سالالىق الالاۋ بولمايدى
يندۋستريا جانە ينفراقۇرىلىمدىق دامۋ ۆيتسە-ءمينيسترىنىڭ ايتۋىنشا, بيىل جىل سوڭىنا دەيىن 2020-2025 جىلدارعا ارنالعان يندۋستريالاندىرۋ باعدارلاماسى بەكىتىلەدى.
– ەلباسىنىڭ تاپسىرماسىنىڭ اياسىندا جىل سوڭىنا دەيىن 2020-2025 جىلدارعا ارنالعان يندۋستريالاندىرۋ باعدارلاماسىن بەكىتەمىز. يندۋستريالىق-يننوۆاتسيالىق دامۋ تۇجىرىمداماسىنا ەنگىزىلگەن بۇل باعدارلاما وتكەن جىلدىڭ جەلتوقسان ايىندا ۇكىمەتتىڭ قاۋلىسىمەن بەكىتىلدى. باعدارلامانىڭ ماقساتى ءوڭدەۋشى ونەركاسىپتىڭ حالىقارالىق باسەكەگە قابىلەتتىلىگىن ارتتىرۋ. جالپى, يندۋستريالىق-يننوۆاتسيالىق ساياسات جالعاسا بەرەدى. ەكسپورتقا باعدارلانعان كاسىپورىندار مەن ەڭبەك ونىمدىلىگىن ارتتىرۋعا باسا نازار اۋدارىلادى, – دەدى مينيستر ورىنباسارى.
ءوز سوزىندە ۆيتسە-مينيستر تاياۋدا بەكىتىلەتىن 2020-2025 جىلدارعا ارنالعان يندۋستريالاندىرۋ باعدارلاماسىنىڭ نەگىزگى ەرەكشەلىكتەرىن اتادى. بىرىنشىدەن, وڭدەۋشى ونەركاسىپتىڭ بارلىق سالالارىنداعى ءتيىمدى جۇمىس ىستەپ جاتقان كومپانيالاردى قولداۋ ءۇشىن باعدارلاماداعى سالالىق باسىمدىقتار الىپ تاستالادى. ەكىنشىدەن, بيۋدجەت قاراجاتىنا باقىلاۋدى كۇشەيتۋ جانە ءتيىمدى پايدالانۋىن قاداعالاۋ ءۇشىن كاسىپورىنداردى قولداۋدا ناقتى كورسەتكىشتەرگە كوڭىل اۋدارىلماق. ۇشىنشىدەن, كاسىپورىنداردى جاڭعىرتۋ مەن تەحنولوگيالىق دامىتۋعا باعىتتالعان قولدانىستاعى قۇرالدار جەتىلدىرىلەدى. امانياز ەرجانوۆتىڭ ايتۋىنشا, قازىرگى تاڭدا باعدارلاما جوباسى ازىرلەنىپ جاتىر.
جەڭىل اۆتوكولىك ءوندىرىسى 41,5 %-عا ۇلعايدى
ۆيتسە-ءمينيستردىڭ اتاپ وتكەنىندەي, اۆتوكولىك قۇراستىرۋ سالاسى ەلدەگى ماشينا قۇراستىرۋ سالاسىنىڭ نەگىزگى باعىتى بولىپ تابىلادى. بۇل سالانى دامىتۋ ارقىلى ەكونوميكانىڭ وزگە دە سالالارى مۋلتيپليكاتيۆتى تۇردە داميتىنى انىق. سونىمەن قاتار سالانىڭ قارقىن الۋى جاڭا جۇمىس ورىندارىنىڭ اشىلۋىنا دا تىكەلەي ىقپال ەتپەك. قازىردىڭ وزىندە بۇل سالادا جۇمىس ىستەيتىندەر سانى 2 مىڭنىڭ اينالاسىندا بولسا, ونەركاسىپتىڭ ارالاس سالالارىنداعى جۇمىس ورىندارىنىڭ سانى 7 مىڭ ادامعا جەتەدى.
