بۇگىنگى تاڭدا ءتۇرلى ەتنوس وكىلدەرى مەكەن ەتەتىن جامبىل وڭىرىندە «جامبىل وبلىسى ەتنوستارىنىڭ ءداستۇرى مەن مادەنيەتى» ەنتسيكلوپەدياسىن باسىپ شىعارۋ جانە شىعارىلاتىن ەنتسيكلوپەديا نەگىزىندە ينتەراكتيۆتى كارتا جاساۋ» جوباسى قولعا الىندى. جوبانىڭ نەگىزگى ماقساتى – وڭىردەگى ەتنوسارالىق كەلىسىمنىڭ وڭ الەۋەتىن زەرتتەۋ جانە ناسيحاتتاۋ.
اتالعان جوبا اياسىندا جامبىل وبلىسى قازاقستان حالقى اسسامبلەياسى مەن وبلىس اكىمى اپپاراتىنىڭ «قوعامدىق كەلىسىم» مەكەمەسىنىڭ باستاماسىمەن وبلىستىڭ قورداي جانە شۋ اۋداندارىندا «زاماناۋي مەديا مادەنيەت كەڭىستىگىندەگى ەتنوستىق يميدج» تاقىرىبىندا ءپىكىرتالاس الاڭدارى ۇيىمداستىرىلدى. ءىس-شارانىڭ ماقساتى – ءتۇرلى ەتنوستار ءداستۇرلەرىنىڭ ەرەكشەلىكتەرىن جانە ازاماتتىق قوعامنىڭ نەگىزگى ينستيتۋتتارىنىڭ, اسىرەسە قازاقستان حالقى اسسامبلەياسىنىڭ بىرىكتىرۋشى ميسسياسىنىڭ ماڭىزدىلىعىن تالقىلاۋ, بۇقارالىق اقپارات قۇرالدارىندا ەتنوستىق ءيميدجدى قالىپتاستىرۋ جانە وسى ماسەلەنى زەرتتەۋدەگى اسپەكتىلەردى انىقتاۋدى كوزدەيدى. ءوز سوزىندە پىكىرتالاس الاڭىنىڭ مودەراتورى, جامبىل وبلىسى اكىمى اپپاراتىنىڭ «قوعامدىق كەلىسىم» مەكەمەسى عىلىمي-ساراپتامالىق قولداۋ ءبولىمىنىڭ باس ساراپشىسى البينا تاپاەۆا مەديا مادەنيەتتىڭ قۇرالدارىنىڭ اسەرى, مەديا مادەنيەت مادەني جانە تاريحي دامۋ ۇدەرىسىندە ادامزات ازىرلەگەن اقپاراتتىق-كوممۋنيكاتسيالىق قۇرالدار جۇيەسى رەتىندە قوعامدىق سانانى قالىپتاستىرۋ مەن تۇلعانى الەۋمەتتەندىرۋگە ىقپال ەتۋى جايىندا اڭگىمە وربىتسە, تاريح عىلىمدارىنىڭ كانديداتى ن.كاحاروۆ ۇلتتىق سالت-ءداستۇرلەر, ءتىل مەن مۋزىكا, ادەبيەت, ۇلتتىق جورالعىلار جايىندا ءوز ويىمەن ءبولىستى. سونىمەن قاتار شۋ اۋدانىنداعى ازەربايجان ەتنوسىنىڭ وكىلى زەمفيرا گۋليەۆا قازىرگى تاڭدا ەلىمىزدەگى ەتنوستاردىڭ ۇلتتىق كودىن ساقتاۋدا اتقارىلىپ وتىرعان جۇمىستار ءۇشىن العىسىن ءبىلدىردى.
ال, تۇرىك ەتنوسىنىڭ وكىلى بينالي تاگيروۆ «جاھاندانۋ بۇگىنگى تاڭدا جالپى دۇنيەجۇزىلىك پروتسەسس بولىپ تابىلادى. جاھاندانۋ كەزەڭىندە قازاقستان ءوزىنىڭ ۇلتتىق جəنە مەملەكەتتىك بىرەگەيلىلىگىن ساقتاپ قالۋ مəسەلەسىن شەشۋدە ۇتىمدى قادامدار جاساۋدا دەپ ەسەپتەيمىن», دەپ ءوز پىكىرىن بىلدىرسە, دۇنگەن ەتنوسىنىڭ وكىلدەرى ايشا يبىدو, ساليما ۆانسينۆين, يديريس يۋنۋسوۆ, ماتليۋبا مويوروۆا كوپشىلىككە ءوز ەتنوستارىندا كەزدەسەتىن ەرەكشەلىكتەر تۋرالى فوتوسۋرەتتەر مەن بەينەروليكتەر ۇسىندى. اتالعان شاراعا ەتنومادەني بىرلەستىكتەردىڭ وكىلدەرى, انالار كەڭەسىنىڭ مۇشەلەرى, عىلىمي-ساراپتامالىق توپتىڭ مۇشەلەرى جانە جاستار قاتىسىپ, وڭىردەگى مادەنيەتارالىق ءوزارا ءىس-قيمىل مەن ەتنوسارالىق كەلىسىمنىڭ وڭ الەۋەتىن ناسيحاتتاۋ بويىنشا نەگىزگى تۇسىنىكتەردى تالدادى.
