنتى
سوڭعى جاڭالىقتار

الماتىدا ەپيداحۋال كۇردەلەنىپ بارادى

كوروناۆيرۋس • بۇگىن، 11:00

«سارى» ايماقتا تۇركىستان وبلىسى تۇر

كوروناۆيرۋس • بۇگىن، 09:10

كوروناۆيرۋس قايتا كۇشەيدى

كوروناۆيرۋس • بۇگىن، 08:54

وڭتايلىسى – ونلاين وقۋ

ايماقتار • بۇگىن، 08:53

ساپا ارتپايىنشا، سۋبسيديا جوق

ايماقتار • بۇگىن، 08:45

كوروناۆيرۋس قايتا ءورشىدى

الەم • بۇگىن، 08:42

ۆيرۋس جۇقتىرۋ ازايماي تۇر

كوروناۆيرۋس • بۇگىن، 08:30

اسىعىس شەشىم

قازاقستان • بۇگىن، 08:15

كومەك كورسەتىلەدى

قوعام • بۇگىن، 08:10

قور ستراتەگياسى ازىرلەنەدى

قازاقستان • بۇگىن، 08:00

ۇقساس جاڭالىقتار