– قازىر قازاقستاندا اۆتوكولىكتىڭ بارلىق تۇرلەرىن جيناۋ بويىنشا ءوندىرىس قۇرىلدى. 2018 جىلدىڭ قورىتىندىسى بويىنشا ماشينا جاساۋ سالاسىنداعى اۆتوموبيل جاساۋ ۇلەسى 19,2 پايىزدى قۇرادى. ال 2019 جىلدىڭ قاڭتار-مامىر ايلارىندا ماشينا جاساۋ سالاسىنداعى اۆتوكولىك شىعارۋ ۇلەسى 25,4 پايىزعا دەيىن ءوستى. 2018 جىلى جالپى قۇنى 205 ملرد تەڭگە بولاتىن 32 298 كولىك قۇراستىرىلدى. ماشينا جاساۋ سالاسىنىڭ ناقتى كولەم يندەكسىنىڭ كولەمى 2018 جىلى 114 پايىزعا جەتتى. وسى جىلدىڭ 5 ايىنىڭ قورىتىندىسى بويىنشا جالپى قۇنى 114 ملرد تەڭگەنىڭ
16 921 كولىگى شىعارىلدى. جەڭىل اۆتوكولىك ءوندىرىسى 41,5 پايىزعا, اۆتوبۋس ءوندىرىسى 3,2 ەسەگە, جۇك اۆتوكولىكتەرى ءوندىرىسى 35 پايىزعا, تىركەمەلەر مەن جارتىلاي تىركەمەلەر ءوندىرىسى 35 پايىزعا ءوستى, – دەدى ءمينيستردىڭ ورىنباسارى.
ەلەكتروموبيل ينفراقۇرىلىمى سالىنۋدا
ءباسپاسوز ءماسليحاتىندا امانياز ەرجانوۆ:
– قازىر بارلىق شەتەلدىك كومپانيالار ەلەكتروكولىك وندىرىسىنە كوڭىل اۋدارىپ جاتىر. بۇل الەمدىك ترەند. ءبىز ودان قالىپ قويماۋىمىز كەرەك. ەلەكتروموبيل قۇراستىرۋمەن اينالىساتىن بىرنەشە قازاقستاندىق كومپانيانى اتاعان ەدىم. ازىرگە قازاقستاندىق وندىرۋشىلەر شىعاراتىن ەلەكتروكولىكتەردىڭ قۇنى Tesla كولىكتەرىنەن 1,5 ەسە قىمبات بولىپ تۇر, – دەەدى. ۆيتسە-مينيستر بۇگىندە الەمدە وسى سالا بويىنشا Tesla-نىڭ كوشباسشى ەكەنىن ايتا كەلىپ, ءبىزدىڭ اۆتوكولىك وندىرۋشىلەرىمىزدىڭ اتالعان كولىكتى زەرتتەپ, ءوزىمىزدىڭ ونىمدەردىڭ قۇنىن تومەندەتۋ تاسىلدەرىن ويلاستىرىپ جاتقانىن تىلگە تيەك ەتتى.
– Tesla كولىكتەرىنىڭ باعاسى 28 مىڭ اقش دوللارى شاماسىندا. وتاندىق كومپانيالار ەلەكتروكولىكتەرگە قولدانىلاتىن باتارەيالاردى ءوز ەلىمىزدە شىعارۋ ءۇشىن جۇمىس ىستەپ جاتىر. وتاندىق عىلىمي ينستيتۋتتار دا اتالعان باتارەيانى قازاقستاندا جاساۋ جاعىن ويلاستىرۋدا. باتارەيانى شىعارۋعا قاجەتتى شيكىزات بىزدە بار,– دەدى امانياز ەرجانوۆ.
مينيستر ورىنباسارىنىڭ ايتۋىنشا, سۇرانىس بولعان جاعدايدا وتاندىق كومپانيالار ەلەكتروكولىك شىعارۋعا دايىن كورىنەدى. بۇعان دەيىن بىرنەشە اۆتوكولىك قۇراستىرىلىپ, ساتىلىمعا شىعارىلىپتى. قازىر نۇر-سۇلتان, الماتى قالالارىندا جانە نۇر-سۇلتان-ششۋچە تاس جولىندا ەلەكتروكولىك ينفراقۇرىلىمى جاسالىپ جاتىر. بۇگىندە ەلىمىزدە شامامەن 200 ەلەكتروكولىك بار.
باۋىرجان مۇقان,
«Egemen Qazaqstan»
