العاشقىلاردىڭ ءبىرى بولىپ پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد نۇر-سۇلتان قالاسىنداعى جاڭادان اشىلعان №4 ءورت ءسوندىرۋ بولىمىندە جانە ەلىمىزدىڭ ۇلتتىق ۇلانىنىڭ جەدەل ماقساتتاعى بريگاداسى – 5573 اسكەري بولىمىندە بولدى.
سەناتور كەزدەسۋ بارىسىندا ءورت ءسوندىرۋ سالاسىنىڭ جاڭا تەحنيكاسىمەن جانە ءورت ءسوندىرۋ ءبولىمىنىڭ جابدىقتالۋىمەن تانىسىپ, ءورت سوندىرۋشىلەر جانە قۇتقارۋشىلارمەن پىكىر الماستى.
ءماجىلىس دەپۋتاتتارى ۆاسيلي ولەينيك پەن گەننادي شيپوۆسكيح شىعىس قازاقستان وبلىسىنداعى ساپارى بارىسىندا وسكەمەندەگى «سيلۋمين-ۆوستوك» جشس كاسىپورنىنىڭ قىزمەتكەرلەرىمەن كەزدەستى.
كەزدەسۋدە دەپۋتاتتار مەملەكەت باسشىسى قاسىم-جومارت توقاەۆتىڭ ناقتى الەۋمەتتىك تاپسىرمالارى تۋرالى ايتتى.
ءماجىلىس دەپۋتاتتارى قوجاحان جاباعيەۆ پەن ءابدىماناپ بەكتۇرعانوۆ جامبىل وبلىسىنا ساپارى بارىسىندا تاۋلىگىنە 80 توننا ءسۇت ونىمدەرىن وندىرەتىن زاۋىتتىڭ ەڭبەك ۇجىمىمەن كەزدەسىپ, كاسىپورىن جۇمىسىمەن تانىستى.
ەڭبەك ۇجىمىمەن كەزدەسۋدە دەپۋتاتتار ەلىمىزدەگى الەۋمەتتىك باستامالار تۋرالى ايتىپ, جۇمىسشىلاردى قىزىقتىرعان سۇراقتارعا جاۋاپ بەردى.
ءماجىلىس دەپۋتاتتارى يرينا ارونوۆا, يۆان كليمەنكو مەن البەرت راۋ قوستاناي وبلىسىنداعى التىنسارين اۋدانىنا قاراستى دوكۋچاەۆ اۋىلىنداعى سۋ قۇبىرلارىن جۇرگىزۋ جۇمىستارىمەن تانىستى.
بۇگىندە «ايماقتاردى دامىتۋ-2020» باعدارلاماسى اياسىندا مۇندا 20 شاقىرىم قۇبىر تارتۋ كوزدەلۋدە. جوبانىڭ جالپى قۇنى 779 ملن تەڭگەنى قۇرايدى. ازىرگە ءبىرىنشى ۇڭعىمانىڭ قۇرىلىسى جۇرگىزىلۋدە. نىساندا 40 ادام جۇمىس ىستەۋدە.
ال سىر وڭىرىنە جۇمىس ساپارىمەن بارعان ءماجىلىس دەپۋتاتتارى ابزال ەراليەۆ, بالايىم كەسەباەۆا, ءبايدىلدا جىلقىشيەۆ جانە تاراس حيتۋوۆ «بالامەكەن» جوباسى اياسىندا سالىنعان تۇرعىن ۇيلەر قۇرىلىسىمەن تانىسىپ, جەرگىلىكتى حالىقپەن جۇزدەستى.
وسىدان بىرەر اي بۇرىن, «بايتەرەك» شاعىن اۋدانىندا تۇرمىسى تومەن كوپ بالالى وتباسىلار ءۇشىن 150 باسپانانىڭ قۇرىلىسى باستالعان بولاتىن. بۇگىندە قوس پاتەرلى 100 وتباسىنا ارنالعان 50 ءۇيدىڭ قۇرىلىسى اياقتالىپ, تۇرعىندار قونىستانعان. جاڭا مەكەننىڭ العاشقى قونىستانۋشىلارى – كوپ بالالى وتباسىلار.
ال ءماجىلىس دەپۋتاتتارى ايزادا قۇرمانوۆا, ايگۇل نۇركينا, الەكساندر سۋسلوۆ جانە ءجاميلا نۇرمانبەتوۆا پاۆلودار وبلىستىق جەدەل مەديتسينالىق جاردەم ستانساسى ۇجىمىمەن كەزدەستى.
كەزدەسۋ بارىسىندا ءماجىلىس دەپۋتاتى ج.نۇرمانبەتوۆا ءسوز الىپ, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ 2018 جىلعى 5 قازانداعى قازاقستان حالقىنا جولداۋىندا مەديتسينالىق قىزمەت ساپاسىن كوتەرۋ ماسەلەسىنە ماڭىز بەرگەنىن اتاپ ءوتتى.
ءماجىلىس دەپۋتاتتارى زاۋرەش امانجولوۆا, جانات وماربەكوۆا, گۇلنارا بيجانوۆا جانە كارىباي مۇسىرمان سولتۇستىك قازاقستان وبلىسىنىڭ ماعجان جۇماباەۆ اۋدانىنداعى «نوعايباي» جشس-نە باردى.
وندا دەپۋتاتتار ءداندى, مايلى جانە ازىقتىق داقىلداردى وسىرۋمەن اينالىساتىن كاسىپورىننىڭ قىزمەتىمەن تانىستى.
ءماجىلىس دەپۋتاتتارى باقىتجان ەرتاەۆ, ەۆگەني كوزلوۆ جانە يرينا ۋنجاكوۆا ماڭعىستاۋ وبلىسىنا جاساعان جۇمىس ساپارى بارىسىندا اقتاۋداعى تۇرعىن ءۇي, كوممۋنالدى-تۇرمىستىق جانە ونەركاسىپتىك باعىتتارداعى نىسانداردى جىلۋمەن, سۋمەن قامتۋعا جاۋاپتى «كاسپي جىلۋ, سۋ ارناسى» مكك ۇجىمىمەن كەزدەسۋ وتكىزدى.
دەپۋتاتتار كەزدەسۋ بارىسىندا ماجىلىستە اتقارىلىپ جاتقان جۇمىستار, ەلدىڭ ەرتەڭى جارقىن بولۋى ءۇشىن بىلىكتى مامانداردى وقىتۋ, الەۋمەتتىك ماسەلەلەردىڭ شەشىلۋى, جاستاردىڭ ءرولى تۋرالى وي ءبولىستى.
